الحضانه.

اولا انا هارد على تعليقاتكم على البوست اللى فات
بس بالليل
--------------------------
ليه بقى كتبت البوست السريع دا
اصل انا بأختبر مشاعر جديده عليا اوى
موش متخيله اد ايه
انا بحب البنت حنونه
طبعا اغلبكم يعرفها
واللى مايعرفهاش
حنون دى بنت اختى اسما بس
لكن الام الفعليه هى انا ماما سها
اد ايه الكلمه دى بتجننى
وقال اقول موش عاوزه اولاد قال
دا وربنا انا بتجنن لما بسمعها بتقول كدا واجرى عليها واخدها فى حضنى
انا بحبها بجد بشكل موش ممكن اى حد يتخيله
المهم
صحيت حبيبه مامتها من جنبى الصبح
واللى فى بالها انها تروح الحضانه
انا اخدتها ورحت زرت الحضانه اكتر من مره
لانى كنت بشتغل هناك وكلهم حبايبى
الست حنين بقى كل شويه تقول ماما عاوزه اروح الحضانه
والنهارده وقفت وخبطت رجلها فى الارض عشان انا كنت كل شويه اقولها حاضر هاوديكى وموش اوديها
النهارده صممت
انا كنت بأجل مرواحها الحضانه لانى بصراحه بخاف عليها من الهوا الطاير
انا بخاف عليها اى حد يقربلها
حتى مامتها
وانا مالى موش هما اللى سابوهالى خالص عشان اربيها واتعلقت بيها
قمت اتصلت على سواق العربيه وجه اخدها وبصراحه انا ماكنتش مصدقه ان لما العربيه تيجى هى هتمشى معاهم كدا ببساطه وكنت متخيله انها تتعلق برقبتى وتقولى موش عاوزه اروح ياماما
قلب الام بقى
المهم مشيت وبعد نص ساعه كنت انا لابسه وخارجه رايحالها الحضانه
ماما تقولى يابت اقعدى
وبابا يقولى بطلى عبط
وامها تقولى سبيها عشان تتعود
وانا راسى والف جزمه قديمه
هاروح اطمن على بنتى ياناس
قلبى واكلنى عليها
المهم اخدت تك تك ورحت
وهناك مس مى اللى هى صاحبتى وقفت فى وشى وانا داخله الفصل وقالتلى لا ابدا
انتى موش داخله عندها
وانا اقولها وحياتى يامى عشان خاطرى
قالتلى طيب هافتح وبص عليها من غير ماهى تشوفك
فتحتلى وبصيت عليها لقيتها واقفه جنب المدرسه وماسكه الساندوتش بتاكل فيه
قلبى طار وكنت هاتجنن واخدها فى حضنى
لكن مى منعتنى الله يسامحها
خرجت وقعدت اقولهم وربنا اللى هيزعلها هاشرحه
وانا هاخد كورس تشريح عشانكم وعشان لو اى حد عملها حاجه والله من اول نها صاحبه الحضانه لغايه الداده هااكلكم واقطعكم بسنانى
ضحكوا اوى
وادينى كل شويه عماله اتصل بيهم اطمن عليها
وبصراحه البنت جدعه وفاقت كل تخيلاتى
طلعت اجمد منى انا
ياحبيبتى ياروحى
وانا دلوقتى قلبى متشحتف عليها ومستنياها
هنا