BLOGGER TEMPLATES AND TWITTER BACKGROUNDS »

الاثنين، 30 نوفمبر 2009

افرح اغنى احزن اغنى.


أولا :احب اشكر كل الناس اللي بيحاولوا يطلعوني من اللي انا فيه.
=============================
لكن اسمحولى اسألكم سؤال وياريت كل واحد فيكم يرد بمنتهى الصراحة.
هل ياترى لو علمتم كم الاخطاء التي فعلتها
وكم المرات التي جرحت فيها نفسي
وكم الذكريات المؤلمة التي احيا بها
وكم عدد من اقتربوا ولكن ذهبوا
ولكنهم لم يذهبوا فى سلام
فقد ذهبوا بعدما القوا حجر فى قلبي
هل لو علمتم كم السذاجة التي كنت احيا بها
لو علمتم كم الاستهتار الذى عرضت نفسي له
لو علمتم ما يحدث لكل من اقترب منهم
لو علمتم اننى كما قلت عنصر كيميائي نشط
اذا ما حاول التفاعل نتج عنه انفجارات وانشطا رات
لو علمتم انني اقترب من الناس بدون اي شروط وبدون اي اعتبارات
هل ستسمروا فى انكم تريدون ان استمر معكم وفى دنياكم؟
سؤالي هذا موجه لكل من يحاول ان يساندني
هل تفعل ذلك بحب بعدما اخبرتكم انني لست ملاكا
نعم انا لست ملاكا
قال لي شخص انني اخدعكم
وانكم لاتعر فونى كما يعرفني هو
الان اقول له
انا لا اخدعهم
انا اقول لكم بكل قوه
انا لست ملاكاااااااااااااا
ولست ايضا شيطانا
كل منا يحمل بداخله
خير الملائكة
وشر الشياطين
وانا احمل بداخلي الاثنين واضف اليهم
سذاجه الاطفال وجنانهم.


افرح اغنى
احزن اغنى
اتعب اغنى
دايما بغنى
الدنيا دايره غصب عنى
فى ايديا ايه غير انى اغنى؟
الغربه فينا
جوانا او برانا فينا
تنده علينا تجاوبنا ايامنا الحزينة

يا حزن ليه ساكن ملامحي وبقيت كأنك حته منى



السبت، 28 نوفمبر 2009

كما انا .


كما انا وحيده سأظل هكذا
منتظره .
================
تقول : المره دى هانفذ قرارى
يرد: وهو ايه قرارك دا
هى: هابعد عن الناس
هو :يضحك بسخريه ويقول كل مره بتقولى نفس الكلام
كل مره بتقولى هتبعدى والغريب انك بتقربى اكتر من الناس
هى :انا هابعد عنهم بطريقه انا بس اللى افهمها
هابعد عنهم انسانيا
هو : ازاى
هى: انا بتجرحنى اسرارهم واوجاعهم اوى
وانا بوجعهم باسرارى واوهامى وسذاجتى
هو: موش فاهم
هى: ولاعمرك هتفهم
هو :يتغاظ
هى: معلش اسمعنى المره دى
انا كل شويه احاول ابعد عنهم لانى انا لما بقرب منهم بتجرح
كل مره اتجرح
بلاش نقول هما السبب
خلينا نقول ان انا اللى بضيق براحهم
بحتل space
بتاعهم وبدخل فى حياتهم
بس والله موش فضول لكن لانى لما بحب حد بحبه اوى وبتجرح اوى
عارف لما تقرب من حد اوى وتهتم بيه وبكل اللى حواليه وهو يشوف انك بتخنقه
انا نفسى حد يقرب منى كدا يهتم بيا
يحضن قلبى بجد
عشان قلبى بينزف اوى
انا وحيده اوى
هو:يضحك ساخرا
هى :ايوه وحيده اوى
لكن انت متخيل غير كدا


سيبكم بقى من الحوار دا
اسفه بجد لكل اللى يعرفونى
انا موش هابعد عن التدوين
ولا عن مدونتى دى المكان اللى بتكلم فيه براحتى
اعتذار واجب لاى حد بيحبنى بجد
انا هابعد عن نطاقكم الانسانى
كفايه اعرفكم مدونين وبس
انا خلاص غيرت رقمى

=======================

انا ياجماعه عنصر كيميائى نشط اوى
كل مايحاول يتفاعل مع عناصر تانيه دايما لازم يحصله انفجار
وخلاص بجد تعبت من الانفجارات


=============================
اللى تاعبنى اوى كمان انى موش قادره اتقبل الواقع وارضى بيه
لانه عمره الواقع اللى انا عايشاه دا ماكان حلمى ولااملى
وكمان موش قادره احقق احلامى
فيه مليون قيد واساور من دهب وحديد
ادمت ايديا اوى ويمكن كمان تكون قطعت ايديا وجعلتنى عاجزه

=========================
حاسه انى على مرجيحه بتتهز اوى وبتعملى دوخه وموش قادره لااوقفها ولااتحملها
كل حاجه كل حاجه فى حياتى وجعانى اوى
=======================
جوزى وانا واصحابى واهلى وانا وانا وانا
لما بكون لوحدى موش ببقى سعيده ولما اكون مع حد بحاول على اد ماقدر انى ابقى سعيده لانهم ببساطه مالهمش ذنب فى طموحى العالى دا
==============
هو انا موش من حقى احلم ويكون طموحى بعيد اوى
انا بجد موش بحلم باى حاجه ابعد من امكانياتى لكن السلاسل بتمنعنى
====================
تنبيه كدا على جنب
ياريت ماحدش يدخل يقولى صلى وقربى من ربنا لانى موش محتاجه حد يقولى كدا
وكمان ياريت ماحدش يقولى انتى بتقولى موش عاوزه حد يقرب منك عشان الكل يحاول
ياريت كلامى يوصلكم زى ماهو كدا من غير ماتفكروا فى اى خبايا وراه
===================

الجمعة، 27 نوفمبر 2009

من يهتم حقا؟!!


على مايبدوا كدا والله اعلم
ان انا عنصر كيميائى غريب ولاحاجه
كل مايحاول انه يتفاعل مع عنصر كيميائى تانى
تطلع فى الاخر معادله مايعلم بيها الا ربنا
ما الاقيش دكتور يعرف كيميا كويس كدا يشوف ايه حكايتى او يشوف حكايه العناصر التانيه
اهو موش حارماكم من حاجه
بهزر اهو
عاوزين ايه تانى بس
عيد؟
عيد مين ياعم
هو جه عندكم ؟!!
اصله لسه موصلش عندى
يوم عادى جدا زى كل الايام التانيه
ممل وخنقه
اوف حاجه تغيظ
الروتين اليومى
اظبط البيت الصبح
اجهز الفطار
انا موش بفطر غير الدهر
يعنى بجهزله للى فى البيت
اجهز الغدا
حماتى تيجى تعيد عليا
تتغدى معانا
ويقعدوا الحريم
يلوك لوك
فى حاجات موش تهمنى ومعرفش اندمج فى حوارهم
الجهاز والعيال والجواز
يخرب بيت كدا
تمشى حماتى
ماما تهزئنى عشان ماكنتش طول الوقت مندمجه معاهم
وانا اعملكم ايه ياولاد التيت انتوا
اتكلموا فى حاجه افهمها وانا هارغى مع امكم كمان
اشطب المطبخ
تغلس حنون عليا شويه
ادخل اوضتى واقعد قدام الكمبيوتر
تيجى ماما
انتى مالكيش شغله غير اللى يتحرق دا
ارد ببجاحه وانتى عاوزه ايه؟
تقولى انتى قليله الادب
اقولها قديمه
تتغاظ اكتر وانا اتبسط اوى لما احاول ابقى بارده وانجح فى كدا وماما تتغاظ
تقولى انتى ماعندكيش دم
اقولها اتبرعت بيه
تخرج وهى بتشد فى شعرها طبعا بعد محاضره طويله عن الكمبيوتر وعنيه اللى هتبوظ منه
اكبر ولايهمنى
تيجى نرمين وتدخل تقولى تعالى سكتى اسامه اصل موش عارفه اسكته
طبعا لانى خلاص الكيل طفح من انها بتتكل عليا فى تربيه عيالها ولانى بجد ماعدش عندى اعصاب ولابال انى ادادى واهنن
ارد واقولها اخرجى وسكتيه انتى
ترد انتى مابتحسيش الواد بيعيط وهيموت من العياط
ارد ماليش دعوه ماخلفتوش ونسيته
ييجى بابا هو انتى ايه الافترا دا
الواد بيعيط وانتى ولاعلى بالك
ايه
ارد بقى بصوت عالى ولايهمنى هو انا امه
انا ماحدش يقولى عيال
اللى عاوز عيال يتحمل مسئوليتهم
انا مايلزمنيش عيال
وماليش دعوه برده
ماما عاوزانى اقعد ارغى معاها فى المسلسل اللى شافته عشرين مره وانا موش لازمنى اشوفه للمره التلاتين
حفظته خلاص
فى النهايه
اقفل الكمبيوتر واروح اقعد جنبها
واقولها كدا ارتحتى ؟
ترد الهى ماترتاحى يابعيده
البعيده دى اللى هى انا وعلى فكره ببقى جنبها
موش عارفه ليه تقول يابعيده
اقولها انا موش بعيده
انا جنبك هنا اهو
ويسلام بقى لو مامسكتش اعصابى ودا بقى بيحصل كتير
اعلى صوتى واصرخ وممكن اشد فى شعرى
واكسر اى حاجه قدامى كدا
ولايهمنى
وانتوا كمان طبعا ولايهمكم
سلام

الخميس، 26 نوفمبر 2009

القرب!!


هذا ماأجنيه من قربى من الناس!!!

قلمى.


من يستحق ان اعطيه ذلك القلم الغالي؟؟؟؟

الثلاثاء، 24 نوفمبر 2009

واقف لوحدك ليه؟


تصدقي انا كنت بدور عليكى
بتدور عليا انا !!!
من غير ماتزعلى انا كنت بدور على اي حد اتكلم معاه
طيب ما انا اي حد.
مايتهيأليش.


شوفتوا الوحده بتعمل فينا ايه؟
بتخلينا ندور على اى حد نتكلم معاه
وياحظك الزفت لو وقعت فى ايد حد غلط
ساعتها بتتحول وحدتك لنار تاكل الاخضر واليابس
صح ولاغلط




كده!!!


هما ليه بقوا كده ؟!
اصلهم هما كده.
وايه خلاهم كده؟!!
قلوبهم هى كده.
وليه انا موش كده؟!!
يمكن انتى كده.
وانت ليه موش كده؟!!
يمكن انا كمان كده.

مات من الملل.


قالوا مات من التعب
قلت لا
دا مات من الملل
سألو هو مين؟
قلت دا قلبي المسكين.
حزين,سهران ينادى
يدور على لمسه ايد
يمكن تداوى جرح السنين
قالوا
اقفلى بابك عليه
قلت مين هييجى يخبط
قالوا لاحد هيخبط ولاحد هيبكى عليه
قلت كفايه ابكى انا عليه
قالوا مالك
قلت موش عارفه
بدور عليا وموش شايفه
اه ياني
منى ومن قلبي
فتحته فى يوم
دخل دفا فرحني
وفى عز برد الشتا تركني وراح
قلت ياقلبى ماتحزنشى
قالي كنت فاضى وسعيد
قلتله بس كنت بارد
قالي واديني دفيت ورجعت بردت من تاني
شو فيلك حل فى النار اللي مخليانى بردان
ياريتنى لا فتحت قلبي ولا فتحت روحي الهوا


الأحد، 22 نوفمبر 2009

سأتظاهر انه انت.


قالت له: لو كانت الامور مختلفه,
ولو كنا نعيش فى مكان غير هذا وكانت الظروف مختلفه,
أكنت ستكون معى؟؟
فقال لها : هذا المكان ليس له وجود.
قالت: سأتظاهر انه انت.

=========================================
سألته: لماذا ستعيش بدون حب؟
فقال:يوجد اشياء اخرى لنعيش من اجلها ,الواجب والشرف.
فقالت :انهم لا يمثلون حياه ,انهم فقط غلاف الحياه,
والناس الذين لا يملكون الحب,كل الذى سيجنوه هو ايام وايام بدون الحب
الحب صنعه الله
واذا تجاهلته او انكرته فستعانى اكثر مما تتخيل.
فقال:إذا لن اعيش طويلا بدونه.
============================================
قالت له:اعلم انني احبك تريستان
اينما ذهبت,اينما رأيت
سأكون دائما معك.
فرد قائلا: لقد كنتي على حق,
لا اعلم اذا كانت الحياه اعظم من الموت,
لكن الحب كان افضل من كلاهما.
قالت:ارى وجهي فى عيون الاخرين بالضبط كما اريده ان يكون.
فالقلوب الصريحة الحقيقية,تبعث الراحه فى الوجوه.
اينما نجد مكان على وجه الارض بدون سهام خارقه.
مهما كان ما سيموت فلا يمثل شيئا لو اتحد حبنا معا.
واحببتني كما احبك فهذا شيء لايمكن ان يموت.
====================================
دى مشاهد اعجبتنى من فيلم
Isolde and Trestian

الخميس، 19 نوفمبر 2009

الاستمورننج.


مساكم شيكولاته دايبه فى شيكولاته.
هاحكيلكم يومى النهارده.
انا طبعا متعوده ان الاستمورننج بتاعى موش يبقى ثابت كل يوم(استمورننج يعنى اصطباحه يامعلم)يعنى بيبقى كل يوم كدا حسب المود بتاعى .
يوم قهوه ,يوم كابتشينو(ايوه ابورغوه ده),يوم لبن ,يوم خناقه مع ماما,يوم اشم ريحه القهوه بس وموش اشربها.
النهارده بقى كان مختلف تماما .
بسبب البوست اللى كتبته امبارح ,دخل شخص عزيز اوى على قلبى بجد وقراه ولما طبعا حس باللى انا فيه موش استنى لغايه الصبح واتصل بيا قبل الفجر بوقت قليل اوى وصحانى من نومى .
واصر انه يسمعنى اغنيه منير( بحر الحياه) ولانى كنت نايمه فماكنتش مركزه هى ايه فبساله اغنيه ايه دى قالى دى اغنيه مدونتك ياسكره وكمان اصر انى اغنيها وارددها معاه
وبعدين كلمنى شويه وقفلنا وبعدين رجعت نمت تانى بس طبعا اول ماسمعت الاغنيه واندمجت معاها بكيت اوى وبعدين نمت وصحيت بعد ساعه عشان ماما عاوزانى اسافر اسكندريه بالقطر وبما انى بكره السفر بالقطر فحصل بينا مشاده كلاميه يعنى خناقه صغنونه كدا وبعدين رجعت ماما صالحتنى بعلبه كلينكس ,ههههههههههههههه.
اخدت القطر ووصلت اسكندريه الساعه 10 الصبح وربنا مايوريكم الصداع وعشان كدا اخدت قرصين بنادول اكسترا مع فنجان قهوه فى الاكاديميه كدا وفوقت على الاخر.
وبعدين رحت نت كافيه جنب الاكاديميه عشان اراجع من الe-book اللى معايا قبل الامتحان وفجاه كدا وانا قاعده لابيا ولاعلى اسمعلك اخبار الناس فى السودان ودمى يتحرق اكتر واروح الاقى الامتحان كمان اتأجل فيتحرق تانى,والله ياجماعه بيتهيألى ان دمى من كتر الحرق خلاص ماعدش ينفع اتبرع بيه,ماشى يافاتيما انتى وشيما ودودو وصبرنى .
واخرج من الاكاديميه ارن على حرووف الاقيها من قبل حتى ماترد وتقولى ازيك او اى حاجه تقولى انتى هنا فى اسكندريه اقولها ايوه تقولى عشر دقايق ونكون عندك انا واسكندرانيا ويوصلوا ونروح على البحر ونقعد على الرمل فى الشمس وكل واحده مننا بتبص للبحر وبتفكر تعمل حاجه ونقول :
انا كنت عاوزه انزل الميه بهدومى كدا وحروف كانت عاوزه تنام على الرمله وتبص للسما واسكندرانيا كانت عاوزانا نلعب استغمايه .
ههههههههههههه ومعملناش ولاحاجه من دول عشان الناس.
وارجع متأخر زى كل مره والست امى توبخنى كما هى العاده برده واسيبها واجى اعيش هنا فى مملكتى معاكم .
اعلان هام من الملكه سها الى رعاياها فقد قررت انها لن تستسلم للحزن تانى ودا طبعا اعلان موش اكيد لانها قلبها ضعيف اوى وكمان فيه شخص اقنعها انها انسانه منتهى الانانيه برغم تأكيد الاخرين عكس ذلك الا انها تقريبا منومه مغناطيسيا او انه قد اجرى غسيل مخ واقنعها بذلك ومن مكانى هنا ,انا البنت ساسو اقول لها جاتك وكسه ياموكوسه.
ههههههههههههههه
طولت عليكم ؟؟
اوعى تقولوا ايوه الا ازعل منكم واللى هيقول براحتك ياملكه هاجيبله شيكولاته.
اه نسيت اقولكم ان انا كل مااجى خارجه اقول لنفسى انا موش هاجيب شيكولاته والاقينى اروح عندها واقف واجيب كل مره بييجى عشرين جنيه كدا ولاحاجه .
تاخدوا حته؟؟
لالالالا بعينكم
هههههههههههههه



الأربعاء، 18 نوفمبر 2009

تضحك وتبكى.


تضحك بهستيريا ,
تسألها امها ما بكى يا ابنتى؟!
فتجيب لاشيء.
تبكى بحرقه ,
تسألها امها ما بكى يا ابنتى؟!
فتجيب لاشيء.
نعم لاشيء
فلا هي تعلم ولا احد اخر يعلم ,
انها تبكى ابنها ,
وتضحك على نفسها.
لا احد يعلم ان اليوم ذكرى قتل ابنها .
لا احد يشعر بما تشعر به.
حتى هو ...
والد الطفل لا يعلم ماتمر به اليوم
وكيف انها اليوم واليوم بالتحديد قتلت ابنها بداخلها
نعم قتلته .
انها قاتله.
امرأه ليست مثل كل النساء
قويه ولا تتحمل الهزيمة مهما طالت الايام فانها تنتصر فى النهاية.
ولكن.......
هنا وهنا فقط انهزمت ,سقطت كل وسائل دفاعها .
نست الدنيا وظلت فقط تضحك وتضحك وتضحك
واخيرا ....اخيرا بكت بعدما كانت لا تريد ان تبكى
بكت ولحالها
بكت ولم تجد يد تطبطب او قلب يحنوا عليها
كيف يحدث ذلك وهى التي قتلت ابنها
من هذا الذى سيقف بجوارها وياخذها فى حضنه ويطمئنها ....
جلست لوحدها فى غرفتها تبكى
تخيلته هنا يلعب وهنا يجرى وهنا ينادى ويقول ماما
تلك الكلمه التي قررت ان تعاقب نفسها بأن لاتسمعها من اي احد اخر
تلك الكلمه التي طالما حلمت بها ولكنها الان لاتريد ان تسمعها
فبها كل الخناجر وكل رصاص الدنيا سينطلق لينغرس فى قلبها
قررت ان تذهب لتتعالج عند طبيب نفسي وبما ان لا احد يعلم مابها فقد رأى الجميع انها فقط تتدلل على زوجها وانها تريد ان تحيا تلك التجربة فى العيادات النفسية
لا احد يعلم بحالها غير الله
سمعتها تنادى ربها
يااااااااااااارب
اليك ابتهل
اليك اشكو نفسي
اليك اشكو نفسي
اليك ياااااااااااارب
اليك فقط ابكى
اليك فقط ابكى ابنى
ابنى يارب
اليوم كان من الممكن ان يكون فى حضنى لكننى قتلته
فاغفر لى يارب
ارحمنى وارحم زلتى
ارحمنى يارب.
اريد ان اخذه فى حضنى ياارب
خذنى اليه ياارب
اريده فليس لى سواه
قتلته وانا لااحد لى غيره يارب
..........................
بسمعها دلوقتى .
http://www.youtube.com/watch?v=S69ED28a84I

اعتذار..


هو انا ليه كل مقرب من حد يبعد عنى
هو انا وحشه اوى للدرجادى
بجد نفسي اموت
حد قالي
بقيتي منتشره اوى على النت وكمان بقى ليكي اصحاب كتير
بس يارب يكون ليهم لازمه
على ما يبدوا من كل اللي بيجرالى ان
انا اللي ماليش لازمه فى حياه اي حد
انا تعبت اوى بجد
نفسي ابعد عن الناس وكل ما اقول كدا واحاول انفذه
الاقينى بقرب منهم اكتر وارجع اتجرح واتوجع تاني
هو انا خلاص جسمي نحس موش بقى بيفرق معايا كل الوجع دا ولاايه
ليه يبقى فيه حد فى حياتنا نتخدع بيه ونقرب منه ونحبه كمان وفى الاخر
يطلع انه كان بس من وجهه نظره انه قرب مننا عشان عنده امل فينا انه يساعدنا اننا نبقى احسن
هي ليه الناس بقت كدا
ولاانا اللي كدا وموش واخده بالى
هو ليه الوجع بيوجع اوى كدا
ااااااااااااااااه
ياحرقه قلبى
تعرفوا نفسي فى ايه وتمنيته كتير
الموت والحياه
يعنى ابقى ميته بس حيه فى الوقت نفسه
عارفين وضع الرجوع الى وضع الجنين
اللي فيها نبقى عايشين لكن منفصلين اوى عن الواقع والدنيا
كدا موش نغضب ربنا ولابنزعل حد ولابنزعل من حد
كدا احسن
قالوا ان لو اخدت حقنه انسولين وانا موش عندي سكر هتخلينى ابقى فى حاله كدا لاهى حياه ولاهى موت
بس دا تعذيب واعتقد انى موش استحق عذاب اكتر من اللي انا فيه
انا فيه اللي مكفينى وزياده
بحاول هنا انسى همي لكن غصب عنى بيطغى عليا
اسفه بجد لاى حد زعلته او اي حد جرحته من غير قصد
والله والله والله عمري ما فكرت انى اجرح حد او اغدر بحد او ان استغل حد باي شكل من الاشكال
اسفففففففففففففففففففففففففففففففففففففففففففففففففه لكل الناس
اسفه اصلا انى موجوده
اسفه انى عايشه
اسفه انى بتنفس
اسفه لانى موش عارفه ارتاح
اسفه لسها ولكل الناس

يابسكويت خالص يامهندم.


يابسكويت خالص يامهندم
ربنا يحرقك الليله يافندم

اه وربنا انا بدعى عليه.
احكيلكم الحكايه....
انا متعوده انى فى اى مواصلات يااخد الكرسى اللى جنب السواق لوحدى او لو ركبت فى الكراسى التانيه اخد مكان اتنين عشان لاحد يتزنق فيا ولاحد يغلس عليا واخد راحتى ومحدش كمان يضايقنى .
اوووم ايه اللى حصل,
كنت كدا رايحه المحافظه اقابل وكيل وزاره التربيه والتعليم.
وعملت اللى متعوده عليه فى المواصلات واخدت مكان اتنين وقعدت جنب الشباك وسبت بينى وبين الافندى اللى جنبى براااااح.
وطبعا كما هى عادتى الزفت برده لما اركب مواصلات بسرح اوى وافضل باصه بره الشباك وموش حاسه اغلب الاحيان بالناس جوه.
وفجأه كدا ياخواتى الاقينى كدا حاسه بحركه غريبه جنبى واتلفت بسرعه ابص الاقى ايده اللى تتقطع لازقه فيا كدا قمت باصاله كدا شذرا وقلتله"ماتشيل ايدك ياخويا
يعنى انا واخده مكان اتنين عشان الحركات الزباله دى وبرده مافيش فايده"
قام باصصلى كدا وقالى جرى ايه يامدام هو انا جيت جنبك..
قلتله يالهوى على البجاحه ايه هو خلاص ماعدش فيه دم كدا,
ايه بقيتوا كدا ليه,
الله يحرقك ويحرق كل اصنافك,
قعدوا الناس يهدوا فيا وواحد يقولى ماعلش يابنتى اعذريه اصله راجل ناقص
قلتله لاياعموا دا مايتقالش عليه راجل اصلا.
وسكت. وهو قعد حاطط ايديه على الكرسى اللى قدامه كدا وكل شويه يبصلى كدا وكأنى عملت عمله او قتلتله قتيل.
الهى يحرقك يااخى وكمان عاملى فيه محترم,
الهى يحرقك يااخى ويحرق كل امثالك.
طيب بيقولوا ان العرى والستات والبنات هى اللى خلت الرجاله تتحرش بيهم
طيب هتقولوا ايه وانا منتقبه يعنى لاضيق ولاعريان يبقى ايه بقى
اوووووووووووف ربنا يريحنا بقى من الهم دا
وتعرفوا طلع فى النهايه ......(محامى).....
الحق ياصاصا محامى يعنى موش شحات ولاحرامى بس انما كمان متحرش...
هههههههههههه
حاميها حراميها.
الموقف دا فكرنى بموقف حصلى فى اسكندريه من حوالى 5 سنين
كنت واخده مشروع من المحطه لابوسليمان وبعدين السواق خير اللهم مااجعله خير كان شارب ولاايه وعمل بينا حادثه.
اه وربنا حادثه وانا اتبهدلت اوى بس الحمدلله ماكانش في اى اصابات دائمه.
المهم الناس كدا اتلمت ودا بيسند دا وانا كدا الدنيا بتلف بيا والاقى ايد بتمسك (اوعوا تفكيركم يروح هنا ولاهنا)بتمسك ايدى وتقومنى وقمت من غير ماابص ايد مين دى وبعدين الاقيه بيلف ايديه حوالين وسطى كدا قال ايه بيسندنى ومن غير تفكير الاقى ايدى كدا بتفرقع على وشه وفوقت خالص كدا والتانيه بتفرقع على الناحيه التانيه وابصله الاقيه الملهى على عين اللى جايبينه السواق
اتوكس ياموكوس جاتك ستين واكسه ماشيه مع وكسه وراكبه واكسه تانيه ويفوتوا على كل الوكسات اصحابهم وييجوا لك انت لوحدك..عشان يوكسوك على وكستك ياموكوس.
ربنا يريحنا من الاشكال دى بقى

يابسكويت خالص يامهندم
الهى يحرقك الليله يافندم
تطلعوا بايه بقى من البوست الطويل العريض دا
ان موش كل افندم يبقى راجل محترم
وموش كل راجل محترم لازم يبقى افندم
ههههههههههههه
سلام.

الجمعة، 13 نوفمبر 2009

سيد الصمت.


يا سيد الصمت القاتل.
انا ممتنه لعينيك إن تحدثتا الي
فى هذا الليل...
اتمنى ان لايأتى الفجر.
سأرحل الى الماضي;
سأرحل لاضم اوراقي ودفاتري;
واشتاق واشتاق لنفسي;
سأرحل الى الماضي مره ثانيه وثالثه ومائه مره.
سأرحل لاضم صوتك حتى لا يفارقنى.
سأرحل حتى اصغى اليك مره اخرى.
سأرحل لانى احتاجك;
نعم ...احتاجك.
احتاج ..اليك..فى لحظه احتياج;
احتاج ..اليك..لتغوص فى اعماق اعماق نفسي..لتفهم من انا.
احتاج.. اليك..لتجردني من نفسي .
نعم ...سيد الصمت..احتاج اليك..
لتكشف لي ذاتي..نعم احتاج اليك..
فى ذلك الليل الذى اهواه ..مع تلك النجوم التي تصاحبني دائما ..احتاج اليك..
لتمسك بلجام ذلك القلب..الساعي دائما للهروب منى,لتجعله يهدأ فى صدري ..احتاج اليك لترى معى ذلك اللون الاسود الممتد والمتشابك مع اللون الازرق فى سماء مليئه بالنجوم.
تلك النجوم التي دائما ما تحاورني ..وتسألني اين ذلك السيد الذى اسميته..سيد الصمت..
وانا لا اجيب ..فأنا لا اعرف اين انت..فى اي زمان انت..سيد الصمت.

انا والبرواز................



برواز رائع الجمال
ولكنه لا يحمل صوره

فصاحب الصوره ليس هنا



لم يسعفني الزمان لالتقط تلك الصوره





انها صوره لطفلي الرائع الجمال
طفلي صاحب الضحكة التي لم ارها
الضحكة التي سمعها قلبي
ومنذ ذلك الوقت وانا اشتاق اليها





دائما احمل ذلك البرواز
دائما احمله فى قلبي
فى عقلي
فى روحي وكل كياني



دائما احن لذلك الطفل
احن لاحمله بين يداي
احن لالعب معه
نعم كم اشتاق لسماع ضحكته
كم اشتاق لاضمه فى حضني
احن لالتقط له صوره
لاضعها فى البرواز

الأربعاء، 11 نوفمبر 2009

مع نفسى ..اهو كدا بقى.


اقولكم ايه؟؟؟؟
اه افتكرت اصل انا عاوزه اتكلم عن
الشتا .
من زمان وانا عماله اقرأ
بوستات تتكلم عن الشتا وانه فصل ماعرفش ماله وماله.
ووالله الشتا دا مظلوم معاكم .
دا انا بحبه موت.
ايوه بحبه .بحس لما بمشي فى المطر ان انا باخد شاور رباني كدا ,شاور بيغسلنى اوى من جوه ,بيغسل روحى وقلبي,صحيح معاكم ببقي ميته من البرد لكن الدفا اللي بحسه جوايا بيهزنى اوى وبيعملى رعشه كدا بحبها اوى وفى عز الصيف بحلم بيها.
احكيلكم عن زكرياتى مع الشتا.
بيت عيله فيه جزء كدا للطبيخ والغسيل
والخبيز وبما ان انا بنت فلاحين فكانوا بيخبزوا فى الفرن البلدى (الطينى)وكانت اوضه الفرن دى طول الوقت وفى عز امشير وطوبه بتبقى دافيه وكنا نتجمع كدا فيها ونقعد على القش ,اه وربنا كان بيدفينا اوى ونهزر ونلعب ونأزأز لب ونعمل فيشار,وايه كانت تبقى هيصه كدا .بيت العيله دا كنت دايما تحس ان فيه فرح من كتر الدوشة والكلام والناس الكتير اللي كانوا فيه(كل واحد منهم بقى فى طريق دلوقتى)
يالله دنيا!!!
المهم كنا فى اول الشتا كدا ,قش الارز ييجى من الغيط ويحطوه على السطح وكنت انا مغرمه مذاكره على القش ,
كنت بروح
المدرسة فتره مسائيه فكنت اصحى اول الشمس ماتفتح عنيها كدا واجرى على السطح اذاكر على القش ولما اتعب انام كدا فى شمس الشتا الحنينه اوى واقفل عنيه والاقى جفونى لونها احمر من جوه وانا مغمضه ابقى شيفه لون احمر جميل اوى ولسعه الشمس لوشى كانت تجنن .
هههههههههههههههههههههههه
انا كنت
دايما مفتريه كدا وقويه ههههههههههه اه والله فى مره جايين من الكتاب انا واخويا خالد حبيبي ربنا يرجعه بالسلامة يارب وبعدين كان معايا 10 قروش رحت رمياها فى المايه المطينه فى الشارع وقلتله هاتهالى ياخالود ,حبيبي انحنى عشان يجيبهالى قمت ايه زقيته ,اه وربنا زقيته,وفطست من الضحك عليه وهو لونه كله اسود بسبب الطين هههههههههههههههههههه,موش بقولكم مفتريه.
المهم انا بحب
الشتا اوى وبحب ليله الطويل لانى كائن ليلى .
يلا سلام .

الثلاثاء، 10 نوفمبر 2009

الحزن...؟



عاوزين نعرف تعريف الحزن فى القاموس(لا دي موش حصه عربي)
الحزن:
معاناه عقليه شديده او محنه تحدث بعد مرض اوخساره شديده,ندم شديد.
اما فى الحياه
الحقيقيه:
فالحزن قد يبدوا بمختلف المظاهر
التي لاتمت للحزن بأي صله فمثلا ممكن ان يكون بالاهتمام بشيء لا يستحق الاهتمام او زي حالاتي كدا انى ممكن انام 48 ساعة متواصل اصحى وانام واصحى وانام على طول.
كما قالت اليزابيث كوبر روس
اننا حينما نمر بمرحله خساره فادحه او نمر بحاله موت فاننا نمر بخمس مراحل للحزن.
1-الانكار:
وذلك لاننا نعجز عن التفكير فى خسارتنا ونكذب حدوثها
ولا نستطيع تخيلها ولكن الافضل لو اننا نعبر عنه عندما نشعر به ونعبر عنه على قدر استطاعتنا وهكذا ننتقل للمرحلة الثانية وهى:
2-الغضب:
اننا نغضب من الجميع ونغضب حتى من انفسنا ونلوم انفسنا دائما فى تلك
المرحله
ثم
تاتي المرحلة الثالثة وهى:
3-المساومة:
نتوسل ..نحتج..نقدم كل
مانملك حتى ارواحنا واسوا ما فى الحزن اننا لا نستطيع ان نتحكم به وحينما تفشل المساومة ويصعب علينا التعبير عن غضبنا فاننا ننتقل لمرحله اخرى وهى:
4-الاكتئاب:
نكتئب ونيأس الى ان نقتنع اننا بذلنا كل
ما بوسعنا ونفذت مننا كل الحيل هنا وهنا فقط نصل للمرحلة الاخيرة وهى:
5-القبول:
هنا يجب علينا ان نتقبل حزننا ونتعايش معه وهنا تواصل حياتك برغم عدم قدرتك على التنفس فانه دائما
ما يخطف انفاسك والاسوا عندما تعتقد انك قد تخطيته ولكنه يبدا من جديد مره اخرى .

ان وقت الحزن يختلف من شخص لاخر ولكل منا طريقته.
حينما تتذكر انك فى يوم من الايام وبطريقه ما..يستحيل..ان تشعر بهذا الاحساس ..فانه لن يؤلمك بهذا الشكل.



الجمعة، 6 نوفمبر 2009

فضفضه وبس..+تحديث

انا بس عاوزه اوضح حاجه ممكن تكون موش اتفهمت من الكلام
انا موش بعلق اختياراتى الغلط او فشلى على شماعه ظروف او على اى حدا
انا موش بقول قدرى لكن دا اختياراتى الغلط وكمان تفكيرى الساذج .


قالت احلام مستغانمى"نحن لانشفى من ذاكرتنا".وقالت ايضا"هل تستطيع ان انك تقول انك شفيت من عشق تماما من دون ان تضحك اومن دون ان تبكى؟".
ولهذا فهنيئا لنا بذكرياتنا الجميله .وياالف آآآه من جوه قلبى على مانحمله من ذكريات مريره مر الصبار.
انه الحب:
تلك الذكريات التى نحملها من ذكريات حلوه وايضا ذكريات مره.
ساحكى عنى حتى لااتجمل فقد انشات المدونه حتى اتكلم دون ان يكون هناك رقابه ولذلك فانا لااطلب نصيحه ولااطلب استشاره من احد .
انا فقط افضفض عن قلبى.
فتاه عاديه جدا واجتماعيه لدرجه فوق الوصف بتحب تقرب اوى من الناس ودايما بتنجرح منهم دا كله احيانا واحيانا تانيه تقف هكذا كالصنم ولاتعرف كيف تتصرف فهى ذكيه جدا وغبيه جدا ايضا.
وقد قالو "الطريق الى جهنم مفروش بالنوايا الحسنه وانا دائمه الدخول الى جهنم"
هى تحب وتكره ,تفرح وتتألم,ويالها من الالام مبرحه تلك التى تحيا بها دائما .
دائما اعود للذكريات واتذكر كل شىء افرح وابكى واحزن واضحك كل دا مع ذكرياتى
يمكن تكون بالنسبه لبعض الناس حاجات تافهه لكنها اثرت فيا وشكلتنى فى وقتها.
آه والف آه على تلك الطفله سها التى كنت احبها حد الجنون ,كنت اعشقها واعشق تفاصيلها وهى طفله ثم وهى مراهقه لكننى كرهتها شابه وكرهتها امرأه.
نعم كرهتها جدا ...كرهتها حتى وصلت اننى رميتها فى بئرعميق جدا ولكن تركت غطائه نصف مغطى .
تخيلت انه فى يوم من الايام سياتى من يخرجها من هذا البئر ويجعلنى احبها مره اخرى .
تلك الطفله لم تكن تحلم سوى بحياه كريمه وان تحقق حلمها وحلم امها ان تكون دكتوره ذات شأن فى المجتمع.
كنت اهوى مهنه الطب كنت احبها برغم خوفى الشديد من الدماء ولكن تاتى الرياح بما لاتشتهى السفن يقولون كيف ستتحملون نفقات كليه الطب فهى كثيره جدا .
تقلق ماما اوى تعيش فى قلق من النقطه دى اشعر بها وبالامها واقرر ان اكون ادبى وليس علمى وليس لان ذكائى لايؤهلنى للعلمى فقد كنت متفوقه جدا وكنت احق بهذا القسم من كثيرون وهم ايضا لم يستطيعوا ان يحصلوا على مجموع يؤهلهم للطب.
وتنهى الثانويه العامه وبتفوق كما هى عادتها وهى ايضا مازالت تحب نفسها وادخل كليه تربيه "حلم الكثيرون فى ذلك الوقت".
وهناك من رأى اننى هكذا لم اخسر اى شىء فقد دخلت الكليه اللى اتمناها من وجهه نظرهم وهم لايعلمون اننى اكرهها.
وبما ان سها تكرهها فلم تهتم بها لانها ليست حلمها .
تخيلت انها ستنهيها بتفوق وتعمل بعد تخرجها وتكمل دراستها دون ان تحمل اهلها عبء دراسه جديده
كانت متخيله الدنيا ورديه.هىء هىء
اضحك الان على سذاجتها وعبطها .
ويحدث مالايتخيله عقلها او عقل اى احد يعرفها وتفشل ومن فشل لفشل لفشل ومع كل فشل تفقد حبها لنفسها .
هتقولوا ليه موش غيرت الكليه ؟
هااقولكم لانها بمنتهى البساطه موش متعوده انها تستسلم ومع ذلك ماحاربتش نفسها عشان تنجح.
ايوا هربت .
هربت من مشكلتى بانى انغمست فى مشاكل اصحابى ومحاوله حلها .
هربت لعالم خيالى :عالم النت .تهت فى غرف الشات .عملت مدونه وموش كتبت فيها حاجه لانى كنت فى الشات .
ولانى لسه عندى شويه من الاحمر ومازال فى نفسى احساس بالذنب تجاه اهلى :عملت لاتحمل نفقاتى الزائده بعيدا عن كاهل اهلى .
ودا كمان حاجه هربت بيها بعيد عن سها .
انغمست مع الناس.عرفت كل الناس وكل البشر وكل المستويات وكنت دايما مخلياهم فى صندوق الصحاب بعيدا جدا جدا عن صندوق الحب واللى كان فيه واحد خيالى اوى.
من فشل لفشل ومازلت مستمره فى الدراسه وكان بيتقدملى ناس وناس وكنت دايما ارفض لغايه اما بقيت عندى 25 سنه
اتقدملى واحد صنايعى وكمان موش مكمل تعليمه.
قلت لا قالوا ليه هتتبطرى على ايه ؟
لو كنتى ناجحه كنا قلنا ماشى مستنيه حد احسن لكن الاحسن دا هيتقدملك على ايه لاانتى جميله جمال مالوش حل ولامعاكى كليه ولاانتوا اغنيا اوى يعنى عشان حد مستواه عالى يبصلك.
كلام جارح ومتغطى اوى وبابا يقول اصحابك بقوا معاهم عيل واتنين .
قدام كل دا واكتر استسلمت وكانت اول مره استسلم .
كنت يائسه اوى لانى فاشله اوى.
ايون فاشله اوى .قلت اهى جوازه والسلام واتكتب كتابى ويوم بعد يوم بعد يوم اتأكد انه موش ليا
قلت لا هتغيريه .
ضحكت على نفسى عشان اكمل حاجه غلط من الاول وحصل حاجات وحاجات وحاجات .
المهم قررت ان الموضوع دا لازم ينتهى بعد تقريبا 4 شهور من كتب الكتاب واهلى وقفولى
هتبقى مطلقه وتكونى اول واحده فى العيله ..لا والف لا.
رضخت تانى واستسلمت لتانى مره وقلت يابت بلاش تتبطرى بدال ربنا مايعاقبك بعد كدا ودفعت مشاعرى ناحيه دفع بغير عقل قلت خلاص جوزك وهيكون ابو عيالك لازم تكملى.
وبرده حصل جديد وكنت انا اللى بخسر كل يوم.
اهلى بداوا يحسوا بالغلطه دى وان الراجل دا لاينفعنا ولاينفع بنتنا وساعتها قلت لا هكمل وكنت مستعده اكمل لكن....
لما تكتشفى ان راجلك دا موش امانك ولامصدر ثقتك وقوتك هتعملى ايه؟
لما ماتحسيش معاه بالامان يبقى ماينفعش تكملى.
نجحت وخلصت دراستى اخدت كليتى وبدات ارجع افكر فى سها تانى وافكر فى احلامها وطموحاتها اللى هى بعيداااااااا اوى عنه .
لكن انه يخون ثقه اهلى فيه ويحطهم فى موقف وحش جدا ويعملهم مشاكل وكمان موش يعبرهم ولايعبرنى وياخد فى وشه كدا ويقول اللى تقدرى عليه اعمليه .
انا كاتب كتابك يبقى لا ومليون لا
لا ياادم انا موش هاكونلك حوا ابدا لو فضلت كدا طول عمرى.
انا عارفه انه بوست طويل واللى موش عاوز يقراه موش مهم عندى اصلا انا بس كنت بفضفض عشان موش اطق من جنابى
قال رضينا بالهم والهم موش راضى بينا بلا نيله

الخميس، 5 نوفمبر 2009

امبارح


قريه الصيادين

على البحر فى الماكس

بيوت خشب

مسجد الماكس

الفراشه دى جرينا وراها كتير عشان نصورها
وحرووف كانت عاوزانى امسكها لكن انا رفضت
لان اقل لمسه ممكن تقتلها وانا بعشق
الفراشات

دى برده قريه الصيادين

ودى كمان

ودى كمان

ودى كمان

دول الصيادين اللى كان معاهم الكلاب

القطه دى عجبتنى اوى
بحب القطط وكان عندى قطه وماتت
حرووف عندها قطه



اولا احب اشكر حرووف واسكندرانيا جدا على ترحيبهم بيا
اليوم بدا ان كان عندى امتحان فى الاكاديميه البحريه فى ميامى وبعدين الامتحان اتكانسل
وبما انى كنت معرفه حرووف واسكندرانيا انى رايحه فكانوا عاملين حسابهم ومستنينى
المهم اتكانسل الامتحان واتصلت قلتلهم وعشر دقايق وكانوا عندى قدام الاكاديميه
وركبنا رحنا بحرى ومنه رحنا الماكس ورحنا قريه الصيادين اللى فيها البحر ماشى وسط البيوت واكلنا شيبسى وشربنا بيبسى ولعبنا واخدنا صور للقريه وتحس وانت فيها انك فى مكان اثرى مكان كدا زى مايكون فيه روح معينه حاجه كدا بتشدك اوى
حرووف بتخاف اوى من الناس لما بتبقى فى مكان هادى اوى كدا
وكانت طول الوقت تقول ممكن ننخطف هنا ولاحد يحس بينا
هههههههههههههههه
كان فيه واحد ماشى ورانا وانا اصلا قلبى ميت ماكنتش خايفه حرووف واسكندرانيا كانوا خايفين ومشوا بسرعه جدا وهما بيقولوا لبعض الحوار دا بصوت عالى عشان اللى ورانا يسمعه
حرووف:هو بابا مارضيش يدخل معانا ليه؟
اسكندرانيا :موش عارفه.
حرووف :اصله قال انا ماليش فى شغل العيال بتاعكم والتصوير دا.
اسكندرانيا :هو قال هيستنانا فيه؟
حرووف :تقريبا على الرصيف التانى يعنى هيلف ويجي لنا.
انا بسمعهم وماسكه نفسى وانا هاموت من الضحك
خرجنا واتمشينا على البحر وعدينا من جنب صخور قريبه اوى من البحر
قلعنا الشوزات بتاعتنا والبحر كان عالى اوى والموج غرقنا لوسطنا
اه صحيح نسيت اقولكم
ان حرووف كانت مصممه تعرف الناس اننا فى كليه فنون جميله عشان لما نصور ماحدش يكلمنا عشان عندنا امتحان تصوير
قلنا نركب مركب
الراجل قال مبلغ كبير اوى ومتخيلنا سواح
ضحكنا ومشينا فى قلب القريه وصورنا صور كتيره
حرووف قالت ماكنتش متخيله انى هاالاقيكى عندك حس فنى كدا
موش عارفه هى شافت الحس الفنى دا فين
المهم
رحنا البحر وعدينا كمان من منطقه كانها صحراء كدا لازرع فيها ولاماء وحرووف تقول هى المنطقه دى حقل الغام ولاايه ؟
ترد اسكندرانيا وتقول تقريبا
ارد واقول شكلكم كدا ناويين تفجرونى هنا ولاايه
نضحك ونمشى برده فى قلب المنطقه دى
لما كنا على البحر كان هناك صيادين جنب الفنار وكان معاهم كلبين شكلهم ضخم اوى
حرووف تصور وانا ماشيه فى الميه انا واسكندرانيا وبنسمع فيروز انا وشادى
هنعمل اغنيه انا وحروف واسكندرانيا
اشمعنا فيروز وشادى يعنى
ههههههههههههه
نغسل هدومنا من الرمل بقزازه المايه اللى معانا وكمان يسيبونى انا الضيفه للاخر والمايه تخلص
وتروح حروف تجيب مايه من عند بيت من البيوت اللى احنا قاعدين جنبها
وفجاه يجى الكلب ويعدى من جنب حرووف وكان هيخبط فيها وهو بيجرى
ونقف نتسمر احنا التلاته خوفا من الكلب
لكن الحمد لله تعدى على خير
ماما تتصل تهزأنى على التاخير ونجرى نطلع نركب اى حاجه تودينا المنشيه
نلاقى عربيه فيها مكان اتنين نركب واخد حرووف على رجلى ونتكلم ونهزر ونضحك
3 مجانين بجد
مجانين اوى كمان
نروح المنشيه وهناك نفترق اسيبهم واركب للموقف وارجع بيتنا متأخر اخد اللى فيه النصيب من الحاجه امى
وتقولى كنتى فين اقلها كنت مع اصحابى ترد وتقول دا انتى بجحه وكمان بتقوليلى انك كنتى بتلفى
قلتلها يعنى اكدب عليكى ياحاجه
المهم تتصل حرووف واسكندرانيا يطمنوا عليا ويقولولى قلقتينا عليكى
طبعا موش هاحكى زى حرووف او اسكندرانيا
هما الاتنين بيحكوا بطريقه حلوه اوى تعيشك معاهم
ودى بعض الصور اللى اخدتها هناك

الأربعاء، 4 نوفمبر 2009

كان يوم جميل اوى ............ونهايته كانت..................

كنت عاوزه احكى تفاصيل لقائي بالمدونتين الرائعتين
اسكندر انيه
وحروف
لكن اعذروني تعبانه جدا

كل الحاجات


بصوا بقى
قرار تنحى وقلب يدمى وهاقفلها وكل الحاجات دى
عمرها ماكانت حل
انا من هنا هاعلن
قرار جمهوريه سها هانم رقم واحد
اللى هيحاول يدوسلى على طرف هااكهربه
قرب تتكهرب
واستنوا شكل جديد للمدونه
نيولوك جديد
مع الحقبه الرئاسيه الجديده لسها هانم
وكمان هتسمعوا وتقروا حاجات حلوه
دا موش اكيد موضوع القرايه دا
بس المهم
استنونى
waaaaaaaaaaaaaaait for me
وme دى انا
ماشى
امووووووووووووووووووه
اما الصوره دى بقى بعتهالى منونه حبيبتى كانت بتصالحنى بيها على نفسى
وطبعا جابت نتيجه مدهشه
اصل مين يقدر يقاوم بانيو شيكولاته
ياخراشى دا انا عسل ودايب فى الشيكولاته
ههههههههههههههههههههههههه
ملحوظه
قرب تتكهرب دى بتاعه فقرى بيه
وكمان البوست بتاعه شجعنى اوى
الفقرى وحرووف واسكندرانيه ومنونه وشيما
بصراحه وقفوا وقفه رداله
ورونى وقفه الرداله
ها هى مين هناك

الاثنين، 2 نوفمبر 2009

ليه...........................؟


انا كنت كتبت بوست تاني وكنت سانشره لكن حصل حاجه خلتني اغير رايي واكتب البوست دا.


هو ليه لما نقرب من حد اوى يجرحنا اوى ؟

ليه يعرف امتي وازاى يجرحنا حتى من غير ما يتكلم؟

ليه جرحه يبقى جامد ويوجع اوى كدا ؟

ليه الناس لما تقرب من بعض ويحبوا يتونسوا ببعض يجرحوا بعض؟

ليه موش نقبل ان حد يتونس بينا؟

وليه الحد التاني دا موش يقبل اننا نتونس بيه؟

هي الناس بقت وحشه اوى كدا ليه؟

ليه حد يخليني اخاف اعمل حاجه عشان ممكن تتفهم انى كدا بضيق عليه البراح الخاص بيه؟

ليه مايقدرش يفهم انى ممكن اقرب من غير ما اقصد انى اضيق عليه البراح (space)الخاص بيه؟

هو احنا ليه بقينا كدا ؟وهما ليه بقوا كدا؟

ليه بقينا اسيين اوى على بعض؟
فى عز مااحنا محتاجين بعض؟

جوايا ملايين الاستفسارات والتعجبات.

ليه حاسه انى عاوزه حد ياخدنى فى حضنه وابكى حتى تجف دموعي ؟

ليه حاسه اوى انى نفسي اروح عند ستي

نفسي تطلع من قبرها وتضمني وتطبطب عليا وتهدهدني وتهديني لغايه اما انام

ليه ؟؟؟؟؟

عاوزه انام اوى
انام وموش اصحى تاني .