BLOGGER TEMPLATES AND TWITTER BACKGROUNDS »

الأحد، 30 أغسطس، 2009

مات.................................

بيت عيله كبير جميل عادى الاثاث لكن فيه حاجه مهمه اوى
7 رجال اخوات منهم المتزوج ومنهم من لم يتزوج
المتزوجون 5 ومنهم بابا
كل واحد له اوضه نوم
وغرفه جلوس مشتركه مع الجميع
البيت مكون من طابقين وبيت اخر من طابق واحد
الغرفه الاولى للام
الام دى ستى او جدتى او تيته
الحاجه المهمه والاساسيه فى البيت دا انهم فرد واحد كما قال الكتاب
فرد واحد بما تحمل تلك الكلمه من معانى
بحبهم كلهم وكلهم بقول لهم بابا او ابويا
كل واحد معه اولاد ,منهم من معاه 4 ومنهم من معاه 3
ولكن
انا الاكبر فى كل الاحفاد
انا كما يقولون لى دائما -انتى اول العين ماشافت واول الايد ماشالت واول القلب ماحب-
كلهم بابا
كبرنا والبيت الكبير اوى دا بقى صغير على العدد
بنات وبنين -انسات وشباب-كل واحد عاوزله سرير خاص بيه -كل واحد عاوز اوضه لوحده وعشان كدا
ستى قالت اشتروا ارض وابنوا لكل واحد بيت لكن لازم تكونوا جنب بعض
قالت المثل بيقول مسير الاخ جار
عاوزاكم جيران ولكن تكون كانكم فى بيت واحد
الفرحان الكل يفرح معاه والحزين الكل يحزن معاه
عمى جنبنا مات
عمى مات
احكيلكم بعدين

الأربعاء، 19 أغسطس، 2009

مين اهم؟؟؟؟؟؟؟؟؟؟؟

مين اهم ؟
ردى .
جاوبى .
مين ؟
قولى مين اهم ؟
انا ولا كل الناس؟
انا ولا حد تانى؟
انتى طبعا اهم!
كدب ...............انتى كدابه
عارفه ليه
عشان انتى بتهتمى بكل الناس
وسيبانى انا لوحدى
لالالالالا
انتى فاهمه غلط
انا بهتم بالناس عشان دا شىء بيسعدنى
بفرح لما يفرحوا وبحزن لما يحزنوا
وبقلق عليهم فى قلقهم وبحس بيهم فى ضيقتهم
اوك
براحتى ياقطه لكن تعالى هنا قوليلى
مين بقى بيحس بيكى ؟
مين بيهتم بيكى ؟
مين بيسأل عليكى لما تغيبى ؟
مين بيقلق لقلقك ؟
مين بيحس بهمك؟
ها ............
ردى .
جاوبى.
انطقى.
اصلللللللللللللللللللل
هماااااااااااااا
ايوه معاكى لكنهم مشغولين وعندهم مشاغل كتير
والله ودا على اساس انك واحده كدا فاضيه وموش وراكى اى مسئوليه
واحده كدا طول الوقت موش بتعمل حاجه
لا موش دى الفكره
الفكره انى بقدر اسأل لانى موش بحب ابقى لوحدى
انتى عبيطه يابت انتى ولا انتى اللى كدا
انا والله زهقت منك ومن تصرفاتك
اسكتى.
لا موش هاسكت
اسمعينى بقى
موش لازم تحبى حد اكتر من سها
ولاتسالى على حد غير سها
ولاتهتمى بأى حد غير سها
انتى اهم ياسها
انتى اهم من الكل
موش فيه حد يستاهل انه يكون اهم منك
اسمعى انا بحب اصحابى وموش بقدر ابعد عنهم
سها اسمعى نفسك كدا
امال هما ليه بيقدروا يبعدوا
خلاص ارجوكى بطلى كلام
لا موش هابطل
هتبطلى غصب عنك
دلوقتى حالا اخد منوم عشان انام وتبطلى قسرا



لا انا موش عبيطه ياواد انت وهو وهى
كل مافى الموضوع ان دا كان حوار دار بينى وبينى برده
وفى النهايه ماوصلناش لحاجه
بس خلاص
تصبحوا على الف خير.

الأحد، 16 أغسطس، 2009

حنون............بحبك.

بحبك اوى ياحنون اولا احب اعرفكم بحنون
حنون دى بنت اختى نرمين
دا طبعا اكلينيكيا لكنها بنتى انا بتصرفاتها ولانى انا ماما سوسو
او ابله سها زى مابتنادى عليا احيانا
البنت دى بجد فرحه عمرى بحبها اوى وموش متخيله انى ممكن احب اطفال بعدها تانى
حتى لو كانوا اولادى اللى انا موش ناويه ولاعاوزه اجيبهم
اصل بصراحه كدا موش اعتقد انى هاقدر اتحمل مسئوليات تانيه اكتر من اللى انا فيها
انا بخاف عليها اوى وبحبها اوى اوى او زى ماهيا بتقول بحبك ياما ياسوسو
النهارده الخميس طلعت على السطوح عشان اغسل فرش الصاله بتاعتنا
والفرش دا عشان ماتتخيلوش اننا ناس اغنيا ولاحاجه لان بمنتهى البساطه احنا لو اغنيا كنا جبنا حد يغسلها او نوديها المغسله
الفرش =الحصيره
عارفينها طبعا وربنا اللى هيقول ايه دا موش هاأرد عليه
المهم طولت عليكم؟!!!
قولوا:لا طبعا براحتك ياساسو
طلعنا على السطوح انا وننا زى مابدلعها كتير
انا ارش اومو على الحصيره والست حنين ماسكه خرطوم المايه اللى متوصل من حنفيه الخزان
وترش المايه على الحصيره
وفى عز ماانا منهمكه فى الغسيل وهى بترش المايه
فجأه كدا ومن غير اى مقدمات مسكت الخرطوم ووجهته ناحيه......
ماحدش يفكر فى حاجه عيب
بلاش النيه الوحشه دى
وجهته ناحيتى انا طبعا ولما انا اتفزعت وصرخت فرحت اوى وعجبتها اللعبه وبقت ترش وانا اجرى من المايه وهى تجرى ورايا
ومسكت انا الخرطوم وبدات ارشها وهى تضحك ضحكه بتجننى وتخلينى عاوزه اكلها هم هم هم
ماتخافوش انا باكل العيال الحلوين بس لكن انتوا .........
المهم فضلنا على كدا هى ترش وانا ارش حوالى ساعه ونجرى ونلعب بالمايه وفى الاخر خلصت غسيل الفرشه
وشلتها ونزلنا واول مامتها ماشافتنا والميه بتنقط مننا كدا قالت :يالهوووووووووى
ربنا يخرب بيتكم
يلا بقى ياختى ادخل حميها (اى اديها شاور)اصل عقبال عندكم انا مدرسه انجليزى كدا على اد حالى
اديتها شاور وطلعت لبستها وسرحتلها شعرها
وبعدين دخلت اخدت شاور انا كمان وبعدين المهم كان الوقت اتأخر وقلت انيمها لكن البنت دى دماغها مصفح(دا ياجماعه تعبير ماما بتوصف بيه حنين وتكمل وتقول اصلها طالعالك)
بفرح اوى لما حد يقول حنين طالعالك بتبسط جدا وبنشكح
ماحدش يسأل ايه انشكح دى
المهم يلا ياننا ننام
تقول:لا يلا نهزر
ننام
نهزر
ننام ياننا
نهزر ياسوسو
ماعلينا فى النهايه طبعا ولاننى مربياها كويس وبقدر اخليها تسمع كلامى
طبعا هتقولوا كلامك اتنفذ
هاارد واقولكم لالالالالالالالالا
كلامها هى اللى مشى على رقبتى
هزرنا ولعبنا كتير وفى الاخر قالت
سوسو شلينى ومشى بيا دا طلبها دايما
شلتها ومشيت بيها فى البيت شويه وبعدين قعدت على الارض وهى على رجلى
مسكت ايدى اليمين وقالتلى سوسو
قلتلها نعم يابيبى
قالتلى بحبك جوى جوى جوى ياااااااماااااااااااااااا
حضنتها اوى وقعدت ابوس فيها كتير وبعدين لفت ايديها الاتنين حوالين رقبتى ونامت وهى حضنانى
بحبها اوى اوى
طبعا حد ممكن يغلس ويقول احنا مالنا ومال الموضوع دا ؟
ارد عليه واقوله :مابلاش غلاسه بحكيلكم عن حبيبتى
فيها ايه ؟
او ممكن ارد بكلام ابييييييييييييييييييح اوى
بس خلينا مؤدبين عشان متاكده ان حنين لما تكبر كمان شويه
هى على فكره عندها سنتين ونص وبتحب تقعد على الكمبيوتر وتضغط على الكى بورد وبايديها التانيه تمسك الماسس زى مابتقول
بتحب تجاكر اى (تذاكر)زى ماما سوسو
نسيت اقولكم عشان ايه نبقى مؤدبين عشان طبعا هى هتقرأ الكلام دا فى يوم من الايام
باى باى ياجماعه
آآآآآآآآآآآآآآآآآآآآآآه نسيت اقولكم حنين بتح..............
بتحبنى انا طبعا
هىء هىء هىء هىء هىء هىء هىء

السبت، 15 أغسطس، 2009

الموت يخض اوى

اصله ماينفعش اكتب باى لون غير الاسود
الموت دا يخض اوى كنت بفكر فيه دايما
كنت بتخيل حالى لو حد قريب منى مات
لكن ماطلعش زى تخيلاتى خالص ,اصعب
اصعب اوى من كل مايخطر على بالك
لما تقعد جنب حد بيموت وتلمس رجليه
اول مكان بتخرج منه الروح وتلاقيه تلج
تلقيه بارد اوى وتتخيل ان فى الوقت دا فيه ملك موت
موجود بياخد روح بيشدها حته حته وتلاقى نفسك موش شايفه لكنك عارف اللى بيحصل
كنت قريت فى كتابه اسمه وأنذرهم يوم الحسره
تشبيه بليغ اوى اوى لخروج الروح بس يخلى جسمك يقشعر
قال المؤلف تخيل ان معاك قماشه صوف وبللتها بالمايه وجبت نبات شوك
ولفيته فى القماشه دى -المبلوله -وبدأت تشد النبات منها تخيل كدا مدى صعوبه خروج النبات
دا من القماشه .
بصراحه انا موش عارفه اتكلم لان الموقف اصعب من اى كلام
سلام

الأربعاء، 12 أغسطس، 2009

علمنى الا اخافك!!!!!!

علمني الا اخافك.....علمني الا اخاف الغد ....واجبني اينما كنت ....اجبني اين انت...
علمني كي لا اخاف ان اخبرك بانى اخاف ..فأنا دوما اخشى ان يهاجمني الخوف ...علمني الا اخاف الحياه ...فأنا لا اخاف الموت...علمني الا أخاف الناس ...فانا اخاف الله .
علمني فانى اخاف انى وحدي قد لا اعرف كيف لا اخاف .
فكما علموني الخوف فعلمني انت الا اخاف...فانا لااحب الخوف ولا الرجاء.
انا لااحب اليتم ولا التعود والانتظار..ولا الامل ولااحب الغد ..فعلمني كيف احب اليوم...علمني فانا لا اعرف كيف ابعد الحزن عنى...كيف اقصيه بعيدا عن قلبي وعن عيني ؟!!
علمني كيف اريد فانا علمت نفسي الا اريد لكنى مللت كونى لا اريد شيئا..علمني كيف
كيف تكون البسمه من القلب لا من الشفاه.
علمني ...اعطنى كتابا يعلمني كيف فانا قرأت كثيرا وحدي ولم اعرف كيف .
علمني لانى لا اعرف لماذا واسال دوما ولااجد اجابه ...اجبني ...خبرنى...مادمت تقول انك اكثر وعيا وعلما وفهما ،لانك قرأت كثيرا
قرأت كل الكتب وحللت كل علامات الاستفهام الكبيره ..اجبنى ..علمني اعطنى فهما ..علمني كيف اكون رقيقه واخلع القسوه من قلبي المتحجر..علمني كيف اكون بسيطه لانى لم اعقد نفسي بنفسي ..لا اعرف كيف اعود بسيطه ..
اخبرني لماذا...اسال وابحث عن اجابه واظن انى احتاج اليك كي تعلمني شيئا قد لاتعرفه...لماذا لم اعرف وحدي معنى السعادة ؟ولماذا وحدي عرفت معنى الالم؟اخبرنى لماذا وسأصدقك وانا لاأعرف إذا كنت تكذب او تتباهى بالمعرفة ..ولماذا اخدع نفسي بك ولا اقبل ان اخدع نفسي بأنى اعلم ..ولا احتاج الى غيرى !
اخبرني لماذا اقول اشياء لااعنيها ابدا ،ولماذا لا اعرف كيف اقول ما اريد ...اخبرني لماذا انقص اقوالي وانقضها ولماذا اخبرك كل هذا!
لماذا اظنك تفهم عنى ما اجهله وانا قد عشت عمري احاول ان افهمني !
اخبرني لماذا لا اعرف اذا كانت نبرتك تحمل السخرية ،وان كانت كلماتك واسئلتك تحملها ام لا...
اخبرني لانى اعترف بانى لا اعلم اما انت فلا تعترف ...اخبرني ايها الرجل الكبير كما تقول انت ..فانا طفله صغيره تجهل كثيرا وتعلم قليلا عما لم يلقنها المعلم
وحدي ..........وحدي خطوت اولى خطواتي ،ووحدي انكفأت ...لكنهم اخبروني بانى لو طلبت او قبلت اليد الممتدة لي لما وقعت،ولبدأت اعدو قبل الحبو ...فهأنذا اطلب واسال واقبل ،فاخبرني كيف ولا يزعجك انى عندما انكفأت انكسرت ...ولا يزعجك هذا...لكن لو اردت ان تعلل ذلك بانى بدأت وحيده ،ولهذا،يجب ان انتهى وحدي كما بدأت ،فلابأس
فلا تحمل نفسك ذنبي فلم تكن انت السبب!!!!!!

الثلاثاء، 11 أغسطس، 2009

الدنيا دى بنت تيت

عارفه طبعا انكم هتملوا منى ومن الاحباط اللى انا هاعيشكم فيه
انا قلتلكم اهو ماحدش يرجع يقول انتى موش قلتى انك محبطه بكسر الباء
المشكله ان الدنيا دى موش عاوزه اللى يطاطى لها
دى عاوزه اللى يقف فى وشها ويقولها انا اهو يابنت التيت وموش هتقدرى تموتينى بسهوله مادام لسه ليا عمر يبقى عمرى كله كل دقيقه فيه لازم استفاد منها
هاعمل حساباتى وهاقف على رجليه وموش هتقدرى تكسرينى
عارفين انا الدنيا حاولت كتير تكسرنى بس انا موش اتكسرت
انا قمت ووقفت على رجليه تانى
كان عندى حلم حاولت احققه
هما احلام كتير بس كانوا كلهم مرتبطين بحلم واحد لازم يتحقق الاول وبعدها الى الامام
ماقدرتش اغير مسارى وافكر فى حلم تانى صممت وكملت فى نفس الطريق لغايه اما حققت اللى انا عاوزاه
فرحت اوى وقلت بس نقطه البدايه خلاص وصلتلها .....خلاص يادنيا وصلت لاول السلم وهاطلع بمشيئه الله
موش هاقف خلاص
ماعدش فيه حاجه ممكن توقفنى ولا تخلينى اتنازل
انا تعبت اول لما وصلت للبدايه
اه صحيح وصلت متاخر بس العبره بالنهايه
هادخل السباق وجايز ليه لا موش بعيد على ربنا ممكن اوصل للى بدأوا قبلى واعديهم كمان انشاء الله
بحبكم اوى
وعاوزاكم تعرفوا انى موش محبطه ولاحاجه انا كنت بموت لكن الدنيا برده موش قدرت تكسرنى
فيه حد بحترمه اوى اوى قالى انا معجب باصرارك دا وبحسدك عليه كتير
لو حد تانى مكانك كان اتنازل قدام عناد القدر والدنيا وسلم من بدرى لكن انتى موش سلمتى
انا بقى هاسيبكم دلوقتى
عارفه انكم موش فاهمين حاجه بس مين عارف يمكن فى يوم احكيلكم من غير خوف ومن غير مااخبى اى حاجه
سلام ياساسو وياسوسو وياسكره ويابسكوته
طبعا كل السلامات دى لى انا لان ماحدش هنا غيرى انا وبس

الاثنين، 10 أغسطس، 2009

ومازال البحث جارى

طبعا كلنا بنسمع الكلمه دى كتير
آ آ آ آ آ آ آ ه نسيت اقول مساء الخير وكدا يعنى وعاملين ايه والحاجات الخنقه دى كلها
المهم ومازال البحث جاري
ياترى ياهل ترى البحث دا جارى عن ايه بالظبط؟!!
انا هاتكلم بالنسبالى انا
انا ياجماعه الخير طول عمرى كد والصلاه على النبى بدور
ببحث وببحث وببحث عن حاجات كتير
ببحث عن ناس فيهم حب زمان واصاله زمان .......
ناس موش يكون كل همهم مصلحتهم الشخصيه وبس
عارفين انا بعمل ايه بدور على صديق
ايوه هتقولولى كل الناس اللى حواليكى دول وموش لاقيه صديق
ايوه كل اللى حواليه انا اللى بهتم بيهم
انا اللى بسأل عليهم
ماحدش بيسأل عليا
ولو بقى كبرت فى دماغى كدا وقلت تولع الدنيا فى دماغ الكل واخد بعضى مع بعضى وابعد عن كل الناس
عارفين ايه اللى يحصل ؟
يزعلوا وانتى ازاى موش تسألى علينا
والاقى مليون ازاى طلعت فى وشى كدا زى مدفع رمضان
اه صحيح بما اننا داخلين على رمضان فاقول لكم كل سنه وانتوا هنا فى مصر
وادعى ربنا انى انا موش ابقى هنا فى مصر
انا بكره مصر
بكرهها اوى
وبالعن اسلاف اللى جايبينها
اصلى كل ماحد يكلمنى يقولى البلد دى احسن من غيرها
طيب والنبى على زمه ودين وطبعا انا عارفه ان زمتكم استك مطاطى اوى من بتاع زمان
دى احسن من غيرها فى ايه
لاتعليم نافع
ولاحب نافع
ولاحقد نافع
المشكله ان الشعب ابن التيت دا موش نافع فى اى حاجه غير انه يقول احنا كنا
وكنا وكنا وكنا
كله ماضى وبس
عمركم سمعتوا واحد بيقول هنكون
انا موش بعملكم احباط ولاحاجه انا بس بأرغى مع نفسى
انا عارفه ان مفيش حد هيقرأ اللى انا بكتبه دا بس موش مهم

الأحد، 9 أغسطس، 2009

مين غير عنوان

بصوا بقى ياجماعه كنت عاوزه فى الاول اعرفكم بيا بس اللى حصل انى لقيتنى بكتب الاغنيه اللى عمال شغاله فى راسى الناشفه دى من 5 ايام تقريبا
عماله ياخواتى تتكرر وتتكرر كدا
المهم انا واحده
ماحدش يقول امال انتى واحد يعنى بلاش غتاته من اولها كدا
انا بحب الكتابه اوى موش بكتب كلام موزون ومقفى وسجع وحاجات كدا بكتب اللى بفكر فيه وبيجى على بالى
يعنى من الاخر كدا اللى يلاقى نفسى تاه منى يتصل بالملكه اللى هى انا طبعا وانا هابعتله عسكرى كدا من القصر يجيبه من ..........ولابلاش اغلط من اولها اصلى انا لسانى طويل اوى
عموما احيانا هتلاقونى بكتب فى السياسه على ادى طبعا واحيانا ادب
اللى انا موش عارفاه خالص يمكن ربنا يكرمنى كدا ويعطف عليا عم ادب ويدينى 3 او 4 كيلوا كدا
اصل مامتى دايما تقولى اصلى انتى اصلا موش متربيه وقليله الادب
والله ياجماعه نفسى اقابا انكل ادب دى واتخانق معاه وافرج عليه امه لااله الاالله واقوله ازاى هو موش يدينى منه شويه كدا ييجى ملو حلتين تلاته
اهو احطهم فى عين الست امى واقولها اهو عندى ادب
يلا بقى اصلى الست دى امى بتنادى
هاروح اعمل الغدا وارجع اغلس عليكم تانى
ماحدش يقول اجى اتغدى دا انا هاعمل صينيه بطاطس واحرق شويه رز وكان الله بالسر عليم
باااااااااااااااااااى يابشر

اااااااااااااااه منها الايام

ااااااااااااااااه منها الايام بتفرحنا ساعات وبتجرحنا ساعات وبترمينا لفين؟
ااااااااااااه منها الايام دايره مافيش حسابات اسئله بلا اجابات واحنا ادينا عايشين
دنيا وزى رهان او دور بيدور على كل الناس
تضحك تاسى زى ماترسى نصيب مكتوب وخلاص
واللى فى ايدنا نجرى ونحلم جايز تضحك لنا قدام
ااااااااااااااااااااااااااه منها الايام!
ااااااااااااااه م الظلم ياناس!
قلوب مافيهاش احساس والطيب ينداس ومالوش حق يعيش
اااااااااااااه م الظلم ياناس!
دنيا وبالمقلوب اسيه على المغلوب توعد وماتوفيش
دنيا وزى رهان او دور بيدور على كل الناس
تضحك تاسى زى ماترسى نصيب مكتوب وخلاص
واللى فى ايدنا نجرى ونحلم جايز تضحك لنا قدام

اااااااااه الاغنيه دى بحبها اوى بحسها اوى
عارفين ان الاغنيه دى حال كل الناس اللى حوالينا