BLOGGER TEMPLATES AND TWITTER BACKGROUNDS »

الأربعاء، 11 نوفمبر، 2009

مع نفسى ..اهو كدا بقى.


اقولكم ايه؟؟؟؟
اه افتكرت اصل انا عاوزه اتكلم عن
الشتا .
من زمان وانا عماله اقرأ
بوستات تتكلم عن الشتا وانه فصل ماعرفش ماله وماله.
ووالله الشتا دا مظلوم معاكم .
دا انا بحبه موت.
ايوه بحبه .بحس لما بمشي فى المطر ان انا باخد شاور رباني كدا ,شاور بيغسلنى اوى من جوه ,بيغسل روحى وقلبي,صحيح معاكم ببقي ميته من البرد لكن الدفا اللي بحسه جوايا بيهزنى اوى وبيعملى رعشه كدا بحبها اوى وفى عز الصيف بحلم بيها.
احكيلكم عن زكرياتى مع الشتا.
بيت عيله فيه جزء كدا للطبيخ والغسيل
والخبيز وبما ان انا بنت فلاحين فكانوا بيخبزوا فى الفرن البلدى (الطينى)وكانت اوضه الفرن دى طول الوقت وفى عز امشير وطوبه بتبقى دافيه وكنا نتجمع كدا فيها ونقعد على القش ,اه وربنا كان بيدفينا اوى ونهزر ونلعب ونأزأز لب ونعمل فيشار,وايه كانت تبقى هيصه كدا .بيت العيله دا كنت دايما تحس ان فيه فرح من كتر الدوشة والكلام والناس الكتير اللي كانوا فيه(كل واحد منهم بقى فى طريق دلوقتى)
يالله دنيا!!!
المهم كنا فى اول الشتا كدا ,قش الارز ييجى من الغيط ويحطوه على السطح وكنت انا مغرمه مذاكره على القش ,
كنت بروح
المدرسة فتره مسائيه فكنت اصحى اول الشمس ماتفتح عنيها كدا واجرى على السطح اذاكر على القش ولما اتعب انام كدا فى شمس الشتا الحنينه اوى واقفل عنيه والاقى جفونى لونها احمر من جوه وانا مغمضه ابقى شيفه لون احمر جميل اوى ولسعه الشمس لوشى كانت تجنن .
هههههههههههههههههههههههه
انا كنت
دايما مفتريه كدا وقويه ههههههههههه اه والله فى مره جايين من الكتاب انا واخويا خالد حبيبي ربنا يرجعه بالسلامة يارب وبعدين كان معايا 10 قروش رحت رمياها فى المايه المطينه فى الشارع وقلتله هاتهالى ياخالود ,حبيبي انحنى عشان يجيبهالى قمت ايه زقيته ,اه وربنا زقيته,وفطست من الضحك عليه وهو لونه كله اسود بسبب الطين هههههههههههههههههههه,موش بقولكم مفتريه.
المهم انا بحب
الشتا اوى وبحب ليله الطويل لانى كائن ليلى .
يلا سلام .

22 التعليقات:

فكرة من الزمن ده يقول...

انتي بجد مفترية
اوعي تديلهاالعشر قروش ياخالود حلال عليك
على الاقل اكتر من التلات قروش بتوع المصرية للاتصلات

بنت قلبى يقول...

قلت مفتريه محدش صدقنى
انا مهمنيش من دا كله غير اخوكى علشان اسمه بس يا شيخه حرامى عليكى والله
الشتا دا ما احلاه وانتى تحتيه تحس ببرده وتحسى انك طفله اوى تحتيه
وعلى فكره بقا انا ليا قرايب من كر الشيخ
وانا من ميت العامل لو تعريها بقا
هتوحشنى اووووووووووووووووووى

دموع كابر يقول...

مساء الخير
انا مدونه لسه نونو ويسعدنى انك تشرفينى وتزورينى

الشعب لابد له من حكومه تشكمه يقول...

الشتا ده حبيبى حبيبى بتحول فيه هههههه مش لمصاص دماء بس تلاقينى كده هاااااااديه ومسهوكه ههههههههه نفسى افهم ليه..
انا كائن شتوىىىىىىىى مع انى ببرد بسرعه بس احب امشى فى الشارع والدنيا بتمطر وتلاقى كله بيستخبى وانا ماشيه فى وسط الشارع ولا بيهمنى:)

ذكرياتك مليانه دفى على فكره

الأحــــــ إيناس ــــــزان يقول...

هههههههههههههه

ازيك يا مفتريه

وحشتينى قووووووووووووووى
اخبارك ايةةةةةةةةةةةةةةةة

الأحــــــ إيناس ــــــزان يقول...

يا اختشى ابقى كبرى الخط شوية حرام عليكى


عاااااااااااااا
النظر راح والعضمة كبرت
كح كح كح

الأحــــــ إيناس ــــــزان يقول...

بجد فكرتينى قووووووووى بنفسى كلامك جميل قووى عن ذكرياتك للشتا
انا والله زيك خالص مالص

كأنك اتكلمتى عنى


اموووووووووووووووووووووواة

أميرة علي كوكب مهجور يقول...

اللهانا عايزة عيش من ده انا عايزة من ده يا حزونبل انا عايزة من ده :)
وياسلام لو في مش :)

الشتاء ده بجد جميل وايله اجمل وهادئ
انا ياما وقعت في الطينه من غير ماحد يزقيني :)

مسدس صغير يقول...

شفتى مذاكرة القش وصلتك لإيه؟؟
ههههههههههه
وانا اقولك بلاش مذاكرة ع القش
مفيش فايدة
راسك ناشفة
انتى خالتى صحيح بس الحق يتقال
ههههههههه
بجد ذكريات جميلة
ياريت الايام دى ترجع تانى
ههههههه
وميبقاش فيه نت ولا حاجة
بقى داليا اه وانا لا؟؟

لاسع افندى يقول...

مش عارف اقرا
كبروا الخط راعوا ظروف عواجيز المدونين



تحيه لاسعه

لاسع افندى يقول...

مهما تقولى عنه مش هحبه ابدا
يحيا الصيف


تحيه لاسعه

Lady E يقول...

حلوة أوي الذكريات دي

ما عدا الذكرى بتاعت انك زقيتي أخوكي :)

بجد الشتا أو الصيف حلوين باللمة الحلوة

دمتي بخير يا أحلى سكرة وأحلى ساسو :)

!! a7mad sala7 !! يقول...

:)

شاب فقرى يقول...

مش عايز اقولك لو كنت مكان خالد كنت عملت ايه

ههههههههههههههههههههه

الاغنيه جامدة

انا كمان بعشق الشتا

ليه دايما بتحطى الاغانى اللى بحبها اوى او بحسها اوى

ماشى ماشى

صبرك بالله

شاب فقرى

blackshwak يقول...

لذيذ جدا البوست ده
وكلامك عن الشتا كمان وعن عيشة القريه والناس الفلاحين كل ده أنا عيشته وبالذات
التجمع العائلي اللي يخلي الواحد يبقي متمسك بإيديه وسنانه إن اللمه دي متنتهيش حتي ولو هتطول لحد الفجر
أيام جميله
بس إنتهت

قلـّبتي عليا المواجع

سلااااااااااام
بالتوفيق دائما

blue-wave يقول...

جميل الشتا
بس انا بحبه علشان حاجه تانيه خالص
الدفا تحت اللحاف:))
تحياتى

رحــــيـل يقول...

هههههه
لا بجد مفترية وسكتلك ماخدش حقه
بس تعرفى انا كمان كنت مفتريه وانا صغيرة هههههههههه
الشتا ياستى كنت بحبه زمان زمان بقى
الوقتى مبقتش بستحمله بيجيبلى اكتئاب بس بحب شمس الشتا جدا برضه

Heba Gamal Emara يقول...

سكرة
ازيك
انا وعدتك انى هاجى وانا اهو
جيييييييييييييييييييييييييييييييييت
حقيقى انا بحب فصل الشتا جدا جدا دونا عن باقى الفصول بعده الربيع وبعدين الخريف مبحبش الصيف الا فى المصيف

اوحش حاجه فى الشتا هو لما تضطرى تقومى من النوم بدرى وانتى تحت اللحاف علشان تروحى الجامعه
ياااااااااااااه
احساس سخيف
انما باستثناء كده
بحب الدفا وقعده التلفزيون
وبحب كوبايه الكاكاو الدافيه فى عز البرد وبحب شمس الشتا الحنينه

وبحبك انتى كمان وبحب موضوعاتك

نورتى مدونتى لما جيتى
ومستنياكى تانى

همس الاحباب يقول...

هههههههههه
ايه الافترا والجيروت دى كلها
يا بنتى كفاية انه اسمه خالد
حد يعمل كده فيه
بس ان زيك من هواة الشتاء
وخصوصا فى الصعيد ولمة العيلة والدفا ومص القصب فى الشتاء رائع جدا
ذكريات بقى
ذكرتينا بالذى مضى
تحياتى

يوميات الحارة يقول...

ههههههههههههههههه
جميلة مشاعر الماضى وموقف الشر مع اخيكى
لكن لكل فرد اقتناعه بجمل فصل ما ليس لما فية من جمال ولكن لما فيه من شعور ودفء عائلى
وهو ما يتوفر دائما فى فصل الشتاء
حيث تتجمع الاسرة وتلتف الاجساد والايادى لتحيط الاكواب السخنة لتعبر السخونة وتنتقل فى الجسد اعتقد انى اهوى هذا الفصل ليس للبرودة او المطر فلا احب ما يقيد حريتى
لكن اعشقة فى الاحساس الاسرى والذى سرعان ما يتحول ويختفى كاختفاء تلك الفصول

شفـقــة و إحســــان يقول...

ده ايه الذكريات الجميلة دى " حبيتك فى البرد نطرتك بالشتا"
والله فكرتينى بفيروز واغنيتها عن الشتا
انا كمان بموت فى الشتا علشان الواحد بيدفا وينام بدرى اهو احسن من الحر والتلزيق والعرق
ياريت كل الايام تبقى شتا
بس بطلى افتراء وبطلى تزقى اخوكى فى الطين
تحياتى شفقة

sookra يقول...

فكرورتى

مبروك عليكى اول تعليق
لاوحياتك على مين اخدتها وجبت بيها خد الجميل من ورا ماما طبعا
تعرفيه لو تعرفيه هاجيبلك واحده
هههههههههههههه
================================
بنت قلبى

ريتاج الاموره
اه وربنا مفتريه جدا
معرفهاش بس اهلا بيكى
كر الشيخ ايه يامفتريه
كفر يابت
سلامه قلبك من الوجع ياقمر
وانتى كمان هتوحشينى
===============================
دموع كابر

ايه دا داانتى لسه نونو خالص ياشيخه انا بقى عندى 300 سنه
هههههههههههههههههه
ربنا يوفقك
=================================
الشعب شيما

ايه يابت
فينا كتير انا كمان ببقى ماشيه فى المطره كدا ولاهاممنى بس اروح بقى وعينك ماتشوف الا النور من عمايل الحجه امى
ربنا يخليهالى وتطلع عنيا كدا على طول
اموووووووووووه
وحشانى
================================
الاحزان ايناس

ارحمى نفسك من الاحزان بقى
خلاص الدنيا هتضحكلك قريب
ربنا يارب يسمع دعواتى
وانتى كمان وحشانى
والشتا قالى انه بيحبك
===============================
اميره على كوكو فاضى

مستنياكى زى مااتفقنا وهاخليكى كمان انتى اللى تخبزيه
يلا اعلمك حاجه للزمن قبل مااموت
واوعى تنسى المشبك
هههههههههههههههههههه
=================================
مسدس مايه صغنون

ازيك ياابوصلاح
فاكر صلاح اللى فى فيلم صغيره على الحب
هههههههههههههههههه
اه وربنا مذاكره القش دى كانت حاجه تانيه
من اول مابقيت اذاكر على مكتب ياخويا وانا هاتك ياسقوط
هههههههههههههههه
===================================
لاسع افندى

تحيه لاسعه طايره حايره من هنا لهناك
خليك ياخويا فى الصيف الملزق بتاعك
=================================
lady e

منوره ياقمر
ومبسوطه انها عجبتك
ميرسى لزوقك
بس انا قلت ان انا مفتريه
هههههههههههههههههه
===============================
a7med salah

والنبى ياخويا مافهمت الوش دا بيعمل ايه
اصل اختك مالهاش فى الرموز
بس هاحاول اخده على انه وش بيضحك
ماشى
================================
الجوووفقرى

ازيك يابنى وعامل ايه
سيبك انت انا عارفه لو كنت مكان خالد
كنت جبتنى من شعرى وغطستنى فى الطين
ههههههههههههههههههه

ادينى صابره اهو
================================
Blackshwak

اولا مرحب بيك عندى هنا فى بيتى
ثانيا معلش انى قلبت عليك المواجع
ولايهمك نفض هدومك وقوم زى البت شيما مابتقول
==============================
blue-wave
حلوه اوى الموجه دى
كويس انك موش بتطلع من تحته اصل ممكن الموج ياخدك بعيد
نورتنى

================================
رحيل

كدا بقينا اتنين مفتريين
اه طبعا سكت
حبيب قلبى خالود دا بموت فيه وفى طيبته
عمره ماحب يزعلنى مع انى دايما كنت بعمل مصايب كتير
دا انا يابنتى فتحتله دماغه مرتين
سيبك انتى ولااكتئاب ولاحاجه
تعال عندنا وحنون تنسيكى البرد والشتا وكل حاجه
===============================
هبه جمال عماره

انتى اللى نورتينى ياقمر ومستنياكى على طول
شكرا ليكى على الزياره دى
ابقى تعالى يابنتى دا انتى صاحبه بلوج
هههههههههه
================================
همس الاحباب

استاذ خالد معلش بقى
اصل انا مفتريه
واهلا بذكرياتنا الجميله
وحلوه مص القصب دى كانت برده بتحصل فى لمتنا بس انا موش من هواه القصب
نورتنى ياابوشابى
=================================
يوميات الحاره

حلو كلامك اوى بجد
وموش لاقيه رد عليه غير ان ربنا يسعد ايامك
ونورتنى اوى

===============================
شفقه واحسان

حلو اوى كلامك بس انا موش هاابطل افترى
هاافترى على جوز المستقبل وعلى العيال كمان
نورتى ياشفقه