BLOGGER TEMPLATES AND TWITTER BACKGROUNDS »

الاثنين، 30 نوفمبر، 2009

افرح اغنى احزن اغنى.


أولا :احب اشكر كل الناس اللي بيحاولوا يطلعوني من اللي انا فيه.
=============================
لكن اسمحولى اسألكم سؤال وياريت كل واحد فيكم يرد بمنتهى الصراحة.
هل ياترى لو علمتم كم الاخطاء التي فعلتها
وكم المرات التي جرحت فيها نفسي
وكم الذكريات المؤلمة التي احيا بها
وكم عدد من اقتربوا ولكن ذهبوا
ولكنهم لم يذهبوا فى سلام
فقد ذهبوا بعدما القوا حجر فى قلبي
هل لو علمتم كم السذاجة التي كنت احيا بها
لو علمتم كم الاستهتار الذى عرضت نفسي له
لو علمتم ما يحدث لكل من اقترب منهم
لو علمتم اننى كما قلت عنصر كيميائي نشط
اذا ما حاول التفاعل نتج عنه انفجارات وانشطا رات
لو علمتم انني اقترب من الناس بدون اي شروط وبدون اي اعتبارات
هل ستسمروا فى انكم تريدون ان استمر معكم وفى دنياكم؟
سؤالي هذا موجه لكل من يحاول ان يساندني
هل تفعل ذلك بحب بعدما اخبرتكم انني لست ملاكا
نعم انا لست ملاكا
قال لي شخص انني اخدعكم
وانكم لاتعر فونى كما يعرفني هو
الان اقول له
انا لا اخدعهم
انا اقول لكم بكل قوه
انا لست ملاكاااااااااااااا
ولست ايضا شيطانا
كل منا يحمل بداخله
خير الملائكة
وشر الشياطين
وانا احمل بداخلي الاثنين واضف اليهم
سذاجه الاطفال وجنانهم.


افرح اغنى
احزن اغنى
اتعب اغنى
دايما بغنى
الدنيا دايره غصب عنى
فى ايديا ايه غير انى اغنى؟
الغربه فينا
جوانا او برانا فينا
تنده علينا تجاوبنا ايامنا الحزينة

يا حزن ليه ساكن ملامحي وبقيت كأنك حته منى



18 التعليقات:

blackshwak يقول...

يا حزن ليه ساكن ملامحي وبقيت كأنك حته منى

عجبتني دي أوي
قولتي راجعه تاني ومرجعتيش
أشكرك علي متابعتك وتعليقاتك

ربنا يديم الخير بينا كلنا
بالتوفيق دائما

donya يقول...

مساء الخير

لسنا ملائكه
خلقنا الله لنعبده
ونغلط نستغفر يسامحنا
ولسنا ملائكه

ولا نقدر ان نحاسب بعض ربنا بس هو اللي بيحاسب فقط

اكتب مافي قلبك لايقدر احد ان يسكت قلب يكتب

تحياتي

الشعب لابد له من حكومه تشكمه يقول...

اولا موبايلك مقفول...

ثانيا: ومين فينا مش فيه اى حاجه من اللى قولتيها...

ثالثا:
مين قلك اننا ملايكه تمشى على الارض اى انسان ليه عيوبه واى انسان حتى لو كان مين ليه برضه مميزاته...

انتى حد جميل ياساسو ,متخليش حد يفهمك غير كده... احنا شوفناكى واتعاملنا معاكى مشوفناش غير انك حد جميل,اوعى تخلى حد فهمك حاجه تانيه غير كده,سامعه؟

مش عاجبنى خالص مودك اللى انتى فيه لانك بتغرقى نفسك فيه اوى ,انتى نسيتى ولا ايه مش قلنا ننفض هدومنا ونقوم.

حتى لو عملتى اخطاء وتعبتى وووووو مش خلاص دا كله عدى وانتهى وفات,خلاص اعتبرى ان اللى جاى صفحه بيضا وشكلسها وارسمى فيها اللى انتى تحبيه وغيرى اللى نفسك فيه.

وافتحى موبايلك علطول بلاقيه غير متاح ودلوقتى مقفول.

Mo7ammed يقول...

عادى ياساسو
كلنا فينا الخير والشر
مش جديدة يعنى
طب تصدقى انا مرة فكرت اقتل وكنت على وشك اقتل اخويا فى مرة
عادى عادى
كلنا ولاد ستين فى سبعين من جوا
المهم ان اللى جوا ميطلعش برة

واحنا بنحاول نعمل ايه فى حياتنا يعنى ؟
نبقى سعداء
كتير مننا عندو مصايب وكتير عايش فى نعيم
لاده عاجب ولاده عاجب
مفيش احسن من كلمة الحمدلله
وكل ماتقوليها قومى اغسلى وشك وابعدى عن اى حاجة تفكرك باللى بيضايقك
ان شاء الله لو كانت اغنية ولا صورة ولا حتى خبر فى جرنان

انا للأسف بحب انصح واعمل فيها فيسلوف بس اكتشفت انى اهبل و برغى عالفاضى

بصى محدش بيموت ناقص عمر
لو انتى متعذبة دلوقتى
هتفرحى قدام
لو مش هتفرحى قدام
حطى املك عالجنة
وهتفرحى على طول ان شاء الله

اتمنى مكونش تقلت عليكى رغم انى عارف انى مقلتش كلام جديد
بس اهه
مش قادر اقاوم رغبة الرغى اللى جوايا

يلا سلاااموءاا

فراشة يقول...

السلام عليكم

مش عارفه أقول ايه بس فعلا محدش فينا ملاك نقي

كلنا ناس نختلف في درجة طيبتنا وفهمنا للأخرين

بتقولي انك كل ما بتقربي من حد بيحصل جرح ... ممكن تكوني مش بتختاري صح وممكن يكونوا مش بيفهموا اسلوبك دا

انتى بتحبي تقربي قوي منهم وغالبا كل الناس دلوقتى بتحاذر انها تقرب لحد
يعنى هم بيكتفوا باللي عندهم مش بيكونوا عايزين اصدقاء جدد يمكن

كل شيء جايز
بس اللي أكيد انك انسانه جميلة
بتحبي بجد عشان كدا بتنجرحي قوي
مش هقولك متحبيش عشان لسه فيه ناس ينفع تتحب

بدعيلك من قلبي تقابلي ناس تحبيهم ويبقوا احسن صحاب واحسن ناس وميجرحوكيش ابدا ابدا

"منى"

مي يقول...

اااااااااااااااااااه احنا معاكى مهما كنتى وهتكونى احنا عرفنا عقلك وعشنا حكاياتك وبنقبل اننا نكون اصدقائك ياريت تقبلى انتى ولا هتطنشىىىىىىىىى بقى يابنتى كلنا لاملائكة ولا شياطين بس فين الخير والشرررررررررر
من منكم بلا خطيئة فليرجمها بحجر
ده اللى تقوليه
بسسسسسسسسسسسسس المهم انتى تستمرى زى ما انتى محدش يوقفك ولا تحاولى حد يوفقك خليكى قوية وانسىىىىىىىىىى وارمىىىىىىىىىىىى
وهستناكى

خواطر شابة يقول...

سأجيبك بصراحة وبمنتهى الوضوح
كل ابن أدم خطاء وخير الخطائين الثوابون فلا تبتئسي من كان منا بلا خطيئة فليرمك بحجر
ومع كل ما قته الحياة لاتنتهي بالنسبة لنا مادام فينا نفس يطلع بمعنى يمكن دائما ان نفتح صفحة جديدة وأن نبدأ من جديد
أطردي الحزن الساكن في ملامحك ودعي مكانا للفرح
تحياتي لك

Baskouta يقول...

سكرة كلنا كدة
انا عن نفسي حاسة اني كدة
حاجات كتير مؤلمة سببتها لنفسي وساذجتي واندفاعي في اوقات كتير سببولي الام كرهتني في الحياة... بس اللى مصبرني اني سببت الم لنفسي اه لكن حاولت على قد ما اقدر ما اتسببش في الم لحد
انا بقولك كدة علشان بس تعرفي ان كلنا كدة
محدش فينا ملاك
اوعي تحسي انك مختلفة او انك بتخدعي حد
كل حد فينا حياته فيها جوانب هو نفسه كارهها لكن في كمان حاجات حلوة بتخلينا نستمر في الحياة
تحياتي يا سكرة السكرة

شاب فقرى يقول...

شكلك عايزة تعيشى وتغرقى اكتر فى الحزن بلا سبب وكان لو كل واحد فينا سأل نفسه كدا كل المشاكل فى الكون هتتحل

فعلا تصرف غير منطقى
================

مفيش رد

هعتبر دا رفض

وهنسحب فى هدوء

ربنا يحميكى

شاب فقرى

فاتيما يقول...

سكرتى
صباح الخير عليكى يا حبيبتى
بصى انا لما قولتلك مرة
إنتى بتفكرينى بنفسي بس على صغنن مكنتش بنجم
و لا بقرى الغيب
كنت بتكلم عن ثقة و احساس قوى
ربطنى بيكى و شدنى ليكى
و كل مدى بتأكد من ذلك
يا حبيبتى انتى وصفتى حالة مريت بيها بعد سنة تقريباُ من التدوين
حسيت انىفيها مخبية تفاصيل مهمة فى قصتى انا و يوسف و محدش عارفها كتير
و الناس عمالة تشكر فيا و يقولوا كويسة و ام هايلة و بتاع ...
ضميرى وقتها وجعنى
و قلبى كمان و حسيت إنى بخدعهم
رغم احتياجى الرهيب لكل القلوب دى حواليا و طبطباتهم
لكن حسيت انى بخدعهم بجد و مبقولش حقيقتى كاملة ..
كتبت بوست التغريبة و حكيت فيه كل حاااااجة من طقطق لسلامو عليكوا ...
قولت نفس كلامك
لا انا ملاك
و لا انا شيطان
انا انسان عادى خالص
اللى حاببنى اهلا بيه
و اللى مش عاجبه خلاص
انتى دلوقتى بتقولى كلام مشابه
يا حبيبتى لو عرفنا
قد اللى نعرفه عشر مرات صدقينى مش هتفرق معانا
لأننا بنحب ساسو سكرة اللى شوفناها بقلوبنا قبل عيونا
و اللى كلامها مسنا
زى ما كلامنا له صدى عندها
بصى مش بحرضك .. صاحبتك دى قاسية فى حكمها قوى و سكوتها أحسن متركزيش معاها قوى الأيام دى
بس دى حقيقة
كل خطأ أو قلق او مشاكل
او انك عنصر نشط و بيعمل مشاكل مع أى حاجة تقابله ..كل دا لا يمس احد أكتر منك و مفيش حد بيتعذبلك اكتر من قلبك
لا تقسى على نفسك يا بنتى
يكفيكى مانت فيه من ضغوط
محدش له عندك حاجة
انتى مبتاخديش حاجة من حد
و لا بتتكى على حد
و لا بتأذى حد
كونك بتأذى روحك
و الناس تزعل عشانك دا منطقى
لكن هيزعلوا عليكى اكتر منك و يبقوا ملكيين اكتر من الملك ؟؟!!
إسمحيلى يعنى يبقى حرام قوى
و قلبك يا بنتى هيشيل إيه و لا إيه كفاية هم نفسك عليكى
فاتيما اختك الكبيرة و اللى على بعد عشر سنين منك عن خبرة و دراية كافية ...بتقولك
حبى نفسك يا حبيبتى
اكتر شوية من كدا
و طبطبى على نفسك اجمد شوية من كدا
و فكرى فى نفسك احسن شوية من كدا
و ملكيش دعوة بينا يا ستى
احنا عدينا سن الرشد من زماااان و عارفين كل حاجة و محدش بيضحك علينا
عارفين إننا بنحبك
و انتى على قلبنا زى العسل
زعلانة متعصبة مقموصة مخنوقة مش طايقة روحك و لا طيقانا ..
إحنا راضيين
إنت حاشرة نفسك وسطينا ليه؟؟؟
سيبنا مع سكرتنا الحلوة اللى بنحبها و إطلعى إنتى منها
إفرحى غنى
و احزنى غنى
هنغنى معاكى
غنوة فرح و غنوة حزن
فى الحالتين إحنا بنحبك يا حتة سكر تحلى الخمس محيطات

beautiful mind يقول...

سكره
ومين قال اننا احنا كمان ملايكه
كلنا بشر
لازم نغلط ونغلط كمان ولازم نتعلم من غلطنا دا
كل واحد فينا عنده همومه وعنده اخطائه
اللي شايلها فوق كتافه
اوعي تخلي حد يحبطك
او حد يهزم روحك
خليكي دايما انتي ي المكان اللي انتي عايزاه
وربنا معاكي
تحياتي اليكي

Heba Gamal Emara يقول...

بصى انا مش عارفه اقوللك ايه
بس اللى انتى بتعمليه فى نفسك ده كتير اوى اوى
متخليش اى حد فى الدنيا يهز لك ثقتك فى نفسك
واقتنعى بنفسك كما هى
واحتفظى باصدقاء كونتيهم ولا تتخلى عنهم ابدا
ربنا معكى ويقويكى
ويا ريت ترجعى تانى سكرة بتاعت زمان اللى مفيش اى حاجه تهز لها ثقتها بنفسها طالما ان ضميرها مقتنع باللى هى بتعمله .....

snohe يقول...

كلامك فيه تهور وبعض الغرور والقليل من الندم -ولم الاحظ حزن

اعتقد انه يجب التفكير اكثر من مرة قبل الاقتراب

'' حطام (ك) بقايا '' يقول...

يا حبيبتي
ليه بتقولي كده
احنا لما حبيناكي حبيناكي لانك انتي انتي
كل واحد بيمر باللي انت بتمري بيه دلوقتي
كل واحد بيكون هنا مختلف عن هو بره النت
يا حبيبتي
كل واحد فينا مش ملااك
مفيش بني ادم ملاك
و طبعا مش معناه انه شيطان
احنا معاكي و هنفضل معاكي
ولو انتي بعدتي فكوني على يقين اننا دايما معاكي
متسبيش حد يقولك انك بتخدعينا
لانك لو كنتي بتخدعينا زي ما بيقول مكنتيش هتعملي البوست ده نوهااائي و مكنتيش هتحسي بالاحساس ده اصلا
لازم تعرفي ان كل واحد فينا عرف ناس و سابوه او سابهم ايا كان و ذهبوا لكن بدون سلام وده مش معناه انه شخص وحش
ابدااا
يا حبيبتي كلنا بنغلط
و كلنا ساعات بنجرح
و كلنا و كلنا و كلنا
يا حبيبتي خليكي قوية و احنا معاكي في كل الظروف

كوكي

Tamer Nabil يقول...

مفيش انسان ملاك

بس اكيد الانسان مهما يغلط او يخرج عن طريق لايرضى عن نفسة فية

اكيد هيقدر يخرج منة


الامر محتاج ايمان وقوة ارادة

ربنا يوفقك ويكرمك

مع خالص تحياتى

واحدة مفروسة يقول...

مين ده اللى بيحاول يطلعك من اللى انتى فيه ده؟؟
قوليلى عليه
ده انتى فرستيني بكلامك

Somaya Kamal El Din يقول...

مهما تقولى
انا شخصيا مش هسيبك او اتخلى عنك لو احتاجتينى فى يوم
تعرفى كلامك ده كانه بيتكلم عنى ويمكن اقل يمكن اكون اكتر ن كده بس محدش يعرف ويمكن اكون انا نفسى معرفش

صدقينى كلنا بنغلط وبنعمل اكتر
بس يمكن انتى قلتى كده شجعاة منك بالاعتراف او لانك اتضايقنى من احساس انك تخدعينى زى ما حد قالك

بجد انتى بتاسى اوووى على نفسك
كنت فاكرة نفسى بعذبها بس يا بنتى انتى بتقتليها ارحمى نفس شوية بجد

هونيها تهون

MOHAMMED ELBANNA يقول...

سكره
كلنا عندنا اخطاء والاهم هو اصلاح الحاضر وعدم الندم على الماضي .
( لا مستقبل لمن يضيع الحاضر حزناً على الماضي )
محمد البنا
طريق النجاح
ــــــــــــــــــــــــ
اتمنى تزوريني على مدونتى طريق النجاح
http://tareekelnagah.blogspot.com/