BLOGGER TEMPLATES AND TWITTER BACKGROUNDS »

الخميس، 5 نوفمبر، 2009

امبارح


قريه الصيادين

على البحر فى الماكس

بيوت خشب

مسجد الماكس

الفراشه دى جرينا وراها كتير عشان نصورها
وحرووف كانت عاوزانى امسكها لكن انا رفضت
لان اقل لمسه ممكن تقتلها وانا بعشق
الفراشات

دى برده قريه الصيادين

ودى كمان

ودى كمان

ودى كمان

دول الصيادين اللى كان معاهم الكلاب

القطه دى عجبتنى اوى
بحب القطط وكان عندى قطه وماتت
حرووف عندها قطه



اولا احب اشكر حرووف واسكندرانيا جدا على ترحيبهم بيا
اليوم بدا ان كان عندى امتحان فى الاكاديميه البحريه فى ميامى وبعدين الامتحان اتكانسل
وبما انى كنت معرفه حرووف واسكندرانيا انى رايحه فكانوا عاملين حسابهم ومستنينى
المهم اتكانسل الامتحان واتصلت قلتلهم وعشر دقايق وكانوا عندى قدام الاكاديميه
وركبنا رحنا بحرى ومنه رحنا الماكس ورحنا قريه الصيادين اللى فيها البحر ماشى وسط البيوت واكلنا شيبسى وشربنا بيبسى ولعبنا واخدنا صور للقريه وتحس وانت فيها انك فى مكان اثرى مكان كدا زى مايكون فيه روح معينه حاجه كدا بتشدك اوى
حرووف بتخاف اوى من الناس لما بتبقى فى مكان هادى اوى كدا
وكانت طول الوقت تقول ممكن ننخطف هنا ولاحد يحس بينا
هههههههههههههههه
كان فيه واحد ماشى ورانا وانا اصلا قلبى ميت ماكنتش خايفه حرووف واسكندرانيا كانوا خايفين ومشوا بسرعه جدا وهما بيقولوا لبعض الحوار دا بصوت عالى عشان اللى ورانا يسمعه
حرووف:هو بابا مارضيش يدخل معانا ليه؟
اسكندرانيا :موش عارفه.
حرووف :اصله قال انا ماليش فى شغل العيال بتاعكم والتصوير دا.
اسكندرانيا :هو قال هيستنانا فيه؟
حرووف :تقريبا على الرصيف التانى يعنى هيلف ويجي لنا.
انا بسمعهم وماسكه نفسى وانا هاموت من الضحك
خرجنا واتمشينا على البحر وعدينا من جنب صخور قريبه اوى من البحر
قلعنا الشوزات بتاعتنا والبحر كان عالى اوى والموج غرقنا لوسطنا
اه صحيح نسيت اقولكم
ان حرووف كانت مصممه تعرف الناس اننا فى كليه فنون جميله عشان لما نصور ماحدش يكلمنا عشان عندنا امتحان تصوير
قلنا نركب مركب
الراجل قال مبلغ كبير اوى ومتخيلنا سواح
ضحكنا ومشينا فى قلب القريه وصورنا صور كتيره
حرووف قالت ماكنتش متخيله انى هاالاقيكى عندك حس فنى كدا
موش عارفه هى شافت الحس الفنى دا فين
المهم
رحنا البحر وعدينا كمان من منطقه كانها صحراء كدا لازرع فيها ولاماء وحرووف تقول هى المنطقه دى حقل الغام ولاايه ؟
ترد اسكندرانيا وتقول تقريبا
ارد واقول شكلكم كدا ناويين تفجرونى هنا ولاايه
نضحك ونمشى برده فى قلب المنطقه دى
لما كنا على البحر كان هناك صيادين جنب الفنار وكان معاهم كلبين شكلهم ضخم اوى
حرووف تصور وانا ماشيه فى الميه انا واسكندرانيا وبنسمع فيروز انا وشادى
هنعمل اغنيه انا وحروف واسكندرانيا
اشمعنا فيروز وشادى يعنى
ههههههههههههه
نغسل هدومنا من الرمل بقزازه المايه اللى معانا وكمان يسيبونى انا الضيفه للاخر والمايه تخلص
وتروح حروف تجيب مايه من عند بيت من البيوت اللى احنا قاعدين جنبها
وفجاه يجى الكلب ويعدى من جنب حرووف وكان هيخبط فيها وهو بيجرى
ونقف نتسمر احنا التلاته خوفا من الكلب
لكن الحمد لله تعدى على خير
ماما تتصل تهزأنى على التاخير ونجرى نطلع نركب اى حاجه تودينا المنشيه
نلاقى عربيه فيها مكان اتنين نركب واخد حرووف على رجلى ونتكلم ونهزر ونضحك
3 مجانين بجد
مجانين اوى كمان
نروح المنشيه وهناك نفترق اسيبهم واركب للموقف وارجع بيتنا متأخر اخد اللى فيه النصيب من الحاجه امى
وتقولى كنتى فين اقلها كنت مع اصحابى ترد وتقول دا انتى بجحه وكمان بتقوليلى انك كنتى بتلفى
قلتلها يعنى اكدب عليكى ياحاجه
المهم تتصل حرووف واسكندرانيا يطمنوا عليا ويقولولى قلقتينا عليكى
طبعا موش هاحكى زى حرووف او اسكندرانيا
هما الاتنين بيحكوا بطريقه حلوه اوى تعيشك معاهم
ودى بعض الصور اللى اخدتها هناك

12 التعليقات:

حرروف يقول...

انا جييييييييييييييييت
اة انا خوافة اية الفضايح دية هههههههه

فين صورة الباب وفين صورتي انا بقا مليش دعوة
بحجز لاسكندرانية الكومنت اللي بعدي ماشي
هههههههه
ربنا يخليكي علي الكلام الجميل دة عني بس هو كان يوم جميل

Saso يقول...

حرووف
صوره الباب حطيتها على بوست تانى هنشره بكره او بعده
اويمكن انشره كمان شويه
اموووووووووووووووه ياروفى

Saso يقول...

تعليق تجريبى
هههههههههههههههههههه

!! a7mad sala7 !! يقول...

ايوة غيظينا بقي
هههههههه

حمدالله ع السلامة :)

Mona يقول...

كويس أنك قررتى تكملى ولا تتوقفى - جدعة شكل المدونة الجديد حلو بس أنا كان عاجبنى الاول برضة أهدى وأرق بس ده حلو برضة - :) take care of yourself

الشعب لابد له من حكومه تشكمه يقول...

اول مره اشوف المكان ده...
جميل انكوت اتبسطتو.
هزعل لو مشوفتكيش حدانا ان شاء الله:)

عمرو يقول...

حلو قوي اللقاء بعد التعارف الإليكتروني. فعلا بيبقى حاجة حلوة قوي
أنا كمان ف اسكندرية اليومين دول, وأحلى حاجة باحبها إن الدنيا تمطر وأنا ماشي على البحر
:)

micheal يقول...

أولا..أحييكي على صورة القطة لأني بموووووت في القطط ونفسي جدا في يوم من الأيام لو عشت وحدي تبقى معايا قطة
:)
ثانيا:صورة الفراشة جميلة
صور قرية الصيادين تغم النفس بجد
ليه سايبين المنطقة بالشكل ده؟؟؟
طريقتك في السرد جميلة جدا ومبروك عليكي الصداقات الجديدة
:)
تحياتي

asadma7bos يقول...

بوست جميييييييل وجديد احييكى عليه
هذا وبالله التوفيق

همســات عــلى ضــوء الــقمر يقول...

صباح الخير ياساسو

غظينى غظينى

انا نفسى كدا التقى بحبايبى :)

بيبقى كدا ليها طعم
وحمد لله على سلامتك

بوست جميل ياقمر

خواطر شابة يقول...

الحمد الله على السلامة وجيد انك استمتعت بوقتك
الصور جميلة تعرفنا من خلالك على المكان
الصداقة شئ جميل الله يديمها بينكم ان شاء الله
مع تحياتي

samamasr يقول...

ربنا يكتبلك كل خير:)