افتح بيبان.

افتح بيبان القلب للهوى

غصب عنى يقفله الهوى

كأنى طير مقصوص جناحه قص

قلقان وموش شبعان نظر ولابص

وازاى يطير والكون بحاله قفص

قفص وله ابوب مقفوله مابينه وبين الاحباب

دى اغنيه لمحمد منير بحبها اوى

=================

تعشق لمسه رجلها للبلاط

تشعر بالبروده فى قدميها وتاخدها من قدمها الى ان تصل الى قلبها

يعترض بشده

لماذا تريدينى ان اصبح بارد مثل ذلك البلاط

تعشق طعم الثلج وتعشق برودته على اسنانها

تحاول ان تجعل بروده التلج تصل الى قلبها

فيعترض مره ثانيه

تحاول

يعترض

دائما هكذا

هى تحاول ان تجعله بارد ليس به اى مشاعر

وهو يعترض بشده فهو يعشق احساسه بالدفا حتى وان كان هذا الدفا للاخرين وليس له منه نصيب

اشعر بالشفقه عليهم بشده

لماذا تفعل هى ذلك ولماذا هو مازال متمسك بكل مايحمل من دفء

اشفق عليهم من زمن لاحياه فيه لتلك القلوب المليئه بالدفء

يابحر

ياااااابحر

حاسانى بغرق اوى

وموش قادره اتنفس

انا جيتلك يابحر عشان ارمى همومى فى حضنك

طيب ليه انت تاخدنى بعيد وتوهنى

انا تايهه اوى يابحر

انت ليه سايبنى اغرق فيك كده

يابحر

بحبك وموش قادره ابطل اغرق فيك

رميت نفسى قلت ماتخافيش هارفعك لفوق

لقيتك بتحبنى وتشدنى اوى لحضنك

انت بتحبى اوى كده

طيب خلاص انا هاستسلم

واسيب نفسى اغوص اوى فيك

اكيد جواك هالاقى امان دورت عليه كتير فى كل مكان

=====================

ضاربه الودع

جات هناك اهيه

انا هاجرى اروح لها اشوف الودع بتاعها هيقولى ايه

ازيك يابنتى

الله يسلمك ياحاجه

اسمك ايه

اسمى تايه منى وانتى؟

انا اسمى مرايه

مرايه ؟!!!!!

دا اسم غريب اوى

بتتعجبى ليه

ايوه مرايه

كل واحد بييجى عشان يشوف نفسه عندى

بقوله اللى عاوز يسمعه

طيب انا اصلا موش شايفه نفسى يامرايه

تعالى وانا احكيلك اللى شايفاه فى مرايتى وفى ودعى

الودع قال :

صبيه حلوه ,عروسه جميله

فارسها ضايع ,بتدور عليه

عاوزه تفرح ,عاوزه تجرى,عاوزه تلعب

بس خايفه زمانها يغدر

..................

المرايه قالتلها كلام

تانى

تعالى يابنتى معايا

هتودينى فين يامرايه

هاوديكى هناك عند الفارس اللى ضيع حصانه

اروحله ليه انا؟

هو مستنيكى تيجى

انا عاوزاه هو اللى ييجى

تعالى معايا

لا سبينى موش جايه

انتى اللى موش عاوزه

انا خايفه

الفارس معاه سيف ؟

لاماتخافيش

سمعت كلامها وراحت معاها

الفارس موش معاه حصان

لكن معاه سيف

قربت منه ,كلمته

خدها من ايدى وفى لمح البصر

غرس سيفه فى قلبها

وظهر وجه الفارس

طلع موش فارس

سابها تنزف لحالها ورحل

دنيا الوشوش.

لو فيا انا انا لو فيا

انساك وعيش بحريه

وشوش كتير فى زحمه الحياه

تقابلنا وشوش

ننساها

تقابلنا وشوش

ماننسهاش

وشوش تخدع

ووشوش تضحك

واهو كله فى دنيا الوشوش

وشوش توشوش بحنيه

ووشوش كلها غدر وخداع

ووشوش بتضحك فى وشوش

ووشوش بتضحك على وشوش

اااه يااانى من كتر الوشوش

=====================

دوروا وشكوا عنى شويه كفايانى وشوش

بقى كام من وش غدر بيا ولاينكسفوش

وعصير العنب العنابىىىىىىىى

نقطه ورا نقطه ياعذابى

ماما دراعها مكسور وحماتى جايالى بكره.

حماتى العسل السكر دى

طيب انا والله مفتريه

عارفانى انا مفتريه جدا

بعد موقف الستاير والسجاد دا

عملت بنصايحكم قبل ماتقولوها فى البوست اللى فات

بعدما تم تنفيذ مااريد

جيت بقى كده بشويه سهوكه ودلع وكلمتين حلوين كده

ومعلش ياماما بس اصل انا عاوزاكى تستنى لما تعرفى لون الجهاز وبعد كده تبقى تروحى تجيبى السجاد والستاير

طبعا الست هديت كده وتخيلت انى موافقه انها تروح تجيبه لوحدها وعلى زوقها

بس على مين

انا وراها وقدامها والزمن طويل

وبقول كل اللى طلبوا منى انى اهدى اللعب معاها واعتبرها ماما

والله انتوا كده بتطلبوا منى انى اعمل فيها البدع لانى مغلبه ماما وخليتها حطت صوابعها

العشره فى الشق منى

يعنى اللى يقول خليها مامتك التانيه يبقى بيكره الست دى من غير مايشوفها

ههههههههههههههههههههه

سبتكم فى الكلام وموش قلتلكم هى جايه بكره تشوف ماما

وتجس نبضى كده فى موضوع التلاجه

ااه صحيح انتوا ماتعرفوش

اصل زوج المستقبل قرر انه يجيب التلاجه

اهو يلا كتر خيره عمل اللى عليه وزياده

هههههههههههههههه

والله الراجل دا امه بتكرهه موووووت

قالتله روح يابنى ربنا يوعدك بمصيبه وكانت المصيبه انا

هههههههههههههههههههه

ضحكنا كتير اسمعوا بجد بقى

هى الست حماتى قالت لمحمد نجيب تلاجه 10 قدم

ومحمد بيسألنى فقلتله مانجيبها 14 وخلاص ودا اللى كنت ناويه عليه

جات حماتى قالتلى 10 قدم

دا انتى وهو وانا بس يعنى موش عيله

وانا؟؟؟؟؟؟؟؟؟؟

بم بم بم بم بم

دا قلبى بيدق هو انتى ياحماتى العزيزه هتعيشى معانا

اووووووووم ايه عرفت انها قررت اخيرا ومنها لنفسووووها انها تغير اقامتها وتبقى معايا فى شقتى

هو انا شقتى فى الدور التالت وهى عايشه مع ابنها الكبير واللى مراته تبقى بنت اختها

وطبعا اولاده عندها فرخه بعشرين كشك

عمرها ماتجيلى غير وسحباهم وراها

ايوووووووووه

وعيال غلسين غلاسه

على فكره انا طبيعتى بحب الاطفال بس الاطفال الهاديه المؤدبه لكن دول عيال غلسه جدا

ببقى عاوزه اشيلهم وارميهم م البلكونه لما بييجوا عندنا بس بستحمل واضحك وكده

واقول ياخراثى على العثل وانا جوايا بقولهم غوروا بقى يخرب بيت كده

ههههههههههههههههه

حماتى قررت تعيش معايا

فى الشقه فى الدور التالت

حماتى مليانه جدا وعندها غضروف فى دهرها وبتحب تخرج كتييييير

هتتحمل تطلع وتنزل كل شويه ازاى

المهم قلتلها دا لو ماشلتكيش الارض اشيلك فوق راسى

وبعدها على طول اروح اجبس رقبتى

هههههههههههههههه

المهم قعدت تقولى اجيبها 10 قلتلها 14 احسن ياماما

فقالت اجيبها كريازى قلتلها توشيبا احسن ياماما

وفى الاخر قلتلها والله ياماما اللى انتى عاوزه تجبيه هاتيه

اهو كله فى بيتكم ولما تبقى صغيره علينا يبقى محمد يغيرهالى

هههههههههههههه

عبيطه طيب ماتجيبى تلاجه كويسه وكبيره احسن من انك بعد سنتين تلاته تغيريها وتجيبى واحده اكبر

هبل هبل

طبعا لما تيجى بكره

اول ماهتشوفنى هتقولى

جرى ايه ياسها الحبايه اللى فى وشك دى سايبه اثر زى البشله كده ليه

اصل انا بلعب فى وشى كتير وبصراحه ببهدله خالص

ههههههههههههه

بس دمى بيتحرق لما بتقولى كده لا وايه تكمل وتقولى انها كانت بتخطبله واحده فى وشها وحمه وهو رفض

امال لما يشوف وشك كده هيعمل ايه

ببقى ساعتها عاوزه اقولها

بصى ياماما انا لو فيا السبعه وسبعين برده انا اجمل من ابنك

هههههههههههههههه

بصراحه ببقى عاوزه اقولها قومى روحى ياوليه انتى وماتجيش تانى

بس الحق هى برده لسه الفلاحه الطيبه والخبيثه يعنى فيها حاجات حلوه برده

بس انا لسه موش شفت الحاجات الحلوه دى

نطلع من اللى فات دا بايه

ياحماتى بكره نقعد ع الحيطه ونسمع الزيطه

وان حماتى من الحموات الفاتنات

وانهم هيجيبوا تلاجه 14 كريازى

هههههههههههه

تتمسوا بخير

====================

ملحوظه

انا كل البوستات اللى جايه خلال الشهرين موش هاكتب نكد خالص

وهاحط صورتى انا وعريسى وخلاص

ياانى ياغلبى.

طيب

ماشى وحياه امى وغلاوتها لازم اوريكى انجوم فى عز الدهر

انا تعملى فيا كده

دا ايه الافترا دا كله

استنى عليا

دا انا بقى اللى كنت بهدد واتوعد كده

تسألونى بتهددى مين ياسكره

دا انتى حتى طيوبه كده وسكره خالص

اقولك بهدد المفتريه حماتى

ماهو انا لازم احرقلكم دمكم معايا

موش اصحاب وكده يعنى يبقى لازم تتحملوا بقى

شوفوا ياجماعه طبعا احنا عندنا الجهاز متوزع على العريس والعروسه كالاتى

العروسه

لبسها -مفروشات-حلل -صينى -ادوات المطبخ كلها يعنى والنيش كمان

الاجهزه الكهربيه كلها

سى الاستاذ العريس

يجيب الشبكه -ومفيش مهر بيبقى ربع جنيه-يجهز شقته-يفرشها بالاثاث

ويجيب السجاد والستاير والنجف

ايوه بقى ماهو يكفى بس انى بجيب انا اجهزه كهربيه تعدى 10000 جنيه

وادوات مطبخ تعدى 10000 زيهم

وملابس ومفروشات

طيب والله انا عندى فواتير كل الحاجات اللى اشترتها ولما حسبتها تعدت ال40000

يعنى ابويا يبيع البيت ويبيع نفسه وكده والعيال عشان يجهزنى

انتوا معايا ولانمتوا ولاايه

المهم لما العريس اتقدم واهلى قالوا بنشتروا راجل والكلام الحمصى دا(سارقاها من عادل ابن فاتيما)

ماعليكم انتوا المهم

خالتكم حماتى ام زوج المستقبل

ذهبت كده منها لنفسها ولا كأنها خاطبه جاموسه او بقره من الزريبه

وراحت اشترت الستاير وقماش التنجيد واشترت السجاد

هتقولولى وفيها ايه

هاولع فيكم واقولكم هى الحاجات دى هتبقى فى شقه حد تانى ولافى شقتى انا

موش المفروض ومن الزوق يعنى ان الحاجات دى تبقى على زوقى انا

سيبكم من دى كمان هى الحاجات دى موش المفروض انها تيجى بعد الاثاث

ولاتجيب سجاد وستاير وبعد كده تنقى الوان الاثاث اللى تناسبه

طولت عليكم

موش مهم

المهم انها جايه قال تفرحنى ومستنيانى ازغرتلها

دا انا هاولع فيها وفى اللى جابوها

قال رضينا بالهم والهم موش راضى بينا

طيب وحياه ربنا لطلعه عليكى بط بط

اسكت انا بقى واتكتم

لا طبعا ازاى مابقاش سكره ام دماغ ناشف واللى صوتها من دماغها زى ماما مابتقولى دايما

قمت بعد مامشيت وبعد ماتناقشت معاها بالحسنى انها ترجع الحاجات دى

وهى ابدا وراسها والف جزمه

اتصلت بالعريس المنتظر

وقلتله قالى معلش ياسوسو عديها ياحبيبتى

كلمه من هنا وكلمه من هنا

اتخنقت وقمت قايلاله طيب وربنا لو رحت يوم الدخله ولقيهم فارشين الحاجات دى وموش اتغيرت

والله هاولعلك فيهم وانتى عارفنى مجنونه جدا

وطبعا لانه عارفنى جدا فخاف

وقال الطيب احسن بدال ما ممكن اعملها واولعه فى الشقه كلها وتبقى جنازه موش جوازه

راح مكلم الست دى حماتى

وعليه تم ارجاع الحاجات دى للبايع

نطلع من دا بايه بقى

ان سكره موش سكره

دى مفتريه وقويه ومحدش يقدر يكسر شوكتها

كلام حمصى برده

ههههههههههههه

ان حماتى هتورينى هى النجوم فى عز الدهر وساعتها هاطفش منها ومن البيت

وكمان انى خايفه جدا وموش عارفه اذا كنت هاقدر اتعامل مع الناس دى ولا ايه

==========================

ملحوظه كبيره اوى كده على جنب

انا فى الفتره اجايه دى هاستنزف افكاركم وطبعا استشاراتكم

هاسمع منكم واتعلم كده بس معلش موش هارد على التعليقات برده لانى بسمعها كلها

وحشتونى

اوعوا حماتى تشوفكم