BLOGGER TEMPLATES AND TWITTER BACKGROUNDS »

السبت، 9 يناير، 2010

اسكت وماتسمعش!



مايحدث فى مصر فتنه طائفيه
مايحدث يجب عنده ان نقف وقفه
مايحدث هو عنف طائفى
و..........و.............و..................
=============================
اللى فوق دا موش كلامى دا كلام الاستاذ بطيخ بطيخ
عضو اللجنه الوطنيه للتصدى للعنف الطائفى
يعنى الوطنى والوطنيه دا بقى زى البقدونس حاشر نفسه فى كل حاجه
ايه الاعلام الزفت دا
استنوا وانا هاحكيلكم
الصبح صاحتنى الست نرمين اختى وقالتلى قومى شيلى اسامه عشان انا بغسل
قمت انا وانا مضايقه ومغلوب على امره ورحت شلت سى الاستاذ أسامه بيه
وقعدت قدام التى فى وأوووم ايه الاقيلك بقى صباح دريم شغال وعمالين يتكلموا على العنف الطائفى
يالهوى عليكم دا انتوا اساتذه فى الاعلام الموجه دا
عنف طائفى ايه
ومين بقى يأكدلى ان اللى اطلقوا النار على المسيحيين دول اصلا مصريين
وموش من الحكومه مثلا
انا بقول مثلا بدال مااروح ورا ال.............
ماعلينا
طيب موش فيه برده مسلم مات مع المسيحيين
عنف طائفى الكلمه ايه تخرم اجدعها طبله ودن وتخلى الناس تقول وتقول وتعمل وتعمل
طيب وربنا انا لسه من شويه مكلمه ناس مسيحيين
كانوا جيرانا وكنا عايشين فى شارع واحد ولاعمرنا حصل بينا عنف ولامشاكل ولااى حاجه
يمكن كانوا المسلمين فى الشارع بيتخانقوا مع بعض
والمسيحيين ماكانوش لابيتخانقوا مع مسلمين ولامسلمين بيتخانقوا معاهم
هو ليه بقت الحكومه كل شويه قادره تخترع حاجات عشان تعمل تفرقه بينا
احنا كلنا مصريين
وزى عادل صاحب مدونه البلد دى فيها حكومه ماقال
ان اللى بيحصل دا مقصود منه تفرقتنا قبل الانتخابات عشان نتلهى فيها وننسى الانتخابات
بس على مين
انا بقولكم اهو
اوعوا حد يتجر ورا اللى بيعملوه ويتنازل عن صوته او يسكت وخلاص
احنا لازم لنا موقف
وبعدين هو موش احنا شريحه برده من المجتمع وفيه بينا مسيحيين هل بنعمل تفرقه واحنا عندهم فى مدوناتهم مثلا
انا ليا اصحاب مسيحيين كتير
اللى بيحصل دا من مصلحه واحد بس
طبعا كلنا عارفينه
يلا سلاموا عليكممممممممممممممم.
===============
استنوا استنوا ماتمشوش
اخر حاجه سمعتها ان المجرمين اتقبض عليهم واتضح انهم ناس سوابق ووش اجرام
واتمسكوا بسرعه
طيب دا مايخلناش نسأل كدا ونستغرب
ايه النشاط بتاعالشرطه اللى نزل عليهم بسرعه دا
موش فاكره شفت فين وامتى سيناريو كدا
يخرجوا مجرمين وارباب سوابق عشان ينفذوا مهمه وفى اقل من 24 ساعه يكونوا ممسوكين
ربنا يعوض علينا
سلاموا عليكمممممممممممممم
دى اخر مره
ههههههههههههههههههههههههه

5 التعليقات:

mimi يقول...

سكرتي
والله أنا متفقة معاكي في كلامك ، بس اللي هيمش من هنا ورايح ورا كل الكلام ده هيتعب

إحنا مع بعض وبنحب بعض ،، اللي عاوز يعمل أسافين ويحط جسور ليه مصلحة معروفة جدا
""اللجنه الوطنيه للتصدى للعنف الطائفى""
وبعدين إيه اللجنة دي؟ لازمتها إيه؟
أهي أي حاجة يطلعوا منها بمعونات وخلا
وكله علي أفانا إحنا

لبنا الله يا سكركر

خواطر شابة يقول...

اقري اخر تدوينة لسووعجوز وعندي 30 سنة تدوينة جميلة عن نفس الوضوع لكن بشكل انساني رائع جعل عيني تغرورق بالدموع وانا اقرأها
ربنا يهدي الجميع
تحياتي لك

قررت أكون عانس يقول...

بيدفعوا البلد لشفير الهاوية

باعلامهم وافعال نظامهم الخائن المفضوح في العالم كله

مصري جدا يقول...

فتنة طائفية

يعني اية؟

سؤال كدا

كل مسيحي او مسلم

ليك كام صاحب من الديانة الاخرى؟

فتنة اية ونيلة اية بس

Manamino يقول...

الاخت العزيزة سكرة
متشكر قووووووي علي تعزيتك الجميلة وعلي سؤالك عليا
واسف علي التأخير في الرد
ثانيا بقي ماتيجي ندردش شوية مع بعض
اخوة في اخوة يعني كدة من غير عصبية
...................
الحكومة بنت تييييييت
متفقين
احنا سمن علي عسل طول عمرنا
معاكي
بس هل معني انك انت بتحبي المسيحيين ومافيش بينك وبينهم عداوات ان كل المسلمين كدة؟
هل معني اني باحب المسلمين ومافيش عداوة بيني وبين حد فيهم ان كل المسيحيين كدة؟
خلنيا ماندفنش راسنا في الرمل زي النعام ونقول مافيش مافيش والدنيا والعة
من الحكمة اننا نشوف اصل المشكلة ونحاول نعالجها مش ننكرها
انكار المشكلة مش هو الحل ليه
...................
مش كل حاجة نرميها علي الحكومة
ولا هي شماعة سهلة وخلاس واحا اصلا شعب بنستسهل؟
هانعمل زي الحكومة اللي كل مايحصل حريقة تقول ماس كهربائي؟
بنعيب ده علي الحكومة واحنا بنعمل زيها
كل ماتحصل مشكلة نقول اصل الحكومة هي السبب
ماشي معاكي
الحكومة سبب
بس مش السبب
فيه اسباب تانية كتير
.......................
وانت قولتي اسباب منها
زي الاعلام
مال الاعلام ومال الحكومة
افتكر ان الاعلام اللي انت ذكرتيه اعلام خاص
يعني مالهوش دعوة بالحكومة
طيب انا هاديكي مثال تاني
طبعا الاعلام المصري الرائد بتاعنا اخر حد ذكر القضية
وذكرها كدة عل يالماشي بعد ماكانت الدنيا كلها عرفت
هاتيلي بقي حد من القنوات الخاصة (اللي هانسميها معتدلة ) يعني لا هو الاعلام المصري اللي نايم في البطيخ ولا قناة الجزيرة اللي عايزة تولعها نار
تعالي نشوف القنوات التانية ونشوفهم ذكروا الحدث ازاي
6 قتلي مسيحيين و9 مصابين
طيب ماتيجي نرجع ورا شوية كدة ونشوف لما واحد من فلسطين ولا من حماس بيروح يفجر نفسه بيقولوا عليه شهيد
بلاش الفلسطينيين علشان ماحدش يقول اني متحيز ضدهم
تيجي نرجع ورا شويتين
نرجع لحد مروة الشربيني؟
شهيدة الحجاب
وشهيدة الاسلام
الدنيا قامت وماقعدتش
والمانيا بقت راعية للتطرف الديني
والناس طالبت بمقاطعة المانيا
وطالبت باعتذار رسمي من المانيا
ماحدش ليه قال ساعتها ان الجاني مجرد مجرم
لما الدفاع حاول يطلعه مجنون محامي مصر كلهم اتصدوا ليه بقيادة نقيب المحامين شخصيا
لما اتحكم عليه بالمؤبد (ودي اقصي عقوبة هناك ) الناس طلعت تطالب باعدامه
ماحدش ليه قال علي مروة الشربيني (قتيلة)
انا مش باطالب حد انه يقول عليهم شهدا
لاني مش مقتنع اصلا انهم شهداء ولا ان مروة الشربيني كانت شهيدة
بس الفكرة الشمعني؟
اشمعني دول قتلي وغيرهم يبقوا شهدا
.........................
نسيبنا من الاعلام؟
مين تاني في البلد؟
الحكومة ؟
والشرطة؟
اديكي انت اللي قولتي
جابوا المجرمين بعد 3 ايام
تفتكري دي حاجة ممكن تعدي علي اي حد عاقل كدة يعني؟
ببساطة كدة المجرمين هايروحوا يسلموا نفسهم؟؟؟؟؟؟
..........................
ولا المحافظ اللي طالع يقول ان الاقباط هم السبب في اللي حصل؟
ماحدش يقولي المحافظ مسيحي
انا دلوقتي مش باتكلم عن مسيحيين ومسلمين
وده كلام المحافظ للي مش مصدق
http://www.almasry-alyoum.com/article2.aspx?ArticleID=240001
...............................
فاضل مين في البلد؟
الاخوان المسلمين؟
اللي طالعين يشجبوا وينددوا باللي حصل وفي الاخر برضو يقولوا ان الاقباط هم السبب؟
وده نص بيان الجماعة
"مواجهة ما سمته تنامى التطرف داخل الأوساط الفاعلة فى الكنيسة الأرثوذكسية، وفى قطاعات مسيحية شابة، وضرورة وقف النشاط التبشيرى الذى وصفته بـ«المحموم» "
وادي اللينك للي مش مصدق
http://www.almasry-alyoum.com/article2.aspx?ArticleID=239870&IssueID=1647
.................................
المحافظ ومجلس الشعب قالوا المجرمين شقاه ومسجلين خطر وليس لهم اي انتماءات دينية؟
هو ماينفعش حد يأجر الشقاه دول ويحرضهم علي اللي عملوه؟
ايا كان هو مين بقي
هاتقوليلي الحكومة اللي عملت
هاتقوليلي جماعات اسلامية
جماعات بتنجانية
كل ده مش مهم
المهم ان النتيجة واحدة في الاخر
والتمييز واضح لاي حد عنده عينين
حكومة وامن ونظام شامل وناس في الشارع وجماعات (محظورة ) واعلام حكومي وخاص و (موجهه) زي مابتسميه
........................
انا اسف
طولت وبان من كلامي اني منفعل
بس انا فعلا بقالي كام يوم عمال اسمع كلام يغيظ
ماباقولش ان فيه فتنة
انما مش معني كدة ان مافيش احتقان
مش معني كدة ان مافيش تمييز
خلاص بقي خليني اتسد مش كل شوية هاتفتح من تاني
ههههههههههههههههههههههههههه
صباحك سكر ياسكرة