BLOGGER TEMPLATES AND TWITTER BACKGROUNDS »

الاثنين، 18 يناير، 2010

لخبطيشن على وزن مودريشن.



احساس مميت
قلبي بيرجف جوايا
خايف من بكره اللي ما لوش نهايه
خايف منى ومن جنوني
احساس مميت
احيانا فى عز الحر بحس بان قلبي بردان وبيرتعش
وكتير فى عز البرد بحس بالدفا
ليه موش عارفه
=========================
هومى الوحيد هنا


كنت قفلتها لكن فتحتها تاني
ليييييييييييييييييييييه

عشان موش لقيتلى مكان تاني غير هنا
وعشان كدا اتحملونى بقى
===========================
رائحه الملح


هات الم
لح وحطه ع الجرح عشان يطيب
ستى قالتلى النها رده لما جرحك يوجعك اوى
اوجعيه انتي اكتر ياسها عشان يبطل يوجعك
قلتلها ازاى ياستو
قالتلى هاتى شويه ملح من جوه وتعالى
قمت من جنبها وجبت شويه ملح وجيت
اخدتهم من ايدى وكان فى ايديها جرح صغير
حطت عليه الملح واتألمت وبعد شويه كل الالم انتهى
قالتلى انا جمدت قلبى وقسيت على جرحى
عشان يبطل يوجعنى
اوجعى وجعك ياسها
بصتلها وسكت
اصل ستى ماتعرفش ان اى وجع تعرف توجعه
احيانا فى اوجاع ماتقدرش توجعها وتفضل هى توجع فيك طول الوقت
فقمت انا فكرت
مادام فيه وجع مدارى وموش هاعرف احط عليه ملح
ليه موش استخدم ريحه الملح واوجع وجعى عشان يريحنى ويبطل يوجعنى
قررت بقى انى اوجع وجعى
بالملح بقى او بريحه الملح
المهم اوجعه
اوجعه أوى عشان يبطل بقى يوجعلى فى قلبى وروحى
موش انتوا معايا ولاايه
شكلكم نمتوا تانى منى
اصحى ياواد انت وهو وهى
============================


انا سها علقت حلمى على الشماعه
زى منير ماقال
ايون انا تعبت من حلمى فقلت اعلقه على الشماعه شويه
ابعد عنه واديه اجازه يمكن بعدها اعرف احققه
قررت اكسل وابطل تفكير فى اى حاجه وكل حاجه
هاعيش النهارده وبس
دى هتبقى فتره صغيره كدا
اعيد فيها حسابات كتير عاوزه
مراجعات
شكلى
هااحتاج لمحاسب شاطر اوى
ههههههههههههههههههههههههه

=============================
سيجاره

خرجت واشتريت سجاير وجيت
قفلت بابى علياا

عاوزه ابقى لوحدى بقى عشان ادخنها برا
حتى
لم تتركنى لوحدى فى تلك الليله
فهل علمت بما سأفعله
لا وكيف لها ان تعلم
مين طيب اللى هيقولها
ايه شافتها ولاايه
طيب شافتها فين
وانا اخفيتها هناك وموش هتعرف توصلها
أووووووف
عاوزه ادخن السيجاره واحرقها زى مابحرق حاجات كتير
هاحرقها برده
ههههههههههههههههه

23 التعليقات:

Baskouta يقول...

وحيدة في منزلها
هايمة في اوهامها

وعلى شماعة الزمن تعلق حلم شدها
وتقسى وتوجع جرح هدها

وتعيش بس يوم بيوم
من غير ماحد ينصح او يلوم

هتحرق سيجارتها وحبها
يمكن نارها تدفي برد قلبها

وحشتيني يا سكرة

مصري جدا يقول...

كويسة اوي السجاير دي

انا بعمل كدا كل يوم بتاع تمانين مرة

وما فيش حاجة بتتحرق غير دمي

دا اذا كان لسا فية

اقصوصه يقول...

كوكتيل لخبطيشن حلو

انا اكره التدخين :(

سمكه واحده يقول...

طب متيجي نخمسو سوا
هه هه ولا ايه
طب هاتي نفس طيب
كلام لخبتينو بس في شويه مشاعر متلخبطه علي احاسيس
ربنا يروق بالك ياجميل
بس بقلك السجاير دي نوعها ايه طيب
(وش مطلع لسانه)

قوس قزح يقول...

اياكى تقفلى تانى

و ان كان على الجرح اللى مش هتعرفى تحطى عليه ملح ..ممكن تقرى هنا جروح اكبر منه فتهوون عليكى جرحك

الاحلام كلها مُعلقة الى ان تهبط للارض و تتحقق ..مينفعش نمشى و احنا بصين للسما ..لازم نبص قدمنا .. و لما نتعب نبص فوق فيشجعنا حلمنا اننا نكمل .. الاحلام بتخلينا نكمل حياتنا ..ده هدفها

السجاير مش حل لاى حاجة ..دى مزاج مش اكتر

خواطر شابة يقول...

هذا الخبطيشن كما اسميته بينه رابط واحد هو الحزن يغلب على كل هذه اللخبطة سمة واحدة هي الحزن
عزيزتي الخلطة عندك ناقصة الحياة ليست كلها بلون اسود هناك الابيض وهناك الرمادي فلا تتشبتي باللون الاسود غيريه او على الاقل حاولي لكن بعزم وارادة للتغيير
تحياتي لك

مستخلص افندى يقول...

ما نسيب بكرا يجيى ونشوف هيعمل فينا ايه

نسيب الدنيا ماشيه ونشوف هتعمل فينا ايه برضه

للاسف الخوف وسيله للهروب من بكرا

خلينا احسن نشوف هى هتعمل فينا ايه وربنا كاتب لينا ايه

انتى منوره وانا مبسوط انك بتقولى اللى فى نفسك

لكن حاولى تخرجى من اللى انتى فيه وتنسى الزعل شويه لان الزعل احنا اللى سعات بنعمله علشان نحس اننا موجودين


كلامك جميل اوى يا سكرا

ربنا يهديكى للطريق الحصحي يارب ويبعد عنك الهموم والاحزان

صيدلانيه طالعه نازله يقول...

مفيش فايده فيكى يا سكره قلقانه و حيرانه و الحزن ماليكى و فاض على اللى حواليكى
ربنا يريح قلبك و بالك
حمد الله على السلامه

Ms Venus يقول...

جميلة الفضفضة حتى ولو كانت ملغبطة


احكى وقولى وهنسمعك


وردة مسكرة لعيونك يا سكرة

M و H يقول...

حاسة بألم كبير جواكى

مش هقدر اقولك غير ربنا يزيح عنك آلامك واوجاعك

reem يقول...

سكرة اخيرا عرفت اعلق عندك

ايه يا بنتى كمية الحزن دى ؟

ليه كدا

ربنا يبعد عنك الحزن

واوعى تفكرى تعلقي حلمك خليه ادامك وحاولى تحقيقه باستمرار

صدقينى لو علقتيه هاتسيبه متعلق كتير ولما تفكرى تحققيه هتلاقي الوقت اتأخر

لسا زعلانة منى ياقمر ؟ ولا خلاص عرفت اصالحك ؟

بوساتى ليكى ولحنين العسولة

reem يقول...

هييييييه انا كدا اتأكدت انى عرفت فعلا اعلق كنت خايفة اوى الكومنت مش يوصل زى كل مرة

العيسوى الصغير يقول...

لا بكرة له نهاية بس بعد عمر طويل

ريحة الملح ليه ماممكن يتاكل او يتشرب وهيبقى اقوى

اخص سجاير فى الاخر

abo-omar elmasry يقول...

كلامك جميل وصادق وإحساسك عالى بيوصل بسرعة أوى .. بس بنخاف نحرق حاجات حوالينا نتحرق معاها ... كل اللى حوالينا جزء منا حلوة كانت او وحشة ولينا فيها زكرى وعبرة ولحظة أسى

sookra يقول...

Baskouta

انتى وحشانى اكتر ياحبيبه قلبى
موش ممكن الكلام الحلو دا ليه انا
ميرسى ياقمرايه
مساكى شيكولاته

===========================
مصرى جدا


طبعا كويسه اوى
هههههههههههههههه
والله انا كمان موش باقى عندى دم
منورنى
مساك شيكولاته

==========================
اقصوصه

منورانى ياسكر
انا لااحبها ولااكرهها
ان لها وقت عندى
مساكى شيكولاته

============================
سمكه واحده

تعالى نخمس سوا يلا تعالى بسرعه اصلها خلاص قربت تخلص
هههههههههههههههه
نوعها دافودوف
هههههههههههههههههه
وش بيطلع لسانه
مساكى شيكولاته
========================
قوس قزح

ام هنا الوان السما السبعه زى طمطم مابتقولك
لاخلاص موش هاقفلها تانى
اما عن الاحلام فاخليه معلق كدا شويه هاخد اجازه من التفكير
اما الجروح فهى كثيره ولكن
ربنا بيهون اكيد
عندك حق السجاير ليست بحل على الاطلاق
فانها مزاج
مساكى شيكولاته

========================
خواطر شابه

احب اللون الاسود لانه اوضح الالوان ويمثل لى كل الالوان
احبه وارتاح بداخله جدا
اما الحزن فلا طاقه لى بيه
مساكى شيكولاته

=========================
مستخلص افندى

بكره سايبينه لربنا ودنيتى اهى ماشيه وخلاص
ربنا يهون
اما الحزن دا فموش بايدى
ادينى بحاول ادعيلى انت بس
الله يخليك انت اللى منورنى دايما
مساك شيكولاته
==========================
صيدلانيه اللى تعبت من الطلوع والنزول

مافيش فايده
سعد قالها عليا تقريبا كان يقصدنى انا
انا قلت اقفلها عشان موش اخلى اللى حواليه يكتأبوا
مساكى شيكولاته

===========================
MS VENUS

ادينى بلغبط وافضفض وربنا المستعان
ههههههههههههههه

مساكى شيكولاته

==========================
M&H

ربنا يسمع منك
شكرا لمشاعرك الرقيقه دى
منورانى
مساكى شيكولاته

===========================
Reem

تعليقك نور ياقمر ياام كنزى
اولا انا مقدرش ازعل منك
اما موضوع الحلم دا فربنا يسهل يمكن
منورانى دايما على طول

مساكى شيكولاته
============================
العيسوى الصغير

بكره مالوش نهايه لان دايما فيه بكره وعشان كدا مالوش نهايه
صح؟
مساك شيكولاته

==============================
abo-omar-elmasry

متشكره جدا على الكلام الجميل دا فى حقى
احنا دايما بنحرق ونتحرق مع اشياءنا

مساك شيكولاته

amirelhob يقول...

البوست دا لو اتقال عليه احاسيس هيبقى يجنن بس اسمو بردو حلو اوى عشان دى فعلا احاسيس بتحصلنا

انا بس نفسى اعرف ايه لازم الضحكه اللى بتبقى موجوده فى نهايه كل فقرا دى ياترى تريقه

ولا ضحكه حزينه

اسف على غيابى الفترا دى على المدونه ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

أم .. بوبه يقول...

طيب كلامك جميل

وحكاية الملح دى عجبتنى أوى ومعانيها قوية جدااا وجدتك عندها حق

إنما إيه موضوع السجاير ده

إتخربطى فى مخك إياك

بت داحنا نجطعك جطيع حدانا فى الكفر

mimi يقول...

برافو يا قطة

Tamer Nabil يقول...

التدخين افة وربنا معانا عليها

سكرة انتى غيرتى رابط مدونتك اصل ما كنتش عارف ادخل عندك بقالى كم يوم

ودخلت من ردك فىاحدى المدونات

مع خالص تحياتى

mimi يقول...

بصي يا عسل برافو علي أسلوبك
برافو علي موضوعك
برافو رجوعك لهومك

برافو علي " إوجعي وجعك يا سها"

كابيتو يا سكرتي ؟ ؟؟

mimi يقول...

صحيح رابط المدونة فيه غلطة
موش عارفة إيه هيا

حلـم،، يقول...

هذة المدونة مش سكر وتمر حنا

دي مفروض يكون اسمها مواسم في النهار كان شكلها غير الليل مبدع يا سكر
بصراحة وقحة المدونة دي بحبها وبعيش احساس غير لما بدخلها لدرجة كتبت لها قصيدة وصف لاحساسي الذي ينبض في جاذبية فصاحة احساس مالكتها بصرف النظر عن صوغة بحس بصراحة واضحة

اما البوست جميل مختلف

مثلا القب برتعش شيء جميل اكيد سينجب حبا رائع.

رائحة االملح

الملح يعني القوة والقوة تعني التحكم وتعني ايضا التوازن وفق الميزان في فن اداة القوة نحو السيطرة وصحيح ان الملح خميرة الحياة ولكنة ايضا يسمى السم الابيض حينما نفرط في استخدام هذة القوة..فمزيدا من الملح فهو خميرة الحياة فحذية علي قدر الحاجة فقط؟

اما السيجارة

وما ادراكي ما السيجارة

بقدر احترامي لها في يدي عند الحاجة

بقدر عشقي الوحشي لها عندما تشتعل في
يد انثى..


وخاصة عندما تكون الاصابع التي تقبض على السيجارة طويلة رفيعة وحساسة

اكيد ستصنع شاعر وان كان من دخان

فجذوة نيران اجمل من الدخان والشعر

حينما تصنعة انفاس انثى هائمة حائرة ثائرة فاعلم انك ستملك ثورة مستمرة


اشكرك انك سمحتي لنا ان نتنفس من هذا العبق وهذا مجرد راى وانتي اكيد على درحة من راحبة الصدر للحوار وتبادل الاراء ولو كنت خرجت باعتذر وبلتزم براى مالك المدونة

انا حلم

حلـم،، يقول...

يابنتي اهمدي


حولتيني انتي كل دقيقة بتغيري نظام والوان وزينة وديكور المدونة

ياريت اعرف اعمل حاجة في مدونتي


دمتي بود


انا بهزر بس