BLOGGER TEMPLATES AND TWITTER BACKGROUNDS »

الجمعة، 18 سبتمبر 2009

احلك ساعات الليل .......................

اتعلمون ان اظلم ساعات الليل هى تلك الساعه التى تسبق الفجر .
حبيت اشارككم اللى بفكر فيه .
هو يعنى ازاى يبقى فيه انسان عايش حياته كلها او اغلبها فى الساعه المظلمه دى ؟!!!
ازاى يتحمل انه يعيش فى السواد دا ؟؟
وازاى لما يقابل حد ويشعر ان الحد دا هيساعده انه يخرج من الساعه دى وبالرغم من كدا الحد دا يرفض انه يستنى معاه وميقدرش يقدر ان النور اللى هو جاى بيه دا لسه جديد على عينيه وانه ممكن يخاف من النور دا او يتعبه شويه فى الاول لغايه اما يتعود عليه.
ازاى يرجع يجرى تانى ويسيبه بعد ماخده من الساعه الضلمه دى ووراه النور ؟
ازاى يقدر يرميه بمنتهى البساطه كدا وكأن شيئا لم يكن؟؟؟؟؟؟؟؟؟؟
عارفين زى ايه كمان.............
لما حد تطلب منه انه ياخدك معاه فى عربيته مشوار وتقريبا الطريق زى بعضه او هو هيقدر يوصلك للمكان اللى انت رايحه
وتركب معاه شويه وبعد شويه وانتوا فى جزء من الطريق حد تانى ييجى ويطلب نفس الطلب وعاوز يروح نفس المكان
وصاحب العربيه يركبه معاكم ,وواحد تانى ييجى,وواحد تالت ييجى,وصاحب العربيه يوقف لكن موش عشان ياخد لكن عشان يرميك انت بره العربيه لانك موش اتفقت معاه فى حاجات او لان شخصيتك موش عاجباه او لاى سبب يعلمه ربنا .
كرامتك توجعك اوى واحساس فظيع يغتال كل مشاعرك واطمئنانك وقلبك وتخاف اوى لانك فى طريق موش تعرفه لكن............
للاسف لازم تكمل ,ايوه لازم تكمل مشوارك
تقف خايف وحيد حاسس بالضياع تشاور لاى عربيه توصلك المكان اللى انت رايحه .
اى عربيه ,اى عربيه وانت عارف انك هتركب وانت مرعوب وخايف وترجع موش تثق فى حد تانى .
و........................................................................................................................................................................................................................................................................
ملحوظه لازم اضيفها :
انا هنا لما اتكلمت موش بينت ولاحبيت انى اوضح كراهيه او اعترف بيها .
وكمان لما تتجرح من صاحب العربيه دا مش معناه انك بتكرهه او موش شاكر له فضله وانه وصلك لمكان معين لكن كل مافى الموضوع انك مجروح.
بس خلاص.

5 التعليقات:

micheal يقول...

تأمل عميق عجبني جدا
تحياتي وعيد سعيد

VÖltaa يقول...

جميل التشبيه ده

بس عندى فكرة بالنسبة للتشبيه

لو ركبنا عربية وحب يطردنا
نقوله اطرد حد من اللى جايين متأخر
انا الأول
ولا ايه ؟


عالعموم كل سنة وانتى طيبة

VÖltaa يقول...

على فكرة انا لفيت المدونة

بجد ياسها

احلى حاجة فيكى

انك بتكتبى من القلب

نفسى اعمل كده .. اينعم عملتها كام مرة وكانو ازفت من بعض

مش مهم ادينا بنكتب وخلاص ..

على فكرة

انا ضيفتك عندى فى قائمة الاصدقاء

يلا ياستى حصلك الشرف هههههه

كل سنة وانتى طيبة

Tamer Moghazy يقول...

مش جايز صاحب العربية مش كان ها ياخدك من الاول وانت اللي طلبتي منه التوصيلة..؟
ويمكن كمان انت اللي بتصرفاتك خليتيه موش يرحب بيكي لاخر المشوار..!!
وجايز يكون عنده سبب بيخاف عليكي منه..!!
او يمكن يكون الشيطان حضر له وكان ناوي يقل ادبه وقال يا واد ابعد النار عن البنزين..؟!!
او يمكن لان انت عاوزة تكوني ضحية اعتبرتي انه لما خرجك م العربية متضايق منك وممكن العربية تتقلب بعدها وانت توصلي مشوارك متاخرة وهو موش يوصل خالص...!!
وممكن.....................
وجايز.....................
واحتمال.......................
وربما............................
اعتقد انه لو كان وصلك لجزء من الطريق افضل بكتير لو مش كنت وصلتي لاي حته خالص..

على العموم انا اتعلمت عن البشر حاجات كتير..منها انهم ما يعرفوش يشكروا قد ما يقدرا ينتقدوا..

كلمة اخيرة:
"اننا نخجل الاعتراف بالحب..في حين لا نخجل الاعتراف بالكراهية..علينا ان نخجل من انفسنا"

Cute Kitty **sookra يقول...

انا طول عمرى بخجل من الاعتراف بالحب او الكراهيه .
بخجل منهم الاتنين .
وعارف كمان بخاف اوى من الحب وبخاف على اللى حواليه لو كرهتهم لانى لو كرهتهم هتعب وهيتعبوا كمان معايا .
عشان كدا وعشان كدا اوى عمرى ماكرهت حد وعمرى ماصرحت بمشاعر كره لحد مهما عمل.