BLOGGER TEMPLATES AND TWITTER BACKGROUNDS »

الخميس، 25 فبراير 2010

بيرفكت


احساسك امتي بيبقى بيرفكت


امتي بتحس انك راضى عن نفسك


ياترى بتفرح لما تحس انك بيرفكت برغم عيوبك الكتير


ولابتفرح لما تلاقى نفسك حزين وموش بيرفكت ومع ذلك معندكش عيوب كتير


ياترى لما تحس انك ملاك وحزين بتوصل لحاله البيرفكت


ولا لما تحس انك شيطان بس حاسس بالسعاده


معلش حاساكم موش فاهمين بس استحملونى


يمكن اعرف اوصلكم احساسى او هبلى


ماعلينا


مره كنت ماشيه حزينه وبعدين قابلنى حد كان خانقنى ومضايقنى جدا وكان عامل معايا موقف زباله وكنت ساعتها موش قادره اردله الصاع صاعين زى مابيقولوا


وجه الوقت اللى قدرت ارد ورديت بالفعل الصاع صاعين


كنت مضايقه قبل كده لانى معرفتش ادافع عن نفسى


ولما عرفت حسيت لشويه صغيرين باحساس بيرفكت كده


وبعد ثوانى كده اضايقت تانى


وبقيت موش فى احساس بيرفكت خالص


طيب اعرف اوصل باحساسى للبيرفكت ازاى


واوصل بمشاعرى للبيرفكت ازاى


واوصل بنفسى للبيرفكت ازاى


امتى ابقى انسانه بيرفكت


فى كل حاجه


وياترى لما هابقى بيرفكت هاافرح ولاهااحزن


يوووووووووووووووووه يانى


ياغلبى


كتير بقى بكتم رغبات جوايا عشان لما بفكر فيها بحس انى موش بيرفكت


ومع ذلك برده لما بكتمها جوايا موش برتاح وبفضل افكر انى موش بيرفكت


ياترى لو كتمنا رغباتنا جوانا هنرتاح ولالما نطلعها هنرتاح


كده بنكدب وكده بنكدب




ياانى ياغلبى




21 التعليقات:

adel يقول...

اول تحليق يمكن

فووووووووووووووووووو

انا عمري مابحس ولا عايز احس اني بيرفكت
انا انسان ناقص و عاجبني ناقصي و ضعفي احيانا كتير

Baskouta يقول...

طول ما ناقصانى حاجة عمري ما هبقا بيرفيكت
وانا اصلا مش بسعى انى ابقا بيرفكت
لازم دايما يبقا فيه حاجة ناقصة علشان نسعى لتحقيقها
لازم يكون في سبب للحياة
انا عندي حالى يأس

Cute Kitty **sookra يقول...

Adel

اول تحليق طبعا ياابن فاتيما

احساس انك انسان ناقص دا طبيعى لان الكمال لله وحده
لكن انك تحس انك بيرفكت فى مشاعرك وتفكيرك ورغباتك دى حاجه تانيه

وياعم ولايهمك
احنا عاجبنا عادل كده زى ماهو

لــــ زهــــــراء ــــولا يقول...

سكره المسكره
صعب اوى الواحد يوصل انه يبقى برفكت
لان البرفكت دى لازم يبقى راضى عن نفسه اوى اوى
وصعب تلاقى فى هذا الزمن حد راضى عن نفسه بجد

تقبلى اطيب الامنيات بالسعاده


زهراء

Cute Kitty **sookra يقول...

baskouta

حبيبتى مالك دا اولا
طمنينى عليك يابيبى
ثانيا
موش لازم نبقى بيرفكت طول الوقت بس كتير بنحس اننا عاوزين ولو للحظات نحس اننا بيرفكت
ولو ثوانى بس دا اعتقد احساس يهبلون يابسكوتى

Cute Kitty **sookra يقول...

زهراء البيوتى

انا معاكى ان صعب فى الزمن دا نلاقى حد راضى عن نفسه
بس ليه مانحاولش نرضى عن نفسنا ولو لدقايق

مساكى شيكولاته سكرها زياده

سواحة يقول...

بصى الاحساس الى كنت فيه و خلانى اخذ موقف مشابة مكنش بيرفكت خالص :-((

كان زميل و لينا شغل بنخلصه سوا
و هارينى غلاسة و ذل فى كل مرة بجتمع
فى مرة مسكتش و مطنشت و رديت
و خليته يقف مكتوم كتمه قصادى و يتكسف على بواقى دمه

بعدها نزلت حاسيت انى وحششششششششششششششة
انى اتجريت اتعامل معاه بنفس اسلوبه
حسيت انى قيمتى قصاد نفسى نزلت قوى

المهم بعد ما هديت
اتصلت بيه و اتعتذرت
طبعا هو يرد مش فاهم ليه بعتذر و انا معايا حق و هو المفروض يعتذر :-((
مسكت نفسى اقوله لانى رديت عليك اصلا :-)

المهم لما انتهى الموقف
حسيت انى عمرى ما حكون بيرفكت بس مينفعش اسيب نفسى لانى اتجر فى طريق
يقللنى قصاد نفسى و اقول فى الاخر اصلى مش بيرفكت

بيرفكت جهاد معافرة متواصلة مع النفس
انك تثبتى او تعلى بكل حاجة
كلامك افكارك تصرفاتك ...
و انتى فى مصب شلال نازل على دماغك بيزقك لتحت لنهر
و مش حتعرفى انت وصلتى و لا لا الا يوم الحساب
ربنا يوفقنا فيه كلنا
امين

P A S H A يقول...

طب إفرضي فاهمين وعاملين نفسنا مش فاهمين لازم يعني تحرجينا ؟؟ هههههههه


كل سنة وأنتِ طيبة بمناسبة عيد ميلادك وعقبال ميت سنة .. آسف إنها جت متأخرة بس المواصلات بقى ههههههه

وكل سنة وأنتِ طيبة تاني بمناسبة المولد النبوي الشريف .

" ياترى لو كتمنا رغباتنا جوانا هنرتاح ولا لما نطلعها هنرتاح كده بنكدب وكده بنكدب "

الجملة دي بيرفكت بجد .. تسلم إيدك
حقيقي مش لاقي تعليق عليها .. بس عن نفسي باطلع أياً كانت النتائج .

تحياتي
:))

سلام

إيمان يقول...

بوست غريب شتتنى ف الاول
بس بعد كده فهمته وذكرنى بحاجات كنت عامله نفسى نسيتها
مواقف وحشه من صحبتى وبالرغم من كتر وحشاتها الا انى سامحتها
ومن جوايا مقدرش اذيها ولا باعرف ارد واجيب حقى
اكيد ده نقص عندى يمكن
بس مفيش حد كامل
بس اكتر شىء بيحسسنى ان مكتمله اكيد مش تمام الاكتمال
ان مبسوطه بحب كل الناس حواليا وماليش عداوة
ومش بحس ان حد بيكرهنى
تحياتى ياسكرة ياجميله

Ms Venus يقول...

فهماكى يا سكرة اوى

بس اقولك على حاجة

الشىء الوحيد اللى يخلى الانسان يحس انه بيرفكت هو انه يمشى وراء ضميره


صدقينى وعن تجربة


ريحى ضميرك دايما ترتاحى وتحسى انى بيرفكت


وردة لعيونك يا سكراية

غير معرف يقول...

امممممممممممم
تعرفى بقالى فترة متضااايقة والامور اتبهدلت وسبت حاجات وبدات فى حاجات بس عشان حاسة انى مش كويسة وان فى حاجة غلط

بس لاقيت ان عشان احس انى بيرفكت وكويسة لازم اعجب نفسى زى ما انا وارضى بيها برغم كل حاجة وابقى صريحة مع نفسى اشوفها عاوزة ايه ومحتاجة ايه واشوف برده ايه اللى بيضايقها
واعيش الحياة كده على انها مغامرة واعمل حركات جنان كده فى الحاجات اللى نفسى فيها واخد الحياة ببساااااااااااااااااطة اوووووووووى
من الاخر كده اشوف ايه اللى يرضينى ولو مش غلط او على الاقل هتعلم منه او هيريحنى اعمله بس قبل ما اعمله افكر لو عملته ده هيريحنى

توهتى صح
اقفى فى نص الشارع وخدى اول تاكسى يقابلك وارجعى تانى للمدونة

الا صحيح اخبارك ايه :D

سلام يا سكرة

أسمعنى شكراًً يقول...

ألف ألف ألف ألف سلامة
ودة جالك من أية البرفكت دة
تلاقيقى مأخدتيش حبوب منع الهلوسة ولا حاجة
وعموما أنتى أسلم حل ليكى أنك تجربى
تعيشى من غير بيرفكت دة علشان الكمال لله وحدة يا قطة والسلام ختام على قفة المواطن

Mona يقول...

ساسو أبشع شىء أنك تردى الصاع صاعين هذا ليس من شيم الكرام - مهما فعل بك أى أنسان فالله موجود وأحتسبى دائما عند الله - أما الكمال والبرفكت فهو لله وحده ولن نشعر بالبرفكت أبدا لكن سنشعر بالرضا أن شاء الله لو أردنا ذلك -

شاب فقرى يقول...

انا فاهم البوست كويس

بس مش فاهمك خالص

فقرى

فاتيما يقول...

أنا طالعة لإبنى

مش هوه اللى طالعلى

اه منا بتعلم منهم اصلهم حاجة تفرح بصراحة و عادل قال اللى عاوزة اقوله بشكل ما مقارب

الواحد لو حس انه بيرفكت
يبقى فيه حاجة غلط فى الحكاية

لكن يحاول يحب انه يبيقى بيرفكت
قدر الإمكان

الناس لما بتوصل لحالة البيرفكت ممكن ينتحروا من شدة الملل

اصل البيرفكت ممكن يقتل الروح
و عدم البيرفكت يقتل الروح برضو

و حياتنا رحلة طويلة هدفها المشوار مش المكان اللى هنروحه
و طول الرحلة لازم نسعى للبيرفكت
و نلاقى روحنا اوقات مش بيرفكت
عشان نكون ناس بجد مش مرسومين
و نقدر نواقص غيرنا
زى ما بيقدرونا
و يحبونا زى ما احنا

حلو قوى ى ى ى ى البوست يا سكرتى
و حلوة فكرة البيرفكت دى جدا

العنجليزى بيطلع منكم حاجات حلوة قوى
انتى و بساكيتو


فرى نايس ترولى ماى سويتى

خالص حبى يا حتة سكرة تحلى المحيطات

Unknown يقول...

ارضى عن نفسى ازى وانا مش صريح مع نفسى حتى ها تجى ازى

لما نطلعها هنرتاح

بس اطلع زى ماهى اللى يزعل من الحقيقة هو حر

Ahmed Fayez يقول...



بسم الله.
أولا مفيش حد بيرفكت.
ده أمل واسع شوية الناس بتجري وراه و مابتوصلوش.

لكن فكرة الرضا عن النفس هي دي المهمة.
و مسألة الرضا بتنقسم لصنفين: رضا مع الخطأ، زي اللي بيحشش و هو مبسوط و راضي كدة. و رضا مع الصواب، و دي لما الواحد بيكون راضي عن نفسه لما بيكون بني آدم كويس و بيعمل حاجات كويسة.

أنا بكون راضي عن نفسي و مبسوط لما بعمل الدور اللي المفروض أعمله، و لما أساعد شخص، و لما أحقق نجاح سعيت و تعبت عشانه، و لما أعمل حاجة صح بغض النظر عن نتايجها أو رأي الناس فيها.

Tamer Nabil Moussa يقول...

والله الواحد فى الحياة لايستمر على حاتل واحد والتغير موجود ورغم انة مطلوب انة احيانا بيشك فى نفسنا ويسيب شكة مكانها واضح


مع خالص تحياتى

beautiful mind يقول...

اكيد طبعا مفيش حد كامل
كلنا فينا عيوب
وكلنا بنغلط
بس اكيد غلط عن غلط بيفرق
انا بحس كتير اني بيرفكت
لما بقرب من ربنا اكتر
ربنا يهدينا جميعا
تحياتي

ريمان يقول...

ممممممممممممممم

مش عارفه اقولك ايه

بس صعب ان الانسان يوصل لدرجه البيرفكت يا سكره

دايما الانسان بيبقى ناقصه حاجه

ونادرا اوى اوى اويكاد يكون منعدم انك تلاقى شخصيه مثاليه

حبات التوت يقول...

ماحدش بيرفكت فى الدنيا دى
احنا بشر فينا عيوب وضعف ونواقض وعيوب ماليها اول من اخر عمرك ماهتبقى بيرفكت

يعنى احيانا بتحسى انك بيرفكت بس مش معنى كدة انك بيرفكت
المهم احساسك...وعمرك ماهتلاقى حد راضى عن نفسة