BLOGGER TEMPLATES AND TWITTER BACKGROUNDS »

السبت، 6 فبراير 2010

سامحونى ماكانش قصدى.



فيه حاجات كتير جوايا
حاجات كتير متلخبطه
وحاجات تانيه مترتبه
حاجات حاساها من زمان
حاجات لسه بحسها
انا نفسى اشرب من ايديك
نفسى اتغطى بعنيك
نفسى انا الاقى نفسى بين ايديك
اد ايه وحشتنى واد ايه مشتاقه ليك
انا نفسى تاخدنى بعيد
نجرى ونهرب م الزمن ومن السنين
نفسى انا ابقى معاك
افكر فيك والاقينى جنبك
الاقى حبك كبر وحوط على قلبى وعلى حياتى
نفسى حبك يبقى شجره كبيره طارحه خير وحب
نفسى حضنك المسه ويضمنى من غير قلق
نفسى
فى حاجات كتير وحاجات شويه صغننين
بس ياترى كل احلامنا بتتحقق ولابنفضل كدا عايشين
نحلم ونحلم ونحلم
وفين الحقيقه واللى بيحصل
==================
ملحوظه
سورى لو كان العك اللى فوق دا موش فاهمين منه حاجه
دا مجرد هذيان واحلام مالهاش حق تشوف النور
وبما انى خلاص قربت اكمل السن القانونى للكف عن الاحلام
خلاص بعد كام يوم
هاكمل كااااااااااااااام وعشرين سنه
28
وبما ان كل احلامى راحت فى الهوا
وضاعت مع كل سنه خلصت
حاسه انى خلاص ماعدش ليا حق فى الاحلام
كتير بحس انى قويه وكتير ناس حواليه بيقولوا انى قويه وقلبى جامد
وبرغم من كدا حاسه بمنتهى الضعف
منتهى قله الحيله
منتهى الالم واليأس
سامحونى
سامحونى ماكانش قصدى انى اغلس عليكم
او انى اشيلكم همى
تعرفوا
سمعت جملتين من كام يوم وموش عارفه انساهم ولاقادره انساهم ولاكمان عاوزه انساهم
عاوزه افضل فاكراهم دايما
you don't need anyone
you mustn't need anyone
this is because you have yourself
دول الكلمتين عاوزه اطبقهم بقى فى حياتى
ومعلش موش قصدى
بس بجد احساس الاحتياج لشخص اولحضن شخص
او لحد يطبطب وموش تلاقيه
احساس بيوجع اوى
احساس الاحتياج دا بيتعب جدا
وعشان كدا هااحاول اطبقه
اسمعوا معايا

17 التعليقات:

adel يقول...

سامحوني ليه !!!!
انت بتكتبي اللي يعجبك
واللي علق يعلق او ميعلقش
عاجبه او لا هو حر
بس دي مدونتك و تكتبي اللي يعجبك

بس قشطة هي موود اكتئاب و انا في حالة لذيذة منه
LOL

إيمان يقول...

سكرة
جميل اوى كلامك ومس قلبى فعلا بس عايزة اقولك طول مافينا نفس ولاخر العمر فالاحلام متاحه ليكى مش محدوده بسن ولا محكومه بيه
وكل سنه وانتى طيبه والعمر كله ليكى يارب
وتقولى اللى انتى عايزة طالما خارج من قلبك وصدقى هتلاقى نصك التانى اللى يكمل حياتك
ربنا يوفقك يارب ودايما تحلمى وتحققى كل احلامك ودا بيرجع ف الاخر ليكى وللنصيب برضو
تحياتى

هي وظروفها يقول...

ايه يا زينه البنات مالك

انتي لسه في سن زي اقمر وسن النضج كمان لسه مجاش يعني سكره البنت اللي من ليبيا لم تنضج بعد سبيها علي النار شويه وهتلاقيها استوت
مش تنكدي عليها وتزعليها علي فكره يا سها

سكره دي بنت جدعه وعسل ولو قربتي منها هتحترميها وهتفرحي بيها وهتلاقيها
متبعديش عن سكره يا سها خالص خليكم شخصيه جميله حبوبه وبكره تتحق احلامك وتبقي زي منتي عايزه واكتر ولا ايه؟؟؟

مش احمد عبد العزيز قال حقي رجعلي يا مغازي يا كبييييييييييييييييييييييييير

بس امانه عليكي لما حقك يرجعلك لو كان مبلغ كويس انا برده وليد اخوكي ولا هتستخسري فيا ؟؟؟؟؟؟؟؟؟؟؟؟؟؟؟؟

Ms Venus يقول...

بس بجد احساس الاحتياج لشخص اولحضن شخص
او لحد يطبطب وموش تلاقيه
احساس بيوجع اوى
احساس الاحتياج دا بيتعب جدا


يااه يا سكرة

فعلا احساسى قاسى اوى

كل حرف كتبتيه انا حسيته اوى

أجمل ما فى الاحساس هو تلقائيته

كونى بخير دايما يا قمر

وكل ثانية وانتى جميلة وسكرة

خواطر شابة يقول...

ما الداعي للاعتذار من حقك الفضفضة والتعبير عما تشائين هذا منبرك الخاص
انا فقط استغرب نبرة اليأس والاحباط في كلامك وربطها بالسن هذا غير حقيقي عزيزتي ولايجب ان تؤمني به انطلقي في الحياة وعيشيها لذاتك قبل غيرك وتأكدي ستسعدين لاتربطي سعادتك بأحد فتشقي
تحياتي لك

(حلـم) يقول...

ابسط مايكون

حلم واقعي معقول


وطلب ملح وضروري


اتمنى ان يتحقق


بس ذبحتيني

والله اختنقت وانا بقرا

لية بصير كدة مع بناتنا الرائعات


في احلى من هذة الطيبة والصراحة والسليقة يا بشر

بس مش عاوز اتكلم

Baskouta يقول...

وحشتيني يا سكرتي
يا احلى حتة سكر هتم 28 سنة
ايه السكرة اللى مدابتش دي
لا هي دابت بس في قلوب اللى بيحبوها
تحياتي البسكوتية السكرية

حـــلـــم كـــان يقول...

اولآ

وحياه ربنا وحشانى

ثانيآ

شكلك كده داخله على مود اكتئاب ابب تييييييييييييييييييييييييييييييييت
ياريت تحافظى على نفسك منه ومش تدخلى فيه


ثالثا

وده الاهم مفيش حد ملوش حق انه يحلم
ده بالعكس ده دى الحاجه اللى من حقنا
واللى بنقدر عليها
بلاش تحرمى نفسك من اكتر حاجه من حقك

رابعآ

كل سنه انت طيبه ويارب عمرك اللى جاى يثبتلك ان احلامك مرحتش فى الهوا

Unknown يقول...

ما دا هو الوحدة اللى بيقولوا عليها

وانا اللى احنا فيها (أنا وأنتى)معرفش الباقى احواله ايه

Mano يقول...

ازيك ياسكرة وحمدالله علي سلامتك من الحادثة اللعينة
كلام جميل بس ازاي مش ليكي الحق انك تحلمي
الاحلام ملهاش سن
وطول ماحنا عايشين لينا الحق نحلم
وماتزعليش نفسك
وكل سنة وانتي طيبة

غير معرف يقول...

...... :((

Tamer Nabil Moussa يقول...

كل سنة وانتى طيبة سكرة

قعبال مليون سنة

احلمى ديما

مفيش حاجة تمنعنا اننا نحلم التمسك بالحلم مع الايام يكون واقع

مع خالص تحياتى

لــــ زهــــــراء ــــولا يقول...

سكره
-*-*
كلامك على قلوبنا زى السكر بالضبط يعنى حلو مهما كنتى كاتبه او قايله

يا ستى كل سنه وانتى بخير وسعاده ويارب هذا العام يحمل لكى السعاده والحب والخير وكل الهنا
ان شاء الله تحققى اكتر مما تتوقعى وتتمنى
وبعدين انتى ما شاء الله داخله على سن النضج الجامد يعنى عاوزين بوستات جامده اخر حاجه


زهراء

أسما يقول...

سكرة

كلامك جه علي الجرح... انا دعيتلك و دعيتلي معاكي... ربنا يرزقك باللي ياخدك في حضنه و يطبطب و يحسسك بانك مش لوحدك و انك في امان... و علي فكرة، مفيش سن قانوني للاحلام... احلمي و ادعي ان احلامك تتحقق و هي هتتحقق... ربنا يرزقك كل اللي بتتمنيه و بتحلمي بيه
:)

بصي، انا عملت الدخول لمدونتي للمدعوين فقط، و انا زعلانة جدا اني عملت كدة، بس كان البديل اني امسح المدونة خالص و ابتدي من اول وجديد... المهم، انا عايزة ابعتلك دعوة، فلو ممكن تبعتيلي الميل بتاعك( حساب جوجل، اللي بتدخلي بيه علي مدونتك) عشان ابعتلك عليه دعوة... ايميلي اهو
blackpearl_52000@yahoo.com
اشوفك عندي قريب
:)

مي يقول...

سكرتى الغاليةةةةةةة
لالالالالا ده المكتوب ده رائع وعجبنى جدا برغم انه بيوصف حالة توهان ولخبطة بس رائع بجد

كل سنة وانتى طيبة وبالف خيررررررر ويارب تعيشى كل ايامك فى حب ياسكرتى وعقبال مليون سنة

Cute Kitty **sookra يقول...

عادل
دولا حبيب رمزى اللى واعدنى ببطوله مطلقه وموش هتنازل عنها ابدا
انا قلت سامحونى لان جايز بعض الناس تكتأب بسبب اللى انا كاتباه
وبعدين ازاى تبقى ابن فاتيما وتكتأب
انت عبيط ولاايه
طيب قولها تخلينى بنتها كدا وانا صدقنى موش هاخلى الاكتئاب دا يعرف مكانى
منور يادولا
===========================
emymony
وانتى طيبه ياجميله
ميرسى ليكى ويارب يسمع منك وتتحقق احلامى
ويارب كلنا يبقى نصيبنا اجمل بكتير من خيالنا
مساكى شيكولاته
===========================
هى وظروفها
وليد بيه الدوغرى
زينه البنات كلهم الهى يجبر بخاطرك
دا من زوقك يازووووق
لاوحياه ساره ياوليد بلاش النار عشان سكره اتحرقت كتير
كفايه نار بقى
وبعدين احمد عبدالعزيز دا كان فى سوق العصر
يادى النيله انت كمان هتستنى تقاسمنى فى حقى لما يرجع
بس ياترى حقى دا عند مين؟
مساك شيكولاته
========================
ms venus
الهه الجمال هنا
يامرحبا يامرحبا
طبعا مادمتى الهه الجمال يبقى كل احاسيسك مرهفه ولازم تحسى باحساسى
منوره
مساكى شيكولاته
=======================
خواطر شابه
كلنا موش لازم نربط حياتنا ولاسعادتنا بشخص
لكن غصب عننا الظروف والمجتمع والدنيا بتربط مصيرنا وحياتنا وسعادتنا بحد
اما عن موضوع الاعتذار فانا وضحت لعادل فوق السبب
وانتى طيبه ياجميله
مساكى شيكولاته
======================
حلم
ايه دا دا انا الحلم كله وصل عندى يبقى خلاص اكيد كل احلامى ان شاءالله هتتحقق
شوفت بقى اهو دا اللى بيحصل وسلامتك من الذبح والخنقه
ولذلك فانا اعتذرت فى الاول
مساك شيكولاته
========================
Baskouta
ايه يابسكوت جامد انت دا
سكره خلاص دابت من زمان ياقمر
وبعدين خلاص ياابله انا موش هعمل كدا تانى بدال ماتجيبى كوب شاى ساخن زى ماقلتى
مساكى شيكولاته عشان تغمسى بيها البسكوت يابسكوته مشكلته انتى
============================
حلم كان
ايه ياقمر كنتى فين من زمان
وانتى كمان وحشانى دا اولا
ثانيا بقى
اسكتى موش طلع دور الاكتئاب دا له فوايد
ههههههههههههه
ثالثا
طبعا كلنا هنحلم وانتى اولنا وبطلى بقى حلم كان
ولاانتى تقصدى بكان دى المدينه الباريسيه
اااه منك انتى ياسوسه
ههههههههههههه
اما رابعا
وانتى طيبه وبصحه وسعاده
مساكى شيكولاته
================================
العيسوى الصغير
ايه دا وانت كمان هنا
ماشى يلانشوف مين معانا فى الاكتئاب
منور
===============================
mano

الله يسلمك يارب
انا الحمدلله زى القطط بسبع ارواح وبعد الحادثه زادوا روح كمان
هههههههههههههههه
هنحاول نحلم ونحاول نحقق احلامنا
مساك شيكولاته
===================
Hager Za3bel

مافهمتش لغه الاشاره دى والله يابنتى
وضحى تانى
مساكى شيكولاته
============================

Tamer Nabil
وانت باالف خير يارب
مليون سنه ياعم حرام عليك انا كفايه عليا 30 سنه بس اقدر على ذنوبهم هناك عند ربنا
يارب يبقى واقع
مساك شيكولاته
===============================
لولا وزهره

اللع عليكم
ربنا يخليكم يارب وميرسى على زوقكم ياجميلات
سن النضج طيب انا اخاف على نفسى بقى الا ممكن اتاكل بعد النضج دا
ههههههههههههه
منورين بجد
اما بوستات جامده دى بقى فموش هاوعدكم
اصل انا لابعرف اكتب ولانيله ادينى بعك وخلاص
مساكم شيكولاته باالوان كل الزهور
========================
Isolde

سلامتك من كل الجراح وسورى انى كلامى وجعك
ربنا يحفظ ياحبيبتى وينورلك طريقك كمان وكمان وتحققى كل احلامك
اما موضوع الدعوه فعلم يافندم وجارى التنفيذ
ربنا يسعدك ياجميله

adel يقول...

طب خلاص ماشي
هاقولها تتبناتكي
وكده يبقي (دولا-سكرة-بسكوتة) و كمان الاساسي (يسوفه) نفتح محل بقالة يعني !!!!
:):):)