BLOGGER TEMPLATES AND TWITTER BACKGROUNDS »

الاثنين، 7 ديسمبر 2009

مين


مين ياخد قلبى المليان
ويدينى قلبى الفاضى
مين ياخد عمرى القلقان
ويدينى عمرى الماضى
ماشى بدون قدم
مسنود على العدم
اضحك فى الضحكه شوكه بتضحك من الالم
الم يطول
واصرخ واقول
مييييييييييييييييييييين
مين ياخد قلبى المليان
ويدينى قلبى الفاضى
مين ياخد عمرى القلقان
ويدينى عمرى الماضى
مين مين مين؟!!!
!!!!!!
طبعا كلكم عارفين ان دى اغنيه الكنج منير
مافيش كلامى اقوله اكتر من اللى هو قاله
-------------------------------------



بلياتشو قال ايه فايده فنونى؟
وتلات وقق مساحيق بيلونونى
والطبل والزمامير وكتر الجعير
اذا كان جنون زبونى زاد عن جنونى
عجبى!!

عجبى عليا وانا عامله زى البلياتشو
اى حد بيعرفنى فى الحياه بيقول
يااه دمها شربات وعسوله
بعرف اخليهم يضحكوا كويس
وبضحك انا كمان معاهم على نفسى
ايوه بضحك عليا لانى بجد ماحدش بيقدر يضحكنى من قلبى
تعرفوا انا قعدت افكر كدا انا من امتى ضحكت من قلبى لقيتنى بقالى
كتيرررررررررررر
اوى ماضحكتش من قلبى
نفسى اضحك بقى
ااااااااااااااااااااااه
نفسى اضحك من قلبى نفسى قلبى يبقى سعيد
نفسى افرح واجرى والعب
نفسى انزل البحر
افرد شعرى وانزل الميه واغسل قلبى فى قلب الميه
نفسى فى حاجات كتيره اوى
حاجات صغيره اوى وبسيطه اوى
بس هتفرحنى اوى
الناس اللى حواليه بيحاولوا يضحكونى بضحك واجاملهم واخبى فى قلبى
ماهو لازم اخبى
ولازم يكون فيه صندوق مقفول موش يفتح لاى حد
واحيانا لازم موش يتفتح نهائى
هناك فى مكان ما احساس
احساس جوايا فى حته بعيده لايصلها نور ولايصلها صوت
تحيا فى صمت وظلام دائم ولااستطيع ان احكيها
نفسى اصرخ
اصرررررررررررررررررخ
واقول
ايه؟
هاقول كتير
شيما بتقولى بطلى اكتئاب
والله يابنتى بحاول بس غصب عنى
يعنى كدا على بلاطه انا انسانه مكتئبه ومريضه نفسيا


تعرفوا انا بأجى هنا
واكتب واكتب يمكن ارتاح
ومع كل كلمه بتنزل دمعه تكوينى وتجرحنى وكمان تعلم اوى على خدى
امسحها واقولها ارجوكى بلاش تسيبى اثر
ماما هتقلق لو شافتنى كدا
وهى ابدا تفضل تحفر وتحفر وتحفر
جوه روحى
وانا اقاوم واقاوم وفى الاخر استسلم لها
اسيبها تنزل وتتحرك وتجرى وتلسعنى اوى
انا عامله زى البلياتشو
بضحك الناس لكن من جوايا فيه
اطنان واطنان من الحزن
اااااااااااااااااااااااه
ياانى

سيبكم طبعا موش فاهمين بس عادى هو مين قبلكم فهم
!!!!!!!!!!!!!!




11 التعليقات:

(Joudy) يقول...

زمان وأنا صغيرة كنت فاكرة إن البلياتشو ده واحد مبسوط على طول بيضحك ديما ومش بيكشر طلع أكتر الناس حزننا هما اللى بيضحكوا غيرهم بقيت مش فاهمة ليه بعملوا كده عرفت فعلا لما بقيت شبههم أضحك غيرى وخلاص اعتقاد أهبل انى هلاقى سعادتى فى سعادتهم لكن للأسف لا وفعلا عجبى

دمتى بكل الخير والسعادة

♥نبع الغرام♥♪≈ يقول...

بجد حساااكى اوووووووى

ربنا معاكى يا حبيبتى

Aиgel يقول...


صباح الخير يا سكره

ليه بس كده دي الحياة بقى لونها بمبي
(:

حبيبتي طبعاً أنا مش فاهمة سبب حزنك بس لكل منا لحظات بينفرد بيها بنفسه وللأسف الحزن دايماً بيكون هو المسيطر في اللحظات دي .. أقدر أقولك أن أنا بدرجة كبيرة أوي شبه حالتك كده

بس تعرفي بعمل إيه كنت بنام في غالب الأمر بقيت بسهر لوحدي على التليفزيون والأفلام وفي الأخر قررت أن أضحك قلبي غصب عنه اقعدي مع ناس بتحبيهم افتحوا كلام بعيد عن أي حاجة هتضايقك أوي ابعدي بأي حوار هيقربك من أي أمر محزن وتعيس
أضحكي وضحكي قلبك غصب عنه عشان لما بنفضل نقول أمتى هيجي اليوم اللي اضحك فيه من قلبي ده بننسى قلبنا خالص وبيفضل في وضع السكون حد ما بيقسى أوي ويمكن بعد كده منقدرش نوصله الضحك ده أبدا لأنه هو اللي هيأثر علينا بقساوته
يمكن تقولي أني معنديش أي مشاكل وأني بقول كلام وخلاص بس والله ربنا اللي عالم بالأحوال وربنا يا سكرة لو سألوا عائلتي والناس اللي تعرفني من قريب أوي مين أسعد واحدة في الدنيا هيقولوا عبير .. من كتر ما بضحك بس محدش بيبقى عارف اللي جوايا بس عارفه أنا كده بنشط قلبي أول بأول لحد ما الاقيه بيقولي بس كفاية أنا بجد هموت من الضحك D:

والنبي حاولي تعملي اللي قلت لك عليه لحسن والله أجي ازغزغلك قلبك ده
(:
بحبك قي الله
ومش عايزه أشوفك زعلانة .. بس لو لاقيتي نفسك زعلانة اكتبلنا مش تتداري علينا

وصباحك ورد

Angel love

Aиgel يقول...

صحيحي أنا مش عارفه أكتب أي كومينت على تمر حنة خالص مش عارفه ليه ؟؟؟


المهم أني بحب أغنية تمر حنة أوي وبحب الفيلم ومعنى الأغنية وبحب نعيمة عاكف كلها دلع وحيويه


والبوست التاني حلو أوي الكلمات وعجبتني بجد (:

احلام جوليا يقول...

سكرة بتمري بمرحلة حزن اتمنى من الله ان تخرجي منها لو كلنا بصينا للجزء الناقص من حياتنا حنبقى تعساء لان الحياة لا تكتمل مع احد مهما كان حاولي تنظري لما لديك من نعم وتري الجمال فيها ابحثي عن السعادة ولا تنتظريها دوري عليها وحتلاقيها ان شاء الله
سكرة قلتلي لي ان في مشكلة في فتح مدونتي انا مش عارفة هي ايه وازاي احلها لو تعرفي ارجو انك تساعديني لاني مش شاطرة في حكاية النت دي خالص

mimi يقول...

أنا فهمت

الله يعينك ، وإن مع العسر يسرا

تحياتي

خواطر شابة يقول...

كلنا هذا الرجل عزيزتي
لكن مع ذلك الحياة تستمر بحلوها بمرها مرة نضحك من القلب مرة ضحكة صفراء مرة مفيش والمحصلة هو عمرنا الذي بين ايدينا
تحياتي لك

غير معرف يقول...

طيب هو ينفع ياسكره تقولي إننا مش فاهمين
والله كلنا فاهمين وكلنا مخنوقين وزهقانين
وعايزين نهرب
مخنوقين من إيه ؟
زهقانين من إيه ؟

بصراحه مفيش سبب
إحساس عام بالحزن عند كل المدونين
نوع من نقيض المشروع القومي اللي بيجمع الناس ويفرحهم
أهو هو ده بقي
حزن قومي حزن عام بيبعدنا عن كل اللي حوالينا
حتي لو الواحد إتكلم وفضفض معاكم
بيحس بردو إن مفيش حاجه أتغيرت
إذا كان اللي بتفضفض معاه هو نفسه مخنوق زيك وممكن أكتر منك
إيه السبب مش عارف
بس مش ملاحظ الحزن ده إلا في فئة عمريه معينه من المدونين

عايزين نهرب من إيه ؟
والله ما أنا عارف
يمكن حاسين إن ممكن كانت الحياه تبقي أحسن
بلدنا تبقي أحسن
نقابل حب أجمل وأحسن
مش عارف ولو سألتي أي حد مش هيعرف بردو

معلش رغييييت كتير
بس كلامك خلاني أقول

C U Soon

مي يقول...

بصى للدنيا ياسكرتى بعين تانية عين جديدة اخلعى قلبك وحطى قلب جديد امسحى اى حاجة وحشة فى الذاكرة لو مش عجبك نفسك غيريها خالص بس ابداى بقى العمر بيعدى بينا
ليه منقضيش وقتنا مبسوطين هناخد ايه من حزننا ولالالالالالا حاجة
اكتبى خرجى غضبك اصرررخى بس فوقى وارجعى لنفسك واضحكى وافرحى وحاولى تلاقى الفرح بس دورى عليه كويس وهتلاقية ادامك وان الحزن كان حاطط غشاوة على عينيكى
ربنا يبعد عنك الحزن والهم ياسكرتى

lostlove يقول...

بوست رائع واحساس جميل مع انو حزين بس كتير مننا جوه كده يمكن عشان بقي الفرح قليل ويمكن عشان الناس نسيت انها تضحك
بس بجد في حجات كتير ممكن تفرح وزي ما قلتي ممكن تكون صغيره بس بنسبه لينا بتخلينا في قمه السعاده
اعمالي اي حاجه تفرحك مهما كانت صغيره وبسيطه هتلاقي نفسك ابتسمتي واعملي حاجه تاني هتلاقي ضحكه كبيره شويه اعملي بقي كمان حاجه مش هتبطلي ضحك بس جربي تدوري جواكي علي الحجات الصغيره ديه
واكيد هتلاقي زكريات قديمه صوره غربيه لححد من صحابك اخواتك فيه زكره ليوم جميل مهما يجي بعديه حزن هتفضلي فاكره الضحكه ديه عشان بتكون طلعت من القلب فجاء واتسجلت واتحفرت جوانا
ويارب يارب اجي المره الجايه القي بوست كله زكريات سعاده وفرح
واتمني ليكي التوفيق

لــــ زهــــــراء ــــولا يقول...

ليه بس التشاؤم ده كله
انظرى الى نصف الكوب المليان
توقعى الخير على الدوام وان شاء الله ربنا يفرح قلبك ويسعد ايامك وتشوفى كل الخير
فى انتظار كل ما هو جديد منك