BLOGGER TEMPLATES AND TWITTER BACKGROUNDS »

الاثنين، 7 ديسمبر 2009

لخبطه..


طيب انتوا معايا
وحاسه بغربه
اومال لو بعدتوا هيحصلى ايه؟
اوعوا تزعلو منى
انا جيت تعبانه ومخنوقه وحزينه
تعبت اكتر واتخنقت اكتر وحزنت اكتر
يمكن عشان قلبى ضعيف
بس ازاى
انا قلبى جامد قوى جدا خالص اخر حاجه
على فكره انا كدابه
انا اضعف من اضعف ضعيف
انا بيتهيألى ان انا نمله سهل ينداس عليها ومحدش حتى يحس
انا اسفه
انا اسفه
ايوه بقولك اتعودت وعرفت اقول انا اسفه
بس ياترى انت عرفت تقدر انى ماكنتش بحب ازعلك ولابرتاح لما بتزعل منى
ياترى فكرت انى كنت كل ثانيه بفكر اعمل حاجه تفرحك
او افكر ايه الحاجه البسيطه اللى لو جبتهالك هتفرحك وممكن اشوف بس فى عنيك نظره رضا
نظره!!
انت عارف انا اد ايه مشتاقه لنظره عنيك
انت عارف انا اد ايه مشتاقه انى اسمع صوتك
صوتك!!
عارف اد ايه مسكت موبايلى واتصلت برقمك عشان بس اسمع صوتك
وماكنتش بقدر اكمل
عارف ليه لانك ببساطه وجعتنى وجرحتنى وحسستنى ان انا صرصار مقلوب على دهره
انا بجد زعلانه منك اوى
بس لما اتصلت بيا وشفت بس رقمك عارف قلبى دق ازاى
عارف كل اعصابى كانت متوتره ازاى
عارف حاولت اد ايه موش اقولك وحشتنى وبحبك من اول مارديت
عارف مسكت نفسى ازاى عشان ابان عاديه اوى وموش فارق معايا اتصالك
عارف ليه كل دا
لانك الوحيد اللى كان بيقدر ينسينى حتى نفسى
واحشنى اوى اوى
اسكت
اسكت ماتتكلمش ماتقولش اى حاجه ولاتعمل اى حاجه زى مااتعودت منك
اتعودت على كدا بس بيجرح اوى انك تحس انك زباله وموش فارق وجودك فى حياه حد وجوده فى حياتك بيخليك اسعد انسان فى الدنيا
انا فاكره مره قلتلى
ان لازم وجودى فى حياتك يبقى بنفس اهميه وجودك فى حياتى
يعنى ماتستناش وجودك يبقى مهم فى حياه حد وجوده مهم فى حياتك



معلش دوشتكم بس جوايا لخبطه كتيره اوى وبحاول اهدى اللعب معايا
لانى انا تعبانه اوى من انا
اصل انا دى بنت موش لذيذه خالص
بنت كدا عايشه وخلاص
ماطرح ماترسى دوقلها
لا
انا موش كدا
انا حزينه وتعبانه وحاسه بالوحده اوى
اوعوا حد يزعل ولايفهمنى غلط
انا بس بحاول افهم لخبطتى دى
عاوزه الم انا بقى عشان تحترم قلبها شويه
نفسى انا تحترم قلبها ومشاعرها
نفسى انا تحس انها مهمه وتحس انها سعيده
نفسى انا تحبنى
قالولى حبى نفسك ياسكره عشان هى تستاهل تتحب
بس انا شايفه ان انا موش تستاهل تتحب
دى تستاهل تاخد بالشوز القديمه يمكن تفوق من جنانها دا اللى مالوش نهايه
ازاى انا قادره تكمل من غير قلبها
اصل انا دى واحده كدا تيت خالص
انا محتاره
انا مخنوقه
انا حزينه
انا وحيده انا زهقانه
انا بتحبكم والله
وبتحزن عشانكم
وبتفرح ليكم
بس هى موش قادره انها تفرح لنفسها لانها بجد بجد حزينه
شيما تقول نفضى هدومك واقفى
فقرى يقول انسى كل حاجه
فاتيما تقول ابداى صفحه جديده
لكن انا موش عارفه تسكت انا
ااااااااااااااااه
انا تعبت والله من انا
ماحدش ياخد انا ويرجعهالى بعد مايظبط صواميل مخها ويقفل قلبها بمفتاح ويرميه
انا دى
ييييييييييييييييييييييييييييييييييييييييييييييييييي


22 التعليقات:

سوبيا يقول...

هو مين فينا اللي كتب الكلام ده ؟
بجد انا حاسه انك نقلتيه من الكراسة يتاعتي اللي باكتب فيها خواطري .

مش هاقولك غير حاولي.
على قد ما تقدري حاولي تحافظي على نقطة الأمل الصغنونة جواكي عشان لما تفرحي تعرفي قيمة الفرح زي ما دلوقتي انت حسه قوي قوي قيمة الحزن اللي غرقانة فيه .

واقول له هو اتقي الله في الحب ده بجد لاته ميتعوضش وميتقدرش وخسارة الوقت ده تقضوه بعيد عن بعض لان ما فيش حاجه في الدنيا احلى من لميتكو سوا ولا حاجه تقدر تعوض بعدكو عن بعض

وبعدين هتفضلوا كده كتير؟واحاسيسكو الحلوة تتسرسب منكو وقلوبكو تقسى ؟

صدقيني مش هتقدري تكملي من غير قلبك الا لما قلبك يقدر يكمل من غيرك اووووووووف بجد انا مضايقلك جدا وخلتيني بكيت لاني مريت بكل ده وافتكرته تاني معاكي دلوقتي بس عارفه اول ماهتكلموا هتنسوا كل حاجه صدقيني ! ربنا يريح قلبك ويروق بالك ويهديكوا لبعض امين يا رب وابقى طمنيني عليكي ومتخافيش انتي مش لواحدك ابدا الا لو انتي عاوزه تبقي لواحدك وبرضه هنغلس عليكي لان محدش يقدر يعيش لوحده 
اختك سوبيا "شيش وإزاز"
سلام


 

Dr. Ibrahim يقول...

"أنا" عايزة علقة محترمة بإيد المقشة وهتبقى تمام:)

غير معرف يقول...

طيب وليه الحزن الكتيير ده بس
هي الدنيا عامله معانا كده ليه
كل الناس قرفانه وزهقانه
وأحوالنا بتتقلب من ساعه لساعه

لسه إنتي كنتي كاتبه مقال ( الحضانه )
وحسستينا إن الدنيا فيها حب وحنيه وأشياء جميله
وبعدها علي طول تتدخلي في حاله زي دي

ربنا معاكي
ودايما إرجعي ليه وهو يهديكي لراحة البال

سلام

Heba Gamal Emara يقول...

مش عارفه يا سكرة ارد عليكى واقوللك ايه ؟؟؟؟
بس صدقينى محدش حاسس بسكرة غيرك ومحدش هيقدر يطلعك من مشاكلك غير سكرة

عيشى حياتك

وواجهى نفسك وكل اللى بتحبيهم

وواجهى اى حد يضايقك وردى عليه

ومتلوميش نفسك كتير اوى اوى اوى كده

حرام عليكى نفسك والله يا بنتى

كفايه بقى

كــــــــــفـــــــــايــــــه 

احلام جوليا يقول...

اول تعليق صباح الفل يا سكرة

احلام جوليا يقول...

سكرة السكرة انا كمان جوايا لخبطة كتير قوي وحسيت بك يمكن لاني عاوزة اتكلم زيك واقول براحتي بس معنديش جراتك تعرفي الواحد نفسه مرة واحده يقول كل الي جواه بصراحة وبراحة بس مش عارف ماشاء الله عليك مش بتخبي جواك بوست حساس

صيدلانيه طالعه نازله يقول...

ليه الحزن ده كله و اللخبطه دى مفيش حاجه فى الدنيا تستاهل انها تزعلنا و تلخبطنا و لو فكرتى حتلاقى حل لكل مشكلهبتواجهك

كلام عيب يقول...

ازيك يا سكره
مالك زعلانه ليه
كبرى يا بنتى و بلاش تشيلى الهم مفيش حاجه تستاهل

شفـقــة و إحســــان يقول...

دي إيه اللخبطة دي كلها ؟؟؟؟؟؟
إنتي لخبطتيني أنا كمااااااان
أقولك فكرة ممكن تطلعنا من اللخبطة دي ؟
وتخليكي تتصالحي مع نفسك ومع الكون كله ؟
إعملي حاجة مفيدة لغيرك
حد من حواليكي .. من أهلك .. من قرايبك
حد تعبان .. أو حد غلبان
إشتركي في جمعية خيرية أو تنموية
ساهمي بمالك أومجهودك أو وقتك
صدقيني .. وعن تجربة شخصية
لو قدرتي ترسمي بسمة على وجوه الآخرين
ساعتها بس .. لن تفارق الإبتسامة شفتيك

باقولك ايه .......
إيه رأيك تشاركي في يوم البؤجة الجاي ؟؟؟
فكري !!!

أخوك/ إحســـان

خواطر شابة يقول...

"ماحدش ياخد انا ويرجعهالى بعد مايظبط صواميل مخها ويقفل قلبها بمفتاح ويرميه"
يا حبيبتي مفيش حد غيرك في العالم ده يتفع يعمل ده فقوي قلبك واظبطي بنفسك صواميل مخك أما عن قلبك ابقي اقفليه بس مترميش المفتاح خبيه في حته أمان لحد ما يجي اللي بجد بجد يستاهل وابقي انضربي على قلبك واديهوله
تحياتي لك

blue-wave يقول...

مش قادر اقولك غير ربنا معاكى

طهر فؤادك يقول...

السلام عليكم ورحمة الله وبركاتة ,,,

ربنا يكرمك ويسعدك ويبعد عنك الهم والغم والحزن اللهم امين والمسلمين ويثبتك على طاعة الله وحسن عبادتة ويهديكى الى الطريق السليم اللهم امين ...

حبيبت اول زيارة تبقى دعاء ليكى والمسلمين وربنا يتقبل ان شاء الله ويوفقك الى مايحبة الله ويرضااااة واللهم امين والمسلمين .

ولا تحززنى ان الله معنااااااا

فكرة من الزمن ده يقول...

سكرة سكرورة وحشتيني
ايه اللخبطيشن ده
موش مهم
المهم انك نفضي اللي جواكي
وقولي ولا يهمك سامعينك وحاسين بيكي هي دي فايديتنا في حياة بعض
لكن تعرفي من كم الحزن ده
والصراع ده
زي متكوني بتبكي وتفضفضيي مع حد وتلافيه قالك كلمة ضحكتك تلاقي نفسك بتضحكي زي المجنونة وعنيكي كلها دموع
انا علمت كده اول ماقريت الجملة دي

صرصار مقلوب على دهره


ههههههه
ليه كده بتفسي على نفسك اوي كده
لو ده بيريحك اعمليه لكن للازم تفهمي انك مش كده عشان احنا عارفينك
تحياتي

فكرة من الزمن ده يقول...

طيب كده انا بحب اشوف تعليقي بعد ما ابعته ولو في كلام غلط اغيره اشوفي كيف دلوكيت

♥ •. مناكيش .•♥ يقول...

فكرتينى بأغنية لايهاب توفيق بيقول فيها الله يكون فى عونك ياللى جواك احساس ياللى بتخاف عالناس ياللى بتحس بغيرك لو حتى محسش غيرك
بس انتى بقى كاتباها بطريقة ستى وستك
انا نفسى حسيت بلخبطه لغاية مخى مالف
ربنا يقويكى ..

نعكشة يقول...

رغم اختلاف الحياتات
والمواقف

إلا إن هناك تشابة في المشاعر
بنلاقية في ناس

....

فكرة ان الواحد مش لوحدة بتريح شوية

بس مبتفيدش صراحة

عامة

اتمنى من الله ان ينعم عليكي بالرضا و السكينة

سلام عليكِ

(Joudy) يقول...

إنتى هتقوليلى على أنا دى دى أنا بتعتى مدوخانى عايزة علقة محترمة علشان تبطل اللى هى فيه ياااااااااه على اللى أصحابى بيعملوه معاها ودى يتصلح حالة ساعة وترجع أسوأ اللى ياخد بتاعتك يجى ياخد بتعتها وياها ينوبك ثواب

دمتى بكل الخير والسعادة

donya يقول...

مساء الخير
احساس اللخبطه ده بيجي للناس الحساسه اللي بتحب تعمل كل حاجه بجد وبكل وجدنها

وبتتصدم بالحياة جامد

علشان اغلب الناس بقوا من غير مشاعر حقيقيه

انتي صح ماتتلخبطيش

وقولي لنفسك انا صح وحقيقه الناس مش قدها

تحياتي

donya يقول...

مش عارفه انا عملت كومنت والنت فصل ياتري اتنشر والا لا
هبقي ارجع تاني اشوف

تحياتي

Mona يقول...

أستهدى بالله كده وفكرى ايه الى مزعلك بالضبط وفى نفس الوقت فكرى فى ايه الى مخليكة أنسانة مميزة لو أنت مالكيش لازمة كان ربنا لم يخلقك من أصله وبعدين الى يحب حد ياسها يقول له يقول له أد ايه هو كان وحشه ليه تخبى أمال هو أتصل بك ليه ليه دايما نلوم الاخرين ونكون أحنا الى بتعمل حاجة غلط ليه متخلية ان هو بس الى بيعملك غلك فاكرى كده مش يمكن انت كمان بتعامليه غلط ومعاملته لك بناء على تصرفك كونى شجاعة وصريحة ماتخليش حاجة فى قلبك ولا تقولى كرامتى ولا الكلام الفارغ ده لو هو زوجك وفيه خلاف رجعى نفسك ولو خطيبك برضة راجعى نفسك ولو حبيبك برضة يا سها راجعى نفسك وماتبقيش مترددة ومتلخبطة لو هو الى فاهمك وحاسس بك يبقى من باب أولى هو الى تقولى له شكوتك وخصوصا لو زوجك وطالما قلتى الصفة ديه فيه يبقى فيه صفات أخرى كويسة لا تضيعها بلخبطة ليس لها لازمة حبى نفسك اولا وحنى عليها علشان تعرفى تحبيه ولاتنتظرى من أحد أن ينصحك غير نفسك ومهما حد نصحك فأنت الوحيدة الى فى ايديكى حياتك أحنا مجرد هوامش فى حياتك ولا نعرف حقيقتها كما أنك لا تعرفين من نحن ولاتعرفين ما يوجد بداخلنا ولكل منا حكاية ولخبطة والشاطر من يتحدى هذه اللخبطة ولا يترك نفسه له - كلميو قولى له أحبك ولا أقدر أن أستغنى عنك مش عيب صدقينى مش عيب ومش حتنجرح كرامتك
كفاية عليك كده ياست يا أم الشيكولاتة

mimi يقول...

صعب احساسك وكلامك

يارب تكوني كويسة
تحياتي

Cute Kitty **sookra يقول...

سوبيا

شيش وازاز
ابقى اقفلى الازاز عشان موش ادخل وانقل من كراستك تانى
هههههههههههههه

منوره
--------------------------
دكتور ابراهيم

على الله ثم عليك العلقه دى
ههههههههههه
منور
---------------------
بلاك شواك

فيها من دا ومن دا
وهى كدا موش على حال واحد

منور
----------------------
هبه جمال عماره

عندك حق
هى سكره بس لما الاقيها

----------------------
احلام جوليا

مكن سبب تعبى انى موش بخبى
يعنى موش ميزه لانى موش بستفاد حاجه غير ان كل الناس تبقى شايفانى كتاب مفتوح

منوره
---------------------
صيدلانيه طالعه نازله

احيانا مشاكلنا بتعمينا
وفيه حاجات كتير تستاهل
منوره
-------------------
كلاب عيب

والله عيب عليكى انك تقولى كدا
ههههههههه
ان ماكنتيش شايفه اللى احنا فيه
منوره
-------------------
شفقه واحسان

اخى احسان
انا م الفلاحين يعنى مافيش الحريه اللى بتتكلم عنها دى
جمعيات وكلام من ده
بفكر ويمكن دا اللى مزعلنى انى بفكر ومع ذلك موش هاقدر اجى

منور
-----------------
خواطر شابه

جه اللى ياخد قلبى واديته المفتاح بس هو رماه فى وشى
هههههههههههههه
منوره
--------------------
بلو ويف

يارب

منور
---------------------------
طهر فؤادك

يارب يتقبل دعائك ومتشكره ليك

منور ويارب ماتكونش الاخيره
-------------------------
فكره من الزمن ده


وحشانى بجد
وصرصار مقلوب دى قريتها عند حد وحسيت انها انا وعشان كدا سرقتها منه او منها
يارب هى بس موش تزعل وتقولى ملكيه افكار
تعالى بقى صححى زى ماانتى عاوزه وهاجيبلك كوبايه شاى تمام كدا عشان تصححى بمزاج
هههههههههههههههه

منوره
---------------
مناكيش

انا لخبطك ؟
طيب يارب اتشك فى صوابعينى عشان لخبطك
هههههههههه
بطلى اغانى بقى
ههههههههه
منوره
----------------------
نعكشه

والله عندك حق بتريح شويه لكن مابتفدش


يارب يارب
منوره
-------------------------
جودى

هى انا عندك كمان ملخبطاكى
طيب تعالى نلمهم على بعض ونضربهم
ههههههههههههه

طيب هابقى ابعتهولك
منوره

------------------
دنيا

تسلمى على التشجيع دا
بس لو عم اوشو يعرف يفسرلى حالتى يبقى كتر خيره
ههههههههه
منوره بجد
تعالى تانى وتالت وميه
انا صحيح موش بكتب كلام متظبط كدا
بس اهو بكتب اللى بحسه
-----------------------
ماما منى

اسمحيلى بس انتى موش تعرفى الموضوع كله
لما اتصل اتصل عشان شغل موش عشان اجتماعيات وحب وكلام من دا
لانه موش ليا ولاانا ليه

منورانى
----------------------------
ميمى

اتمنى على الله ان اكون كويسه
بس موش بيتهيألى
منوره