BLOGGER TEMPLATES AND TWITTER BACKGROUNDS »

الأربعاء، 18 نوفمبر 2009

يابسكويت خالص يامهندم.


يابسكويت خالص يامهندم
ربنا يحرقك الليله يافندم

اه وربنا انا بدعى عليه.
احكيلكم الحكايه....
انا متعوده انى فى اى مواصلات يااخد الكرسى اللى جنب السواق لوحدى او لو ركبت فى الكراسى التانيه اخد مكان اتنين عشان لاحد يتزنق فيا ولاحد يغلس عليا واخد راحتى ومحدش كمان يضايقنى .
اوووم ايه اللى حصل,
كنت كدا رايحه المحافظه اقابل وكيل وزاره التربيه والتعليم.
وعملت اللى متعوده عليه فى المواصلات واخدت مكان اتنين وقعدت جنب الشباك وسبت بينى وبين الافندى اللى جنبى براااااح.
وطبعا كما هى عادتى الزفت برده لما اركب مواصلات بسرح اوى وافضل باصه بره الشباك وموش حاسه اغلب الاحيان بالناس جوه.
وفجأه كدا ياخواتى الاقينى كدا حاسه بحركه غريبه جنبى واتلفت بسرعه ابص الاقى ايده اللى تتقطع لازقه فيا كدا قمت باصاله كدا شذرا وقلتله"ماتشيل ايدك ياخويا
يعنى انا واخده مكان اتنين عشان الحركات الزباله دى وبرده مافيش فايده"
قام باصصلى كدا وقالى جرى ايه يامدام هو انا جيت جنبك..
قلتله يالهوى على البجاحه ايه هو خلاص ماعدش فيه دم كدا,
ايه بقيتوا كدا ليه,
الله يحرقك ويحرق كل اصنافك,
قعدوا الناس يهدوا فيا وواحد يقولى ماعلش يابنتى اعذريه اصله راجل ناقص
قلتله لاياعموا دا مايتقالش عليه راجل اصلا.
وسكت. وهو قعد حاطط ايديه على الكرسى اللى قدامه كدا وكل شويه يبصلى كدا وكأنى عملت عمله او قتلتله قتيل.
الهى يحرقك يااخى وكمان عاملى فيه محترم,
الهى يحرقك يااخى ويحرق كل امثالك.
طيب بيقولوا ان العرى والستات والبنات هى اللى خلت الرجاله تتحرش بيهم
طيب هتقولوا ايه وانا منتقبه يعنى لاضيق ولاعريان يبقى ايه بقى
اوووووووووووف ربنا يريحنا بقى من الهم دا
وتعرفوا طلع فى النهايه ......(محامى).....
الحق ياصاصا محامى يعنى موش شحات ولاحرامى بس انما كمان متحرش...
هههههههههههه
حاميها حراميها.
الموقف دا فكرنى بموقف حصلى فى اسكندريه من حوالى 5 سنين
كنت واخده مشروع من المحطه لابوسليمان وبعدين السواق خير اللهم مااجعله خير كان شارب ولاايه وعمل بينا حادثه.
اه وربنا حادثه وانا اتبهدلت اوى بس الحمدلله ماكانش في اى اصابات دائمه.
المهم الناس كدا اتلمت ودا بيسند دا وانا كدا الدنيا بتلف بيا والاقى ايد بتمسك (اوعوا تفكيركم يروح هنا ولاهنا)بتمسك ايدى وتقومنى وقمت من غير ماابص ايد مين دى وبعدين الاقيه بيلف ايديه حوالين وسطى كدا قال ايه بيسندنى ومن غير تفكير الاقى ايدى كدا بتفرقع على وشه وفوقت خالص كدا والتانيه بتفرقع على الناحيه التانيه وابصله الاقيه الملهى على عين اللى جايبينه السواق
اتوكس ياموكوس جاتك ستين واكسه ماشيه مع وكسه وراكبه واكسه تانيه ويفوتوا على كل الوكسات اصحابهم وييجوا لك انت لوحدك..عشان يوكسوك على وكستك ياموكوس.
ربنا يريحنا من الاشكال دى بقى

يابسكويت خالص يامهندم
الهى يحرقك الليله يافندم
تطلعوا بايه بقى من البوست الطويل العريض دا
ان موش كل افندم يبقى راجل محترم
وموش كل راجل محترم لازم يبقى افندم
ههههههههههههه
سلام.

15 التعليقات:

غير معرف يقول...

بجد حضرتك زعلتيني
وضايقتيني
مش هقول إني ماشفتش حاجه زي دي قبل كده
بس لما بسمع إنها بتتكرر
بتضايق قوي
ربنا يثبتك علي إيمانك ويقيكي شر ولاد الموكوسه
بس بجد حضرتك أسلوبك جميل

بالتوفيق دائما

Cute Kitty **sookra يقول...

Blackshwak
مبروك عليك اول تعليق وعندى طقس كدا فى مدونتى ان لاول تعليق بياخد شيكولاته
وانا لما اروح ازور حد واكون اول تعليق برده باخد شيكولاته
شيكولاتك هاوديهالك عندك
ههههههههههههه
ربنا يرحمنا من الاشكال دى بقى

غير معرف يقول...

أسف لو المدونه مفتحتش مع حضرتك
كنت قافلها للتحسينات ودلوقتي خلاص فتحتها
ويشرفني زيارة حضرتك ومعرفة رأيك في مدونتي حتي لو مجبتيش معاكي أي حاجه

وأعذريني إذا تركتي تعليق ولم أرد عليه إلا غدا
فأنا عامة بتأخر شويه في الردود

أسف علي الرغي الكتيير

سلااااموووا عليكوووااا

الشعب لابد له من حكومه تشكمه يقول...

قالك يامدام؟؟؟؟؟؟؟؟؟ ياحينى دا فعلا موش متربى:))

ابأى تعالى احكيلك على نوادر السوبر جيت:) بما انى كنت بسافر ادرس فى قاهره المعز,..
دول عالم لطيييييفه انا زيك لازمن وحتمن اقع
جمب الشباك بس لايونكن اسرح ابدااااا..

دول كتروا فى البلد من زمان,بس لما بيلاقوا واحده تشكمهم بيتلموا علطول,وخصوصا لما صوتك يعلى شويه تلاقيهم زى الكتكوت المبلول:)
فى رجاله كده متجيش غير لما تاخد على دماغها.

donya يقول...

مساء الخير
البوست فعلا دمه خفيف
وبعدين التحرش بقي بالمنقبه والمحجبه والسافره والكبيره والصغيره
مابقاش في قاعده والا حاجه في حاجه لأي حاجه

تحياتي

همس الاحباب يقول...

ههههههههههه
ايه كم الوكسات اللى حلت فى البوست
وعلى السواق دى
هههههههه
فعلا الموكوس يشوف عربيته والوكسة اللى فيها وبعدين يعمل حركات وكسة
هههههه
متخيل منظرك ومش عارف امسك نفسى من الضحك بجد
تحياتى

♥نبع الغرام♥♪≈ يقول...

هههههههههههه


حصلى انا كمان يا اختشى مش لوحدك

هههههههههههههههههههه

♥نبع الغرام♥♪≈ يقول...

قطيعه تقطعهم الرجاله يا اختشى خدنا منهم اية غير حلاقه الدقن

يا شماتت ابلة ظاظا فيا

هههههههههههههههههههههه

♥نبع الغرام♥♪≈ يقول...

ودامت عربياتكم عامرة بالمحامين
هههههههههههههههههههههههههه


الهى يحرقه بجاز والكل كليلة

قولى امين

عااااااااااااااااااا

♥نبع الغرام♥♪≈ يقول...

وحشتينى قووووووووووووى

ربنا يسعدك
ويارب النصر لمصر قولى امين
مووووووووووووووووووووواة

!! a7mad sala7 !! يقول...

ههههههههههههههههههههههههه

بس انا عايز اعرف حاجة
هو بتشتم وقاعد ساكت كده
مبيدافعش عن نفسه خالص
دا محامى يعنى


وحلو اوى موضوع وشه بيفرقع ده :D

عالم معندهاش دم

دانا بركب فى الموصلات بفضل مقنفد فى نفسي لحد مانزل والله

top-fn يقول...

لا حول ولا قوة الا بالله العلي العظيمـ

بصراحة المواقف دي تجيب الاحباط مش تضحكـ

اللهمـ ثبتنا ع الطاعهـ واهدي شباب المسلمين وقنا شر الفتن

اشكركـ ع طرحك الطيب

خالص تحياتي ,,

Heba Gamal Emara يقول...

فعلا يا سكرة عندك حق على فكرة
معظم السفله بيبقوا متهندمين اوى
ودول انتى لازم تشكى فيهم
يا حول الله يا رب
بقى منتقبه ويعملوا كده
معلش يا بنتى
ولا يهمك
منهم لله
ومتزعليش نفسك
كويس انك عرفتى تاخدى حقك

عاشقه الرومانسيه يقول...

حلوه قوى كميه دعوات الوكسه بلوازمها دى
ههههههههههههههههه

Cute Kitty **sookra يقول...

الشعب شيما


وقالى يامدام شوفتى الموكوس
عاوزه بقى اسمع حكاويكى عن السوبر جت

==================================

دنيا

مساء الفل ياقمر
اه والله عندك حق

=================================
همس الاحباب

انا لما قريت تعليقك برده قعدت اضحك
وايه متخيل شكلك دى
ماشى ياابوشابى اضحك براحتك
=================================

الاحزان ايناس

ابله ظاظا مين
ههههههههههههه
=================================
احمد صلاح

وهو كان يقدر يتكلم
دا انا كنت كالته بسنانى من غير مااسمى عليه
وليه كدا يابنى متقنفد ليه
هههههههههههههههه
==================================
عمرو

والله عندك حق
ربنا يهدى
=================================
هبه جمال عماره

وانتى كنتى عاوزانى مااخدش حقى
داانا كان ممكن اشغل ابو ورده اللى شايلاه فى شنطتى
هههههههههههههه
==================================
عاشقه الرومانسيه

هههههههههههه
اى خودمه
تعالوا عندنا تجدوا مايلزمك من الوكسات ههههههههه