BLOGGER TEMPLATES AND TWITTER BACKGROUNDS »

الجمعة، 6 نوفمبر 2009

فضفضه وبس..+تحديث

انا بس عاوزه اوضح حاجه ممكن تكون موش اتفهمت من الكلام
انا موش بعلق اختياراتى الغلط او فشلى على شماعه ظروف او على اى حدا
انا موش بقول قدرى لكن دا اختياراتى الغلط وكمان تفكيرى الساذج .


قالت احلام مستغانمى"نحن لانشفى من ذاكرتنا".وقالت ايضا"هل تستطيع ان انك تقول انك شفيت من عشق تماما من دون ان تضحك اومن دون ان تبكى؟".
ولهذا فهنيئا لنا بذكرياتنا الجميله .وياالف آآآه من جوه قلبى على مانحمله من ذكريات مريره مر الصبار.
انه الحب:
تلك الذكريات التى نحملها من ذكريات حلوه وايضا ذكريات مره.
ساحكى عنى حتى لااتجمل فقد انشات المدونه حتى اتكلم دون ان يكون هناك رقابه ولذلك فانا لااطلب نصيحه ولااطلب استشاره من احد .
انا فقط افضفض عن قلبى.
فتاه عاديه جدا واجتماعيه لدرجه فوق الوصف بتحب تقرب اوى من الناس ودايما بتنجرح منهم دا كله احيانا واحيانا تانيه تقف هكذا كالصنم ولاتعرف كيف تتصرف فهى ذكيه جدا وغبيه جدا ايضا.
وقد قالو "الطريق الى جهنم مفروش بالنوايا الحسنه وانا دائمه الدخول الى جهنم"
هى تحب وتكره ,تفرح وتتألم,ويالها من الالام مبرحه تلك التى تحيا بها دائما .
دائما اعود للذكريات واتذكر كل شىء افرح وابكى واحزن واضحك كل دا مع ذكرياتى
يمكن تكون بالنسبه لبعض الناس حاجات تافهه لكنها اثرت فيا وشكلتنى فى وقتها.
آه والف آه على تلك الطفله سها التى كنت احبها حد الجنون ,كنت اعشقها واعشق تفاصيلها وهى طفله ثم وهى مراهقه لكننى كرهتها شابه وكرهتها امرأه.
نعم كرهتها جدا ...كرهتها حتى وصلت اننى رميتها فى بئرعميق جدا ولكن تركت غطائه نصف مغطى .
تخيلت انه فى يوم من الايام سياتى من يخرجها من هذا البئر ويجعلنى احبها مره اخرى .
تلك الطفله لم تكن تحلم سوى بحياه كريمه وان تحقق حلمها وحلم امها ان تكون دكتوره ذات شأن فى المجتمع.
كنت اهوى مهنه الطب كنت احبها برغم خوفى الشديد من الدماء ولكن تاتى الرياح بما لاتشتهى السفن يقولون كيف ستتحملون نفقات كليه الطب فهى كثيره جدا .
تقلق ماما اوى تعيش فى قلق من النقطه دى اشعر بها وبالامها واقرر ان اكون ادبى وليس علمى وليس لان ذكائى لايؤهلنى للعلمى فقد كنت متفوقه جدا وكنت احق بهذا القسم من كثيرون وهم ايضا لم يستطيعوا ان يحصلوا على مجموع يؤهلهم للطب.
وتنهى الثانويه العامه وبتفوق كما هى عادتها وهى ايضا مازالت تحب نفسها وادخل كليه تربيه "حلم الكثيرون فى ذلك الوقت".
وهناك من رأى اننى هكذا لم اخسر اى شىء فقد دخلت الكليه اللى اتمناها من وجهه نظرهم وهم لايعلمون اننى اكرهها.
وبما ان سها تكرهها فلم تهتم بها لانها ليست حلمها .
تخيلت انها ستنهيها بتفوق وتعمل بعد تخرجها وتكمل دراستها دون ان تحمل اهلها عبء دراسه جديده
كانت متخيله الدنيا ورديه.هىء هىء
اضحك الان على سذاجتها وعبطها .
ويحدث مالايتخيله عقلها او عقل اى احد يعرفها وتفشل ومن فشل لفشل لفشل ومع كل فشل تفقد حبها لنفسها .
هتقولوا ليه موش غيرت الكليه ؟
هااقولكم لانها بمنتهى البساطه موش متعوده انها تستسلم ومع ذلك ماحاربتش نفسها عشان تنجح.
ايوا هربت .
هربت من مشكلتى بانى انغمست فى مشاكل اصحابى ومحاوله حلها .
هربت لعالم خيالى :عالم النت .تهت فى غرف الشات .عملت مدونه وموش كتبت فيها حاجه لانى كنت فى الشات .
ولانى لسه عندى شويه من الاحمر ومازال فى نفسى احساس بالذنب تجاه اهلى :عملت لاتحمل نفقاتى الزائده بعيدا عن كاهل اهلى .
ودا كمان حاجه هربت بيها بعيد عن سها .
انغمست مع الناس.عرفت كل الناس وكل البشر وكل المستويات وكنت دايما مخلياهم فى صندوق الصحاب بعيدا جدا جدا عن صندوق الحب واللى كان فيه واحد خيالى اوى.
من فشل لفشل ومازلت مستمره فى الدراسه وكان بيتقدملى ناس وناس وكنت دايما ارفض لغايه اما بقيت عندى 25 سنه
اتقدملى واحد صنايعى وكمان موش مكمل تعليمه.
قلت لا قالوا ليه هتتبطرى على ايه ؟
لو كنتى ناجحه كنا قلنا ماشى مستنيه حد احسن لكن الاحسن دا هيتقدملك على ايه لاانتى جميله جمال مالوش حل ولامعاكى كليه ولاانتوا اغنيا اوى يعنى عشان حد مستواه عالى يبصلك.
كلام جارح ومتغطى اوى وبابا يقول اصحابك بقوا معاهم عيل واتنين .
قدام كل دا واكتر استسلمت وكانت اول مره استسلم .
كنت يائسه اوى لانى فاشله اوى.
ايون فاشله اوى .قلت اهى جوازه والسلام واتكتب كتابى ويوم بعد يوم بعد يوم اتأكد انه موش ليا
قلت لا هتغيريه .
ضحكت على نفسى عشان اكمل حاجه غلط من الاول وحصل حاجات وحاجات وحاجات .
المهم قررت ان الموضوع دا لازم ينتهى بعد تقريبا 4 شهور من كتب الكتاب واهلى وقفولى
هتبقى مطلقه وتكونى اول واحده فى العيله ..لا والف لا.
رضخت تانى واستسلمت لتانى مره وقلت يابت بلاش تتبطرى بدال ربنا مايعاقبك بعد كدا ودفعت مشاعرى ناحيه دفع بغير عقل قلت خلاص جوزك وهيكون ابو عيالك لازم تكملى.
وبرده حصل جديد وكنت انا اللى بخسر كل يوم.
اهلى بداوا يحسوا بالغلطه دى وان الراجل دا لاينفعنا ولاينفع بنتنا وساعتها قلت لا هكمل وكنت مستعده اكمل لكن....
لما تكتشفى ان راجلك دا موش امانك ولامصدر ثقتك وقوتك هتعملى ايه؟
لما ماتحسيش معاه بالامان يبقى ماينفعش تكملى.
نجحت وخلصت دراستى اخدت كليتى وبدات ارجع افكر فى سها تانى وافكر فى احلامها وطموحاتها اللى هى بعيداااااااا اوى عنه .
لكن انه يخون ثقه اهلى فيه ويحطهم فى موقف وحش جدا ويعملهم مشاكل وكمان موش يعبرهم ولايعبرنى وياخد فى وشه كدا ويقول اللى تقدرى عليه اعمليه .
انا كاتب كتابك يبقى لا ومليون لا
لا ياادم انا موش هاكونلك حوا ابدا لو فضلت كدا طول عمرى.
انا عارفه انه بوست طويل واللى موش عاوز يقراه موش مهم عندى اصلا انا بس كنت بفضفض عشان موش اطق من جنابى
قال رضينا بالهم والهم موش راضى بينا بلا نيله

52 التعليقات:

أميرة علي كوكب مهجور يقول...

ايه ده انا اول تعليق:)

أميرة علي كوكب مهجور يقول...

يا ربنا كل الاحباطات دي حصلتلك :( وبعدين نفقات كليه ايه اللي بيفكروا فيها وانت لسه في ثانوي وبعدين ربنا اللي بيرزق


ومش جميله ايه ومش معاكي شهاده عدله هو ده المقياس اللي يخلينا نرضي باي جوازه والسلام وبعدين هما ملهمش يتدخلوا ولا يحكموا لان انتي اللي هتعيشي التجربه مش هما ومتسمحيش لحد يقلل منك ابدا ابدا


واخيرا خليكي واثقه ان ربنا كاتبلك الخير ربنا ميرضاش بالظلم ادعي انتي بس دايما وقولي يارب

مبسوطه اوي اني شوفتك :)

donya يقول...

مساء الخير
البوست طالع زي النار من قلبك
مالييش تعليق مش علشان ماعنديش تعليق
لا
علشان المشاعر والاحباطات اللي انتي كتباها بختصار شديد
مشاعر ودموع وليالي قاسيه انتي عشتيها اكبر من اي كلام يواسيكي

ربنا هيفرجها عليكي وقولي يارب
كلمه هتريحك
حسبي الله ونعم الوكيل

تحياتي

الشعب لابد له من حكومه تشكمه يقول...

:( وانا اللى قلت انك اتبسطتى انهاردا اتاريكى برضه زعلانه.ومحدش يقدر يلومك على زعلك.
اسألتك اللى فى الاخر صعبه اوى والموقف كله صعب.
ربنا يكتبلك الخير ويسعد قلبك وايامك

مجرد حلم صغنتوت يقول...

كلمة لسه كنت بقرأها دلوقتي حالاً
اكثر الناس ضحكاً أكثرهم ألماً

ربنا اكيد كاتبلك حاجة احسن من كده كتير
متخليش اللي حصل يقتل جواكي احساسك وأملك في المستقبل... اكيد فيه لسه كتير جاي وان شاء الله هيبقى احسن بكتير من اللي فات

انا كمان مبسوطة اني شفتك النهاردة... يا رب تبقى بداية معرفة خير دايماً :)
وخليكي دايماً مبتسمة للحياة كده... اكيد هي كمان هتبتسملك

مسدس صغير يقول...

الحمد لله رجوعك بالسلامة
مقريتش البوست بصراحة
بس بكرة اقراه
وتتعوض
ان شاء الله
المهم انى جيت اشوفك بس

فكرة من الزمن ده يقول...

فضفضتك دي قريتها كلللللها بتركيز وحسيت بيكي اوي
\
ونصيحة حارة جدااااااا
اوعي تستسلمي وتقولي اهو راجل والسلام جوازة وخلاص
لا والف لا
لما تعيشي بكرامتك مسيرك في يوم هتلاقي اللي يحبك وتحبيه وتتمني تكملي حياتك معاه في اي ظروف

لان كل انسان اتخلق له نص تاني في الدنيا ومسيره يجي اليوم اللي يلاقيه

لكن تعيشي عيشة لا لون ولاطعم لمجرد الانسياق لراي اهلك مهما اختلفت اسبابهم
فانتي هاتعيشي ندمااانة وتعبانة طول عمرك
وعمرك ما هتعرفي تحبي هذا الزوج
وفي يوم من الايام هتقولي ربنا يسامحهم هما عايشين حياتهم ومفيش حد حاسس غيري انا

ومش صحيح ان اللي اتكتب كتابها بيتقال عليها مطلقة
لا لانها في تقاليدنا بتاخد شكل الخطوبة مش زي دول تانية بيعتبرو كتب الكتاب هو الزواج

وحتى لو مطلقة صدقين انتي الكسبانة
لازم تكوني قوية
وتاخدي قرارك وتبداي واعتبري انك بتتولدي من جديد واحدة قادرة على اتخاذ قرارتها وتحملها امسكي دفة حياتك وحركيها بتفكير عقلاني مش تسيبيها لرياح تحركها وزي ما تيجي تيجي
هتلاقي حياتك من فشل لفشل
كوني كما تريدين
وكوني واثقة في نفسك وفي قدراتك صدقيني
واثبتي نفسك في مجال بتحبيه واصلي دراسة تانية
بجانب دراستك الاكاديمية ادخلي مجال شغل بتحبيه وركزي فيه والحب هتلاقيه جاي لغاية عندك المهم انك ماتسعيش ليه لان الباحث عن الشيء يفقده

تحياتي

فكرة من الزمن ده يقول...

على فكرة قريت بوست الفوسحة
وعيشت معاكم فيه
حروف واسكندرانية بموت فيهم
وانتي كمان يالا
تحياتي

بنت قلبى يقول...

لالالالالالا انا مش هعلق على البوست
بس عاوزه اقلك حاجه
ازاى شيمو بتقول انك ما رحتيش
واميره على كوكب مهجور بتقول مبسوطه انى شوفتك
يااااااااربى على الفرسه الا انا فيها

Unknown يقول...

أنا جييييييييييييييت

ربنا يكرمك يارب فعلا كان يوم لذيذ جدا وممتع قوي ورائع لدرجة جميلة

ربنا يارب يفرحنا جميعا ويسعدنا ويجمعنا دايما على مرح وسعادة وهنا ياااااااااارب

كل تجمع واحنا كلنا بألف خير

بنت قلبى يقول...

تعرفى انا تعلقيى الاولنى ما قرائتش كله
بس انا جالى فضول رغم انى بكره الفضول اصلا وقلت ايه الفضفضه دى
وكمان انا متاكده من بعد الاستايل الجديد والتغير ان كل كلامك هتتغير وفى حاجات هنعرفها كنتى انتى فيها غامضه وبداريها
ولما قرائت كله والله حسيت انك جوايا لانك تشبهيلى فى حتته الارتباط الا بالغصب دا بس الفرق هوا السن وحتته الشكل
مش عارفه مره واحده قررت انى اقرا لانى اتشديت لها
وانا هنتظر اعرف ايه الا بعد كده
بس يارب ما يكنشى حياه بلا امل فيها وحياه احسن بكتير من الا انا متخيالاها
مش قلتلك كان نفسى اوى اشوفك

خواطر شابة يقول...

جميل ان نستطيع ان نفضفض هكدا نرتاح هده الفضفضة والله نعمة.
قرأت تدوينتك واحسست بكلامك جدا لكن نصيحتي لك هي أن حياتنا هي ملكنا نحن عليك ان تقعدي مع نفسك تراجعي حساباتك تفكري و تحددي خياراتك وبعدها تتخدين قرارك وتكوني قوية في تنفيده ومسؤولة عن نتائجه الضعف والاستسلام ليس حلا
تمنياتي لك بحياة سعيدة ان شاء الله

لو عرفوه هيحبوه يقول...

السلام عليكم ورحمه الله وبركاته

جزاكم الله كل خير

تابعونا فى الحمله ومع بدايه الشيقه فى الدعوه للاسلام

يسعدنا تواجدكم

همس الاحباب يقول...

حمدلله على سلامتك
وسعيد جدا بمعرفتك وتواجدك فى اللقاء
حضراك من الشخصيات الرائعة واللى ليه تاثير فى اللقاء
سعدت جدا يتواجدى بين الكوكبة الجميلة
وسعدت جدا بزيارة مدونتك
تحياتى وتقديرى

Tamer Nabil Moussa يقول...

مهما يكون الاحباط

نقول فترة وتعدى واكيد هيكون حالنا احسن بكتير

طول ما احنا قريبين من ربنا

مع خالص تحياتى

رحــــيـل يقول...

لالالا اوعى بجد تستسلمى دى حياه وعمر كامل وعشرة وحد هيفضل معاكى العمر كله
فكرى كمان فى اولادك بعد كده
انتى مش بتختارى زوج انتى كمان بتختارى اب ليهم
خدى موقف دلوقتى احسن ما تضطرى تاخدى موقف بعد كده وهيكون اصعب
طالما من دلوقتى شايفه ان استحاله تكملى يبقى لازم تقفى فى وش الناس كلها
حياتك حياتك حياتك

حاولى تكونى بخير دايما
سيده انى قابلتك لانك شخصيه جميله وحبوبه قوى
تعرفى حاجه غريبة قوى جت فى بالى من امبارح واحنا كلنا سوا سبحان الله قولت بينى وبين نفسى رغما لضحك والهزار والجو الحلو اللى كلنا حاسينه الوقتى بس كل واحد فينا جوا حكايه عايشها او بيهرب منها
بس احنا بنحاول نسرق وقت حلو نقضيه سوا
ويارب نتقابل تانى على خير

Cute Kitty **sookra يقول...

اميره على كوكب مهجور
اه ياستى اول تعليق اقبلى الشيكولاته دى بقى جايزه التعليق
ههههههههههههههه
اميره كل الاحباطات دى انا السبب فيها لانى انا اللى استسلمت
يعنى انا اللى غلطانه
انا اسعد انى عرفتك

ريتاج يقول...

مساء الخير
بجد
ربنا يكرمك يارب
ويسعدك ويريح قلبك
انا مدونه جديده معاكم
واتمنا منك زيارة مدونتى
ويبقا التواصل
تحياتى
ريتاج

Cute Kitty **sookra يقول...

دنيا
يارب

Cute Kitty **sookra يقول...

الشعب لابد له من حكومه تشكمه
شيما القمر
والله اتبسطت جدا معاكم وفرحت اوى بيكم
انتى وفاتيما وصبرنى وخيخه اللى موش خيخه خالص وداليا واليساندرا وعاشقه وغلبانه ومجرد حلم وحلم كان وصاصا وابراهيم ومحمد وضياء وكل الناس اللى كانت هناك
لكن اعذرينى فلما بكون لوحدى بكون كدا انا زى ماباين فى المدونه لما بكون لوحدى ببقى شكلها بتبقى انا وببقى هى
تحياتى ياقمرايه

Cute Kitty **sookra يقول...

مجرد حلم اكيد هيكبر
ههههههههههه
نورتينى ياقمر واكيد الخير دايما عند ربنا وربنا احنا اللى بنتعب نفسنا باختياراتنا الغلط
نورتينى

Cute Kitty **sookra يقول...

مسدس صغنون
كويس انك جيت يامتر عند خالتو سها هنا
بس اوعى مسدسك يكون فيه مايه بشطه
هههههههههههههههههه

Cute Kitty **sookra يقول...

فكرورتى حبيبتى
ازيك ياقمر
لا اطمنى انا موش هااستسلم ابدا
كلامك فرحنى ووحشتينى اوى
قرارى اخدته ياقمر وبدأ يتنفذ على ارض الواقع وقريب هتسمعوا اخبار حلوه
اما عن الحب والارتباط انا موش هافكر فى الموضوع دا ولا ابحث عليه
جه هابقى اسعد انسانه
مجاش انا برده هاكون اسعد انسانه لانى عايشه وانا موش مكسوره

Cute Kitty **sookra يقول...

بنت قلبى
انا رحت انتى بس موش اخدتى بالك من كلام شيما
وكان نفسى اشوفك انتى كمان
هتلاقى حاجات كنت دايما مخبياها وهتقريها
اما عن انى ارتبط غصب عنى فدا موش صحيح
الغصب دا كان منى انا لانى استسلمت وموش رفضت ولااتمسكت برايى وقلت لا
نورتينى

Cute Kitty **sookra يقول...

كاتب مصرى موش جالس القرفصاء
نورتنى وسعيده انى اتعرفت بيك
تحياتى وشكرا على اليوم الحلو دا

Unknown يقول...

كلية تربية وصناعبى ولا كأنى بسمع فلم عربى قدبم بنت المدارس والمعلم

Cute Kitty **sookra يقول...

خواطر شابه
تسلمى يارب ياحبيبتى
وميرسى ليكى ياقمر

Cute Kitty **sookra يقول...

همس الاحباب
ابوشابى
انا اللى اسعد بمعرفتك ومعرفه المجموعه الجميله دى
تحياتى ونورت مدونتى المتواضعه

Cute Kitty **sookra يقول...

لو عرفوه هيحبوه
متشكره على الزياره وانا اصلا متابعاكم
تحياتى على مجهودك
وربنا يجعله فى ميزان حسناتك

Cute Kitty **sookra يقول...

تامر نبيل
ربنا ياخد بايدنا كلنا ويخرجنا من احباطاتنا على خير يارب
تحياتى

Cute Kitty **sookra يقول...

رحيل
انتى بجد كنتى منوره اللقاء
اللقاء كان فيه ورود كتيره اوى وكلهم بصراحه اجمل وارق من بعض
بس انتى صاحبه عيون موش ممكن تتنسى
ربنا يوفقك يارب
ويارب نتقابل تانى

Cute Kitty **sookra يقول...

ريتاج انا يشرفنى انك تزورونى
وربنا يكرمك وتنورى عالم البلوجر
وكمان اغنيتك حلوه اوى

thunder يقول...

بصى مبروك على الطلاق لوووووووووووووووووووووووووووووووووووووووووووووووووووووووولى وبطل احباط وفى داهية واللى ما يعملك كحلة فى عينة متعملهوش شوز فى رجلك
اختى العزيزة جدااااااا
دمتِ يارب بكل حب وود وفى رعاية وحفظ الله دائما يارب

أميرة علي كوكب مهجور يقول...

ليكي تاج عندي ياقمر تروحي تستلميه :)

خوخه يقول...

ايه الاحباط دا بس
تفائلو بالخير تجدوه
بس الكلام حساس اوي ومن القلب
بس نصيحتي لازم تختاري حياتك مش هيا اللي تختارك
(تحياتي خوخه)

خوخه يقول...

احساسك عالي اوي
بس تفائلو بالخير تجدوه
وااللي اقدر اقولهولك
فكري قبل ماتتخذي اي قرار ف حياتك
تحياتي خوخه

غير معرف يقول...

ازيك يا ابله
والله يا ابله لما اتكلمت معاكى لاقيت دمك شرباااااااااااااات بس مكنتش لعرف ان من فريق المدونيين الكئيب
يعنى اللى يشوف الناس الحلوه دى يزعل اوى كده
اولا بجد بقى لا بجد
انا سعيد جدا انتى اتعرفت عليكى يا ابله
وبجد برضه دمك خفييييييييييييف جدا مع انى اعتقدت فى الاول ان ممكن يكون معاكى سيف وتقطعى رقبتنا باهرج طبعا
بالنسبه للفضفضه
مش عارف اذا كنت اقول رأيى ولا اسكت بما انها لمجرد الفضفضه
طيب هاقول بس حاجات صغيوره
احنا ممكن ماناخدش اللى نستحقه بس نحمد ربنا لان ده قدره بس ليه نحلم باقل ما نستحقه
انتى يا ساسو تستاهلى اكتر من كده
كل انسان بيتعثر فى مرحله معينه لكن طالما لسه فيه نفس واصرار ليه يستسلم
بصى فيه حاجه انا مؤمن بيها
فيه حاجه اسمها مطاردة الاحلام
خليكى ورا حلمك يا تحققيه يا اما تحسى على الاقل انك حاولتى
من فتره للتانيه لازم الواحد ينفض التراب من على نفسه
وحبى نفسك اكتر وصالحيها لانها تستاهل
بجد من الناس اللى علقوا جدا فى ذاكرتى
ونورتينا وشكرا على تعبك والمسافه الطويله والمواصلات بس بجد سعدت جدا بالتعرف على حضرتك يا ابله
على فكره اول ما دخلت المدونه حسيت انى وشى اتغسل اتوماتيك
اضحكى بقى كده دا انتى ضحكتينى يومها كتير
ربنا يوفقك ويسعد قلبك

عاشقه وغلبانه يقول...

ايه يابت حنفيه النكد اللي فتحتيها دي .:((

ده انتي فقر
اول زياره تنكدي عليا كده
ماتتجوزهوش ياختي

мαησηα يقول...

على قد ما انا حزينة من قلبى عليكى او على اللى حصلك ده كله بس بردو مبسوطة

مبسوطة انك اتعلمتى وهتقدرى تنفعى بنتك لما تكبر

مبسوطة انك جربتى الاستسلام وعرفتى انه اكبر غلط ف حياتك

ومبسوطة انك بتخرجى الاحزان علشان ان شاء الله مدام هى خرجت هيدخل بدالها الفرح

ومبسووووطة اوى اووووى انى عرفتك

وحشتينى اوى

ربنا يسعدك يا حبيبتى ويريح بالك ويرضيكى ويحميكى قولى امييييييييييييييين

♥نبع الغرام♥♪≈ يقول...

السلام عليكم
انا هنا وحشتينى قووى قووى ربنا ما يحرمنيش منك يارب
اخبارك ايه يارب تكونى كويسه
بجد مبسوطه انى شوفت واتعرفت عليكى عن قرب
وربنا يعوضك خير يارب
وان شاء الله اللى جاى احلى من اللى راح
واكيد ده خير ليكى
بدعليك من جوة قلبى
وانتى كمان ادعيلى

بس تعرفى على قد ما كنت فرحانه على قد ما اتعكننت بسبب حاجه حصلت
يلا ربنا منتقم جبار
المهم خلى بالك من نفسك
وابقى طمنينى عليكى
بحبك قووووووووووووووووى
امواة

ريمان يقول...

السلام عليكم



حبيبتى

طبعا دى مدونتك ومن حقك انك تفضفضى فيها وتبثى كل همومك واحزانك

ونشاركك حزنك وفرحك كمان


مش ارفه وانتى بتحكى لقيت فيكى كتير اوى منى وكانك بتحكى عنى انا بس ماعدا الحته بتاعه كليه الطب دى


بس انا حكايتى اطول من حكايتك شويه


عايزه اقولك مش معنى ان الواحده مكتوب كتابها هتخاف وهتستلم وهتكست وهترضى باى حاجه


انتى من حقك تختارى وتعدلى فى اختيارك بدون خوف من اى شىء


انا عارفه بجد احساس واحده مرتبطه بواحد ومش حاسه معاه بالامان

ده شىء صعب

ومادام الامان مفقود يبقى الحب اكيد مفقود


والتفاهم ساعتها هيكون معدوم

والثقه طبعا مش هيكون ليها وجود


توكلى على الله واحتسبى

واستعينى بيه

محدش هيقدر يقولك الحل بس انتى استخيرى الله
وثقى ان الله مش هيضيعك

وهيقدرلك كل خير ان شاء الله




تحياتى ليكى


على فكره انا منتقبه زيك

كلمة صدق يقول...

اختى العزيزةهذةالقصة بتحدث كل يوم فى مجتمعناالنامى ولكن فية من يقدر يقاوم ويقول لا وأخر من يضحك على نفسةويصدق انة ضحية الظروف و و و وووو الى اخر الحديث وهذامن الصدق مع النفس وفى بداية كلامك بتقولى مش عايزةرأي من احد وفى نهايتة بتقولى تقرأو او لا لايهمك فأسمحيلى لاننا فى هذة المدونة بنكمل بعض واكيد الواحد بياخد راى اخ او اخت عن جد ويعمل بةصح فكونى او لا تكونى هذة هية المشكلة وسامحينى اخيكى كلمة صدق

احلام جوليا يقول...

سكرة خليك قوية وارجع لنفسك لساك صغيرة متخليش الدنيا تخدك في سكة مش بتاعتك دوري على نفسك وابدأي تحدي الكل ونفسك قبل الكل واستعيدي سكرة الاولى

حروف يقول...

يارايقة توت توت قطر صغنطوط
ييييييييييييييييارايقة ياختي هههههه

micheal يقول...

قرأت البوست ده من كام يوم ومعرفتش أسيب كومنت وطلعت
بجد مش عارف أقول إيه
كل ده قهر و ف كل شيء
:(
حاولي تفضفي على قد ما تقدري
وربنا معاكي
تحياتي

فشكووول يقول...

السلام عليكم سهى .. عرفتها بقى من الكلام

بتقولى فاشله ليه ؟
انا مش شايف فشل ولا حاجه بتحصل كتير ويتكرر الفشل كثيرا مع بعض الناس من كثره ما هم ناجحين .. ثم ان النجاح لا يأتى الا بعد الفشل .. امال اسمه نجاح ليه
بس اللى شايفه ان فيه احد الاختيارات غلط ... ولازم تدفعى له ثمن
والثمن انك تصرى على ما تريديه وتصبرى قليلا .. وبعدين .. ربنا حيجيب الفرج من عنده..

ممكن توسطى اى حد ويعرفه انه هو اللى مش مناسب ليكى .. صنايعى كمان ويتجوز مؤهل عالى .. يا بلاش يا ولاد

------ يقول...

انا جيت اصبح عليكى

وبس

لان صراحة نو كومينت
لانى حاسة بيكى اوى
بس انت قوية ودا اللى اعرفه عنك

وفضفضى براحتك واكتبى اللى جواكى
وطلعى كل مشاعرك

انى احبك فى الله

Soul.o0o.Whisper يقول...

ساسو الجميلة

أولا بجد حقيقى أنا سعيدة جدا بالتعرف عليكى

و يارب دايما متجمعين على خير


طبعا مش هأتكلم بخصوص البوست لأنك قلتى مش منتظرة كلمة من حد

لأنها مجرد فضفضة و السلام

بس هأدعيلك و أقولك
ربنا يجعل لك مخرجا و يرزقك من حيث لا تحتسبى :)

دمتى بكل الود

محمد عبدالرحمن شحاته يقول...

اسعدني مروري هنا
موضوعك في غاية الروعه
تقبلي مروري

~ISLAM~ يقول...

الموضوع مش ادم وحوا خالص
الموضوع فيه مشكله واحده اساسيه متهيألى مفيش غيرها يعنى اى مشاكل تانيه بيكون اصلها المشكله دى
وهى انك سايبه نفسك للتيار كليه تربيه حلوه وحلم ناس كتير اخشها ومحسبتيهاش اذا كانت حلمك انتى ولا لا
عريس ويلا عشان متفضليش كده طب يلا هعمل ايه يعنى
كلنا معرضين لضغوط بس لازم ننتصر لنفسنا يعنى اعملى اللى شايفاه صح حتى لو طلع بعد كده غلط واتحملى مسئوليته
احسن ما تفضلى طول حياتك بتلبى رغبات الغير ومبترضيش نفسك
وفى الاول والاخر متندميش
انا عارف انك ممكن تفكرى انت اد ايه عشان تنصحنى
هقولك اولا المسأله مش اد ايه
وثانيا انا مبنصحكيش انا زيى زيك
والفشل عندى كتير اوى بس ادينا بنتعلم ونستفيد من بعض
اتمنى انى مكنتش طولت عليكى
واتمنى يكون كلامى وصلك بالفكره اللى انا عاوز اوصلها
ربنا معاكى ومعايا ومع كل الناس
تحياتى ليكى
كنت هنسى انا جبت الشيكولاته اللى عليا :d

Cute Kitty **sookra يقول...

thunder
لسه مبروك دى شويه
المهم اخباركم ايه
عاوزه افرح بيكم

Cute Kitty **sookra يقول...

اميره على كوكب مهجور


ميرسى ياقمر على التاج

==================================
خوخه


ميرسى على النصيحه ونورتينى ياقمرايه


=================================
رحله البحث(حفيد الغرباوى)


ههههههههه هاجيب السيف المره الجايه
وانا مازلت اطارد احلامى وربنا يقوينى واحققها.
نورتنى وانا اسعد بمعرفتى بيك


=================================
عاشقه وموش غلبانه
د/سوسو


ازيك ياقمر
ماانا ياختى قلت كدا بلاجواز بلانيله
قطيعه الرجاله واللى بيعملوه
هههههههههههههههههه

=================================
منونه manoona

امييييييين ولك مثله ياقمرايه
تسلمى ياقلبى وبجد انتى صديقه حلوه اوى وبنت جدعه اوى كمان
وحشانى والله انتى كمان


===================================
الاحزان ايناس

مادمتى مع ربنا موش يهمك حد تانى
وحشانى ياانوس وبدعيلك ربنا يفرح قلبك وتبقى الافراح ايناس
وحشتينى (وش بيغمز)

=================================
ريمان

اسعدتينى وشرفتينى بجد
والله انا استخرت ربنا وخلاص سبت الموضوع اولا واخيرا بين يدى الله وهو المتصرف وهو القادر واكيد الخير ربنا هيقدره
اينما كان وانا بجد خلاص موش بفكر غير ان ربنا هو صاحب الاختيار الاول والاخير
ميرسى بجد ليكى


==================================
كلمه صدق


على ماذا اسامحك فنعم اكون اولااكون تلك هى المشكله
تحياتى ليك ونورتنى بجد واكيد الحل عند ربنا

===================================
احلام جوليا


نصيحه غاليه ربنا يقدرنى عليها
ادعيلى
وبجد نورتى مدونتى المتواضعه دى
تحياتى

==================================
مايكل


ولايهمك الحمد لله على كل شىء


===============================
عم فشكول


شكرا على تعليقك لكن فيه حاجات كتير ماحدش يعرفها
وبعدين هو غير مهنته وبيكمل تعليمه فى الجامعه المفتوحه
ههههههههههه
نورتنى وربنا هيجيب الفرج



==================================
همسات على ضوء القمر


احبك الذى احببتنى فيه وربنا يجمعنى انا وانتى وكل المسلمين فى الجنه يارب
انا كمان عارفه انك قويه
نورتينى وشكرا بجد

==================================
د/سول


نورتينى وانا اسعد بمعرفتك انتى ياقمرايه
وربنا يسمع منك وتتحقق دعوتك ليا وليكى كمان
نورتينى

==================================
pakKaramu


thanks for visiting me

===================================

محمد عبدالرحمن شحاته
مرورك هو اللى اسعدنى
متشكره اوى

===================================
7akawena

اعمل اللى شايفاه صح وموش مشكله يطلع بعد كده غلط واتحمل مسئوليته
نعم ولكن لاخاب من استشار
وعندما تكون كل الاستشارات خطأ فهنا نعم ونقول خاب من استشار
نورتنى
ومادمت جبت الشيكولاته اللى عليك بقى تطول براحتك ولايهمك
وكمان اقولك موش لازم تكون اكبر منى عشان تنصحنى احيانا بناخد كلام حلو اوى ونصايح من ناس اصغر مننا
وربنا يارب يقويك

===================================

م/الحسينى لزومى
شكرا على الزياره ولايهمك انك موش علقت
عادى اما موضوع انى اضع شعار الحمله على مدونتى فدا موش عارفه اعمله ازاى
نورتنى