BLOGGER TEMPLATES AND TWITTER BACKGROUNDS »

الجمعة، 23 أكتوبر 2009

ايام زمان .


اولا كدا صباح الشيكولاته البيضا.
انا ياشوباب بقالى كام يوم بفكر فى حاجه وكنت عاوزه اكتبها لكن موش عارفه ايه اللى كان بيمنعنى
المهم اللى حصل كالاتى انى امبارح بالليل اتكلمت مع صديق عن ايام زمان وذكريات ايام زمان والصبح لما دخلت لقيت حرووف كاتبه بوست جديد عن ذكريات زمان فقوم ايه اعتبرت اللى بيحصل دى اشارات انى اقول اللى انا بفكر فيه .
هتقولولى وهو ايه ارد واقولكم استنوا مستعجلين على ايه وراكم الديوان ياخااااى
هههههههههه
كنت بفكر فى رمضان زمان كنت بفكر فى بوجى وطمطم وفوازير نيللى وشريهان والف ليله وليله
كانوا بيجوا بالترتيب دا ورا بعض وكنا بنفطر بشويش اوى عشان نتفرج عليهم واحنا على الفطار وبعدين طبعا لانى كنت لسه صغيره لاكنت بغسل مواعين بعد الفطار ولااقوم اعمل شاى ولاحاجات من الخنيقه دى
كنت افطر واقوا اصلى واجى جرى اقعد قدام التليفزيون الابيض والاسود فى بيت العيله كدا وابقى قاعده وسطهم لكن فى دنيا تانيه خالص
مع ريما وكريمه وحليمه وشهرزاد وكل الحاجات الحلوه دى
كنت بحب زمان اوى اوى
كنت بستمتع بحاجات كتير ماعدتش لاقياها دلوقتى



كنت بحب اتفرج على العيال فى الشارع وهما عاملين فانوس بإزازه زيت يقطعوها ويحطوا فيها شمعه
وكنت بحب الف معاهم بس طبعا كان ممنوع انزل الشارع
كنت بكتفى انى اتفرج عليهم


وبما ان انا كنت اغلب الوقت مقضياه عند خالتى عشان كانت لوحدها فى البيت بعد موت جدتى وخالتى كانت بتخيط وكانت تاخد العشر ايام الاخيره من رمضان سهر طول الليل على ماكينه الخياطه كنت بحب اقعد جنبها اتفرج عليها وهى بتخيط وطلعت بحب الخياطه اوى .

كانت خالتى مدلعانى اوى كانت تنيمنى على رجليها بالطول كدا وتفضل طول الوقت تزغزنى كدا لغايه اما اقولها خلاص تعبت كفايه والنبى

انا لسه فاكره معالم بيت جدتى القديم قبل مايهدوه ويبنوه تانى
كان دافى اوى وكان فى عز البرد تحس انك دفيان اوى وكان البيت مسقوف بالخشب والقش وكان فيه سلم خشب كدا نطلع على السطح بيه وكنت بخاف موت انى اطلع على السلم دا ولغايه دلوقتى انا بخاف موت من السلالم الخشب.ههههههههههههه

جدتى لامى واحنا صغيريين كانت بتعملنا عسليه فى البيت وكانت بتحطها فى طبق صاج ابيض وترشها بسكر ناعم
كانت بيبقى طعمها حلو اوى ولغايه دلوقتى موش قادره اكل اى عسليه عشان موش تضيع طعم العسليه اللى كانت جدتى بتعملهالى
كانت الله يرحمها بتحبنى اوى وكانت بتعتبرنى حفيدتها الوحيده وكانت تقولى انتى بنت بنتى بس انتى بنتى
كنت صغيره اوى لما ماتت وانا فاكره اليوم دا اوى بكل تفاصيله وحتى بشكل الشوارع والناس والبيوت
انا عندى ذاكره جامده اوى ودا اللى بيتعبنى كتير

فى اليوم دا نرمين اختى كان عندها سنتين وكانت جدتى تعبانه بقالها فتره وكانت ماما عندها لما اخدت نرمين فى ايدى وانا عندى 6 سنين وقلتلها تعالى اوديكى لماما
وانا لسه ماخرجتش من الشارع لقيت بنت من جيران ستى مقابلانى تقولى انها ماتت
البنت دى موش عارفه كانت بتعزنى معزه مااقولكومش
المهم رحت جرى عشان اشوف ستى لكنهم رفضوا يدخلونى ولقيت ماما مغمى عليها وخالتى بتصوت وتعيط
رجعت بيتنا وطلعت فى الشقه اللى فى الدور التانى ودخلت اوضه مليانه ارز متعبى فى غرارات (يعنى جوال كبير اوى)وبكيت بكيت اوى لدرجه انى نمت من غير ماحس والدنيا بقت ليل وبدأ الكل فى البحث عنى لانهم خافوا عليا عشان كانوا عارفين انا متعلقه بستى اد ايه


فيه اغنيه لفيروز وهى بتتصل بستها وتحاكيها بحبها اوى الاغنيه دى
"الو ستى
"ستى ياستى
اشتقتلك ياستى
على صوتك
صوتك بعيد
جاى من الكرم جاى من التفاح
صوتك حامل شمس وفاى لون التين والزيتون
ايييييييييييييه
وريحه الطيون ياستىى
ايييييييييه ياستى ماحدن ينطرنى لاتأجلى العرس يمكن طول
شو هم الفستان قولى للعروس انتى الزينه وانت العرس وسلميلى كتير ومابقا بكير ياستى
بذكر الليالى الطويله وانا طفله بالزمان قصص الشتا يحكيلى صوتك اللى كله امان
آآآه
آآآآه
ايييه ياستى شو بقلك ياستى انتوا بقلبى
ستى ياستى
ستى ياستى

طولت عليكم اصل انا لسه عندى زكريات كتير عاوزه اسجلها يمكن يجيلى زهايمر وانساها وساعتها هازعل اوى انى نسيتها
ههههههههههههههههه
تحياتى ياللى مغلبنى اوى
ستى ياستى
ملحوظه صغنونه "الشيكولاته اللى فوق دى من منى صاحبه مدونه
واحد شاى" وماحدش يقولى هاتى واحده ولاحته كمان

40 التعليقات:

رئيس جمهوريه نفسى يقول...

احجز اول تعليق على ما اجيب اللينك واقري البوست علشان نبقي خالصين

رئيس جمهوريه نفسى يقول...

بكرة حيجي أطفال النهاردة يقولوا لما يبقوا في سننا فين ايام زمان دي سنة الحياة اللى لا يمكن توقف واى مقارنة بين عقدين وليكن التسعينات والالفية حيبقى ظالمة لانى الظروف مختلفة جدا مثلا فى التسعينات كان الكمبيوتر بيشتغل بنظام الدوس شوفى النهاردة كام برنامج تشغيل موجود
وكان الكمبيوتر مثلا اخرة صخر دلوقتى فى نت بوك ولاب توب
انا قاصد الكمبيوتر كمثال ليس اكثر او اقل

لينك عزازيل
http://www.4shared.com/file/66979468/43eafbf2/_____.html?s=1

Cute Kitty **sookra يقول...

يانهار عسل
ايه الناس الجدعه دى ميرسى ياعم على التعليق وميرسى اكتر على اللينك .
المهم مهما كان التطور واللى بيحصل واللى هيحصل بس انا مفتقده اوى لزمان وناس زمان وكل حاجات زمان
كانت كل حاجه بتتعمل بمزاج زى ماقلت قبل كدا
نورتنى
بس ليه موش جبت الشيكولاته وانت جاى
دى رسوم دخول البلوج
هههههههههههههه

Sweet Violet يقول...

ومين قال انى هقول هاتى حته
انا اصلا هاخدها و براحتى بقى هه
"صحيح سيبالك جواب انذار عند منمن روحى استلميه ^_^"

نيجى بقى للبوست
اقول ايه منه له اى و الله منه له
الله يسمحك قلبتى عليا مواجع و انا اصلا فى مكان الذكريات حاليا يعنى الاشتياق وصل لاخر حد عندى
v_v
الفارق بينى و بينك ان جدتى ماتت و انا كبيرة
v_v

امشى ياساسو
انا غلطانة انى أجرت لك البلوج ده

Cute Kitty **sookra يقول...

انتى ياست سويت انتى
هو عشان انت حلوه مااحنا كمان حلوين اوى اوى
سويت وحاجه كدا
ايه الحلاوه دى دى حلاوتك كدا حاجه يعععععع خالص زى ماهانى رمزى قال لياسمين
المهم جواب الانزار دا انا موش هاستلمه خالص وهاشكك فى الاجراءات وانا وانتى والمحاكم بينا والزمن طويل
لالالالالالالالالالا دا انا لحمى مر اوى هههههههههههههه
حلوه اوى الزكريات حتى لو مره زى الشيكولاته المره اللى بحبها
اموووووووه
انا بصالحك ببوسه هاضحك عليكى ببوسه موش شيكولاته ياختى
انسى

Sweet Violet يقول...

طب بالذمة انا لو سويت هعمل كده ؟؟
ياامى ضد التيار هى اللى بتتكلم الو الو حووووول ههههه
الجواب وصل و فى شهود كمان عليه
هع هع ضد التيار ماحدش يجدر يجف جصادها واااصل
و كمان خدى بوستك اهى اممممممممممممممممموة
هاتى الشوكولاته بقى بدل ماارجع اولع فى بلوجر تانى و يدعى عليك علشان انتى السبب فى كده
×_×

Cute Kitty **sookra يقول...

هع هع هع
مين هناك ؟
ضد التيار والنبى مايهمنا احنا الصعايده
والجواب وصل وموش استلمته وبرده هاجرجرك فى المحاكم وموش هتاخدى العيال وهاتى البوسه
ومفيش شيكولاته
يلا بقى هه هه هه هه هه

Tamer Nabil Moussa يقول...

ايام زمان ايام عدت علينا بحلوها ومرها ديما بنحن ليها ونفتكرها لانها جزىء من حياتنا

ربنا يوفقك

مع خالص تحياتى

خواطر شابة يقول...

تعيشي وتفتكري ربنا يرحمها ويرحم امواتنا جميعا يارب
بخصوص ايام زمان فأكيد في حياة كل واحد فينا فيها الحلو والوحش فعشان نعيش ونستمر بنحاول ننسى الماضي بألامه ونفتكر بس الحلو اللي فيه

بنت قلبى يقول...

تسمحيلى اسلم بس عليكى
علشان دى اول زياره
لانى لو علق هاخد كل الشكولاته دى
ومش بستذان اصلا لا دى هتكون عافيه هوا كده بقا
فا انتى عديها سلام بس عليكى اول مره دى

اسماء واحلام فى وجدانى يقول...

حصل امتى ده احنا فينا من الحركات دى ولا ايه ده انا كنت لسة هنا الصبح ولا حس ولا خبر بس ملحوقة بردوا نروح نشوف ايه الموضوع ده

اسماء واحلام فى وجدانى يقول...

عايز اقول كلام كتير اوى بس من ابوخ عاداتى مش باعرف احكى النهاردة كان يوم جميل الصبح شوفت ذكريات لحروف كانت عايشة جوايا ودلوقتى عند ساسو قلبت عليا المواجع مواجع ايه دى كانت اجمل ايام لانى بردوا مرتبط اوى بستى بس الحمد لله هى لسة عايشة معانا فكرتينى بالفوانيس وبخالتى ريمة ومشكاح وابو فراج الدنيا ما بتديش محتاج واكيد فاكرة شاندو وهاندو وماندوا والايام الابيض واسود رغم البساطة اللى كانت فيها بس كانت اجمل ايام فى حياتنا ايه ده ما انا باعرف اقول اهو تصدقى انه ممكن يجىء منى

بالنسبة لموضوع الجندى المجند ده هنبقى نشوف له حل بس انا اخدت اعفاء من زمان يعنى عمرى ما كنت مجند نصيب بقى شكلى شوفى القدر انفد من التجنيد الحكومى ربنا يرزقنى بتجنيد هنا عجبت لك يا زمن

мαησηα يقول...

ميرسى يا حبيبتى ع اعتزازاك بالشوكولاته والله لو بايدى اجيبلك شوكلاته بجد حبيبتى

نيجى للبوست الجميل ده اللى فكرنى باحلى ايام زماااان اللى بجد عمرها ما هتتنسى زى بالظبط انها عمرها ما هتتكرر

وفكرتينى بجدى الله يرحمه اللى بفضل توجيهاته وكلامه اللى مكنتش فاهماه وانا صغنونة

انا عارفة شوية اتعايش مع الدنيا الغريبة دى

وفكرتييييييينى باغنية فيروز نفسى ارجع بنت صغيرة ع سطح الجيران ..

اييييييييييه ذكريات لا دى اجمل ذكريات والله

تعيشى وتفتكرى يا قمر ودايما يارب يحلى ايامك كلها

بوسيلى حنون كتييييييييييير

ومسنية اكمل معاكى بقيت زكرياتك يا حبيبة قلبى

micheal يقول...

وكمان طلعتي بتحبي فيروز
ده أنا حنطلك كل شوية بقى
:)
كتير أوي بنحب نقلب في ذكريات الماضي
بوجي وطمطم الجديدة بصراحة معجبتنيش خالص ومحستش فيها بنفس روح الطفولة
:)
لسه فاكر النينجا والباور رينجرز وبرنامج بدون كلام والسندباد
فكرتيني بحاجات حلوة
:)
تحياتي

mimi يقول...

الشيكولاتة دي بالنص

ولا مفيش ولا بتاع

ماليش دعوةةةةةة

mimi يقول...

ساسو... اعترف إني لما بكلمك بشوفك كأنك بنوتك حنونة بالظبط

وأكيد لما بتيجي تكلميني بتتخيليني ميمي الشخصية الكارتونية

صح؟؟؟؟؟؟

Mina يقول...

يخرب عقلك ياساسو
بجد يخرب عقلك
والله العظيم قلبتيلي مودي خالص
بعد ماكنت متنكد خلتيني اعيط
ههههههههههههههههههههههههههههههههه
وبجد بجد بقي انا باعشق فيروز جداااااااااا
والناس اللي يعرفوني كلهم عارفين الموضوع ده
فيروز دي عشقي الاول والاخير
والاغنية دي خصوصا بحبها جداااااااا

وبالنوسبة بقي لموضوع الشوكولاتة فانت كدة هاتعملي فتنة بين المدونين الاعزاء
وانا مايخلصنيش ده
فانا هاستولي عليها كلها لوحدي
حقنا للدماء بس والله مش علشان اي حاجة تانية

Cute Kitty **sookra يقول...

تموره الهندى بتاع القطط
منور ياباشا
واكيد زكريات العلقه مخلياك تحرم تفكر تعمل هندى تانى ولاايه؟

Cute Kitty **sookra يقول...

خواطر شابه
لايتعلم من لا يتألم
قالهالى احمد صلاح
نورتينى

Cute Kitty **sookra يقول...

بنت قلبى
سلامك وصل ياقمر
وبعدين لاعافيه ولازوق تنفع معايا مادمنا جينا للشيكولاته
ههههههههههههههه

Cute Kitty **sookra يقول...

اسماء واحلام فى وجدانى
فاكر برنامج ابيض واسود اللى كان بيجيب المسلسلات القديمه
وفاكر برنامج الحياه اللى كان بيجيب مشكله من الواقع
برامج كتير ومسلسلات راحت واحنا موش بننساها
انا نفسى اشوف فيلم لفاتن حمامه دلوقتى حالا
ههههههههههه
منور

Cute Kitty **sookra يقول...

منى
بوستك وصلت حنون يامس منى
مس منى دى كانت المدرسه بتاعه البرامج التعليميه للغه الانجليزيه وانا فى ثانوى واول ماسمعت مس منى دى تخيلتها اسم على بعضه كدا
مسمنى وعجبنى اوى
ههههههههههه كنت عبيطه
ولذلك ستكونى مسمنى من هنا ورايح

Cute Kitty **sookra يقول...

عم مايكل
ايه اخبار الالبومات الجديده
مستنياها
وتشرف دايما يااول من رأى مدونتى وعلق فيها
تحياتى ونورتنى

اسماء واحلام فى وجدانى يقول...

ايوة طبعا فاكر برنامج حياتى اللى كان لفايزة واصف وفاكر الابيض والاسود اللى كان بيجيب مسلسل القط الاسود وهدوء فى المدينة فاكر كل الايام الجميلة دى طيب انا واثق انك مش فاكرة كارتون روبى ايوة اكيد مش فاكراه وسينما الاطفال اللى كانت قبل عزة مصطفى كانت لعفاف الهلاوى البوست ده هيرجعنى عيال تانى كفاية كده النهاردة اصل الاحساس ده لو مسك فيا صعب اخرج منه تانى

Cute Kitty **sookra يقول...

mimi
ايه دا انا قمر كدا زى حنون
ربنا يجبر بخاطرك ياختى ياميمى
انا فعلا بشوفك ميمى الشخصيه الحلوه دى
نورتينى

Cute Kitty **sookra يقول...

manamino
سلامتك من النكد والعياط
وبعدين مين قالك ان فيه حد ممكن ياخدها منى
دا انا اجطعكم جطيع عشان الشكاليته
منور

مي يقول...

الله بجد جميلة اوى حسيت معاها بريحة الماضى طريقة سردك ليها ممتعة
حبيت جدتك حسيت انى برضه حفيدتها
وانا كمان كنت بحب الفوازير وشيريهان ولغاية دلوقتى شوفى انا شحطة بس برضه تلاقينى سرحانة وفى عالم تانى وانا بتفرج
ذكرياتنا حلوة اوى ويمكن ده اجمل مافينا


بجد انا سعيدة ومستمتعة بذكرياتك وياريت تكتبى كتيرمنها
تسلم ايديك ياقمراية

نورينا يقول...

ازيك يا ساسو عامله ايه يا قمر

حرام عليكي يا بنتي فكرتيني بجدتي الله يرحمها كنت بحبها اوي اوي كانت اطيب واحده عرفتها ف حياتي اتعلمت منها حاجات كتير اوي مش ممكن انساها ابدا

على فكره زكرياتك متشابهه مع زكرياتي ف حاجات كتير خصوصا الجزء بتاع رمضان ايام متتعوضش مش عارفه ليه بنتكلم وكاننا عجزنا ههههههه
فكرتيني بالذي مضى اليت الشباب يعود يوما هههههههههههه

انتي بت زي العسل والله
تصبحي على خير بقا سلام

لو عرفوه هيحبوه يقول...
أزال أحد مشرفي المدونة هذا التعليق.
لو عرفوه هيحبوه يقول...

السلام عليكم ورحمه الله وبركاته

اسال الله ان يوفقك لكل ما يحبه ويرضاه

نتمنى زيارتكم لنا فى حمله لو عرفوه هيحبوه للتعرف على حياه النبى صلى الله عليه وسلم

Remas يقول...

البوست حلو اوى بجد وفكرنى بايام زمان انا بئا جدتى مامة مامتى توفت وانا كبيرة ومتجوزة وعندى بنوتة وحامل في بنوتى التانية وخلاص هاولد

وكان كل شويه يقولو لى قومى روحى خايفين اولد في العزاء

كنت بحبها جدا وكانت هى الرابط اللى بيجمع الكل

الله يرحمهم جميعا

مدونتك عسوله اوى اوى ياقمر

وميرسي اوى لزيارتك مدونتى المتواضعة

نورتينى وانا جيت اهو بكل رسائلى انتى عارفة مش عندى بريد
ههههههههههههههههه

طوبه فضه وطوبه دهب يقول...

الله عيشتينا فى ذكريات حلوه ورجعتينا معاكى لايام احلى ربنا يرحم جدتك ويرحم اموات المسلمين جميعا

donya يقول...

دايما الذكريات الجميله القديمه اوي بتاعت الطفوله لها طعم خاص

بتولد نوع من الحنين انها ترجع ونعشها تاني
وعلشان ماينفعش نعشها تاني
ادينا بنفتكرها

البوست حلو اوي


*تحياتي

romansy يقول...

يا سلام على الذكريات الجميله انا بقى كنت بحب اشوف ماذنجر
وكعبول
والف ليله وليله
انتى فكرتينى بحاجات جميله قوى

حلم بيعافر يقول...

بصراحة
عنيا وجعتنى ومقدرتش اكمل قراية عشان الخط صغير
كبرى الخط ينوبك فينا ثواب

asadma7bos يقول...

ايه الاخبار يا جماعه هى المدونين كلهم جالهم زهايمر ولا ايه
شيما بتقول زمان والسلم والتعبان والشياطين التلاتاشر ورجل المستحيل وساسو بتقول الفانوس ونيللى وشيريهان
فوقو بقا احنا دلوقتى بنعرف بعضينا عن طريق الانترنت
وسمعنى سلام اوعى السلك يكهربك فان فولته عالى
ههههه
هذا ما لدى اليوم وبالله التوفيق

♥نبع الغرام♥♪≈ يقول...

ممممممممم

حبيبتى مالك بجد كلامك وجعنى قووى ايه اللى حصل وصلك لكده
بس
ممكن تفهمينى
بجد زعلت عشانك والله

ربنا بعد عنك اى حزن حبيبتى
اختك
ايناس

мαησηα يقول...

هههههههههههههههه ماشى يا احلى ساسو يا سكر انتى

Cute Kitty **sookra يقول...

اسماء واحلام فى وجدانى
لا بجد موش فاكره روبى
فاكره ماما ساميه وبقلظ وحاجات كتير
منورنى

-------------------------------------------------
مى
اوك هاكتب كتير منها بس هتجبيلى شيكولاته ماشى
وكدا احنا طلعنا اخوات

----------------------------------------------
reem
نورتينى ياقمرايه
وربنا يرحمهم جميعا
وبعدين (تعالى لحمو ياحبيبتى)
كل رسايلك حوليهالى على طول ومع كل واحده شيكولاته جالاكسى
هههههههههههه
---------------------------------------------
طوبه فضه وطوبه دهب
اى خدمه
هنا هتلاقى كل ماتتمنى من زكريات
----------------------------------------------

donya
منورانى
انا كدا كل ماحد هيفتكر زكرى معايا هنا هيجيب شيكولاته
هههههههههههههههههههه


---------------------------------------------
romansy
الله كان حلو اوى مازنجر
وسلاحف النينجا وكل الحاجات بتاعتنا دى

نورتنى
--------------------------------------------
حلم بيعافر
مش انت عامل شجيع السيما وبتعافر استحمل بقى الخط الصغير وكمل
البوست الجديد خطه كبير
يلا اى خدمه
نورتنى
-----------------------------------------------
اسد محبوس
حلو اوى الكهربا اللى فولتها عالى دى
بتعمل دماغ كهربا يجنن
منور ويارب تخرج من الحبسه بتاعتك دى
----------------------------------------------
الاحزان ايناس
متشكره اوى ياقمرايه على سؤالك وربنا يخلينى ليكى
بس انا كمان كنت قلقانه عليكى
طمنينى
------------------------------------------------
مسمنى
انتى اللى سكر ياشربتاته
هههههههههههههههه

جارة القمر يقول...

:)