BLOGGER TEMPLATES AND TWITTER BACKGROUNDS »

الخميس، 1 أكتوبر 2009

الشنطه دى فيها ايه؟؟؟؟؟؟؟؟؟؟؟؟


مشهد بيستفزنى دايما .
اخره اللي حصل النهارده.
الله يوقف حال التطور اللي بالشكل دا .
الست من دول اول ما تجيب بيبي تجرى تشترى شنطه للبيبي
المصيبة موش فى الشنطه ماهي ممكن تشيل فيها غياراته وهى ماشيه لكن النيلة المنيلة بنيله انها بتشيله هو فيها .
ماشى ماقولناش حاجه .
لكن يا هانم يا ام لما تشيلي البيبى فى الشنطة موش تشيليها فى ايدك كانها شنطه خضار والراح والجاى يخبط فيها وترجعي تقولي الواد تعبان الواد ماعرفش ماله............
مشهد بصراحه يغيظ ازاى اصلا البيبى دا هيحس انه فى امان وفى حضن مامته ؟!!!!
ازاى ومامته دى لاهو شايفها ولا حاسس بحضنها اصلها سلامتها شايلاه فى ايديها كدا وهى ماشيه زى بالظبط شنط الخضار
المهم النها رده بقى كنت خارجه وواقفه كدا لابيا ولاعليا ومستنيه تك تك .
وفجاه تعدى الماما وهى شايله البيبى بالطريقه اللى قلتلكم عليها ويعدى ولد صغير راكب عجله ويخبط شنطه الخضار اللى فى ايديها ويعتذر ........
المصيبه بقى انها يابنى موش فيها خضار دى فيها نونو
نونو!!!!!!!!!!!!!!!
اه وحياه دى النعمه على عنيا فيها نونو !!
وتمسك الست فى خناق الواد وانت ياابن اللى ............واللى ...........
وتطلع عليه اللى جوزها عامله فيها ...............
ويرد الواد رد كدا بصراحه عجبنى يقولها :
انتى موش خايفه عليه طيب انا اعملك ايه؟!!!!!!
عشان كدا وعشان كدا اوى انا لاهاشترى شنط للبيبى ولاهاجيب بيبى .


3 التعليقات:

VÖltaa يقول...

على رأيك والله حاجة تغيظ

لا فى حاجات كتير كده من النوع ده

يعنى مثلا واحدة بترضع ابنها فى وسط الناس وفجأة تلاقيها انهمكت فى اى حاجة تانية والواد خلص رضاعة ولسة زى ماهى
وكل المسائل باينة ..واحنا قاعدين هههههه

ربنا يصلح حالنا

بس ليه مش عايز تجيبى بيبى ؟
ده بوستاتك مع بنت اختك زى السكر والله وبتدل انك هتبقى ام حنينة وام جميييلة مع اولادها

عالعموم ربنا يكرمك ياساسوو ويسعدك فى دنيا واخرة

ووو
مع السلامة

أيمن دولار يقول...

الله الله على الأمهات الجدد
البيبي في شنطة ؟؟؟!؟!!!؟؟ جديدة دي

جديدة بس مش غريبة
الواحد ياما بيشوف إهمال في حق الأطفال من ناحية أمهاتهم

طب ده في موقفين لو الوقت يسعف هقولهم باختصار

الاول كان في محطة القطر وكان في أم كده كاجوال جينز يعني وكده على ما أتذكر وكان ابنها الصغير يدوب لسه بيتعلم الجري وفرحان بالوسع الرصيف فاضي
المهم دي بقه مش عاجبها جريه لقيتها قلعت (لامؤاخذة) الجذمة من رجلها وكام خبطة كده على كتف الواد لما خلتني كنت هقوم أرميها تحت قطر

التاني أم برضه ومعاها على إيدها ولد صغنن بيعيط وبدل ماتحاول تسكته ... تعرفي عملت إيه؟؟؟ قرصته من دراعه الواد وشه احمر من الوجع وزي ما يكون روحه كانت هتطلع قال ايه عشان الواد يبطل يعيط.

ويرجعوا في الآخر بس شاطرين يقولوا العيال بعد ما كبرت مبتسمعش الكلام ليه؟؟ هاهاهاها من أعمالكم سلط عليكم

أنا بنضم لصفك في موضوع الأمهات اللي مش مربيات
وده عشان هي أم بالولاده فقط مش بالرعاية والحنان والتربية الصح

خلص الكلام عشان أعصابي متتعبش

سلام مؤقت

Cute Kitty **sookra يقول...

محمد
شكرا ياقمر على الدعاء الجميل دا .وربنا يحقق لك كل امانيك .
ايمن دولار
وربنا انا لو منك كنت اكلتهم بسنانى ,امهات اخر زمن
ربنا يرحمنا ويسترها علينا .